ستران عەبدوڵڵا ۋەرپەرسو مەكتەبو یاۋنەری یۊبیەی نیشتمانیی کورڎسانی جە چەمپنەکەوتێۋە تایبەتەنە چنی ئاژانسو هەواڵی فورات (ANF)ی سەبارەڎ بە چن مژارێۋە پېسە بۊمبۋارانکەرڎەو تەیارەخانەو سلێمانی، گرنگیی یۊبیەی هێزە کورڎسانییەکا و یۊبیەی گەلوو کورڎی و هامکاریکەرڎەو ۋەرنیشتو کورڎسانی، حەرپاسە باسش جە مەتەرسییەکا لایەنېۋە دەسەڵاتو پانیشتوو کورڎسانی کەرڎ، کە یاردەی دۊڵەتو ئەرەگیرو ترکی مڎۊ دژوو نەتەوەو کورڎی.

ھجومکەرڎەی سەرو تەیارەخانەو سلێمانی دەرەنجامۍ ئەوتۊش مەبۊ

ستران عەبدوڵڵا ۋەرپەرسو مەكتەبو یاۋنەری یۊبیەی نیشتمانیی کورڎسانی ۋاتش: "بە پەی لوۋاو ئېمە سیاسەتو تەرسنای و هەڕەشۍ و فشار وستەی سەرو یۊبیەی نیشتمانیی کورڎسانی و ئیدارەو سلێمانی، کە بەشێۋەن جە حوکمڕانیی کورڎسانی و حەرپاسە ھجومکەرڎەی سەرو تەیارەخانەو سلێمانی ئەنجامێۋە ئەوتۊش مەبۊ، چونکی یۊبیەی نیشتمانیی کورڎسانی جە ھامکېشەو سیاسی عێراقی و هەرێمو کورڎسانی و میان دەوڵەتینە هێزێۋە ۋەرپرسیارا".

فەخرا، کە بیمۍ بە بەشێۋە جە هامکێشەو هامکاری کەرڎەو برایا ۋەرنیشتوو کورڎسانی

سەبارەڎ پا ھجومەو تەیارەو دۊڵەتو ئەرەگیرو ترکی پۍ سەرو تەیارەخانەو سلێمانی، ستران عەبدوڵا ۋاتش: "ئەگەر ھجومکەرڎەی سەرو تەیارەخانەو سلێمانی بە بەھانۍ بیەو سەرکردەکا ۋەرنیشتوو کورڎسانی بۊ، ئانە هامکێشێۋە میان دۊڵەتیین و فەخرا پۍ یۊبیەی نیشتمانیی کورڎسانی، کە بانۍ بە بەشێۋە چا هامکێشە میان دۊڵەتییە و هامکاریی برایا ۋەرنیشتوو کورڎسانی کەرا و بەشۍ بیمۍ جە هامکێشەو ۋەرەنگاربیەیۊ تیرۊرستا داعشی".

ئانۍ کە کەیفشا بە داعشی مۍ دژوو هامپەیمانی یۊبیەی نیشتیمانی و ۋەرنیشتوو کورڎسانینۍ

نامبریا سەبارەڎ بە ھەرمانەی ھامبەشەو هێزەکا یۊبیەی و هێزەکا ۋەرنیشتوو کورڎسانی جە چۋارچێۋەو هامپەیمانی میان دۊڵەتینە پۍ ۋەرنگاربیەیۊ چەتەکا داعشی ۋاتش: "ئا ئۊپەراسێۊنە هامبەشۍ یۊبیەی نیشتمانیی کورڎسانی چنی هێزەکا ۋەرنیشتوو کورڎسانی ئەنجامش دێنۍ، جە چۋارچێۋەو هامپەیمانی میان دۊڵەتینە بیەن پۍ ۋەرەنگاربیەیۊ تیرۊرستا داعشی، ئا ئۊپەراسیۊنۍ، کە تائیسە ئەنجامدریێنۍ دژوو حیچ ۋلاتێۋە مەنتیقەکەی نەبیەن تەنیا دژوو تیرۊرستا داعشی بیەن، ئەگەر لایەنێۋە بۊ کەیفش سازبۊ بە تیرۊرستا داعشی بێگومان ئەنجامو هامپەیمانی ئێمە و هێزەکا ۋەرنیشتوو کورڎسانی بەدڵو ئاڎی مەبۊ".

ئەشۊ بەشۍ نەبیمۍ جە هامکێشەی هەرێمی کە زەرەر بە کورڎی و کورڎسانی میاۋنۊ

پۍ ۋەرەنگاری ھجومو دوژمنی و پوچکەرڎەیۊ پلانگێڵیەکا جبەری و دلېینەکا دژ بە گەلوو کورڎی، ستران عەبدوڵڵا ۋەرپەرسو مەكتەبو یاۋنەری یۊبیەی نیشتمانیی کورڎسانی ۋاتش: "جە سیاسەتی نەتەۋەینە، لانی کەم ئەگەر هێزە سیاسیەکۍ نەتاۋا پېۋەرە هەڵۋێسێۋە نەتەوەیی شۊڕشگێڵی و ڕاسیشا بۊ، ئەشۊ بەشۍ نەبا جە هامکێشەی هەرێمینە کە زەرەر بە کورڎی و کورڎسانی بیاۋنا، چونکی بیەی بە بەشێۋە جە هامکێشەو ۋڵاتا هەرێمی زەرەر بە هەرێمو کورڎسانی و یەکڕیزیی هەرێمی میاۋنۊ و سەرو ئاستی نەتەۋەییچەنە زەرەر میاۋنۊ بە گەلوو کورڎی و ئا جمیەرا، کە خەبات و ئەرەکۊشای جە پارچەکا تەرو کورڎسانینە مکەرا، ئەگەر هێزێۋە سیاسی نەتاۋۊ بەشۍ بۊ جە چارەسەری با نەبۊ بە بەشۍ جە سیاسەتو زەرەر یاۋنای بە دۊزو ڕەواو کورڎی".

پەی ۋەرەنگاربیەیۊ هەرەشەکا ئەشۊ هەڵۋێسما یۊبۊ

ستران عەبدوڵا سەبارەڎ بە گرنگیی یەکڕیزی گەلوو کورڎی ۋەردەمو ھجوم و هەڕەشەکا ئەرەگیرانە ئەرەیاۋناش: "ئا ھەڵۋێسە هامبەشەی هێزە کورڎییەکۍ ھەنشا، جە ۋەختو تەنگانەینە پێۋیسا بۊ بە هەڵۋێسێۋە سیاسیی نەتەۋەیی، ۋەختو بیەو مەتەرسینە پۍ سەرو کورڎسانی و گەلوو کورڎی ئی هەڵۋێسە نەتەۋەییە یۊگیریۍ پێویسێنۍ، هێزە سیاسیەکۍ کورڎی، کە ۋەشۍ بیۍ پۍ خەباتکەردەی بۍ پەی میللەتەکەیما، خەبات و میللەتەکەیما دوۋۍ ئیتجاھێن، یوۋەمشا ڕا نەڎاین بە زوڵم و ستەمی دژوو نەتەوەکەیما، دوۋەمیچ ۋەختۍ دەرفەتێۋە مڕەخسیۊ پۍ ۋەڵێۋستەو دۊزو سیاسی کورڎسانی، پێۋەرە ئی هەنگامۍ بنیەیمۍ".

چېرو نامونیشانۍ جیاوازینە ھەرمانە مکەرا پۍ دایۋەنەی جە بەرژەوەنڎیی نەتەوەو کورڎی

جە دما دمای قسەکاشەنە ستران عەبدوڵڵا ۋەرپەرسو مەكتەبو یاۋنەری یۊبیەی نیشتمانیی کورڎسانی سەبارەڎ بە هەڵۋێسو لایەنە سیاسییە کورڎییەکا دژوو ھجومەکەو دەوڵەتو ئەرەگیری تورکیای پۍ سەرو تەیارەخانەو سلێمانی و هامکارییەکا پارتی (پەدەکە)ی پۍ ئەرەگیرا ئەرەیاۋناش: "هێزە سیاسییەکۍ کورڎسانی بەشیۋێۋە عال پەشتیوانیما ۋنە مکەرا دژ پا ھجوم و ستەمەی کە جە دژوو سلێمانی کریۊ، بەڵام تەنیا ئانڎە ۋەسۍ نییا، بەڵکم ئەشۊ لەخاوو ئا هێزە سیاسیا کەرمۍ کە بانۍ بە بەشێۋە جە پرۊژەو هەرېمو ئەرەگیرا پۍ دوژمنایەتی کورڎسانی و گەلوو کورڎی، کە چېرو نامونیشانۍ جیا جیاینە ھەرمانە مکەرا پۍ دایۋەنەی جە مەسڵەحەتەکا نەتەۋەو کورڎی".

ھ.ش