سی پی تی ئەرەیاۋناش، ساڵەو ٢٠١٥یۊ حەتا ئیسە دۊڵەتو ترکی بە ھجومی ئاسمانی ١٥٠ هاموڵاتیۍ مەڎەنیێش جە پانیشتوو کورڎسانینە گەشمەرڎۍ کەرڎێنۍ و ٢٦٠ کەسېچش زامڎارۍ کەرڎێنۍ.
ھېزی جە کەشو شیرینی نزیک بە دەگاو ئەردێلی سەر بە شارۊچکڵەو شیلادزۍ جەنازەو دوۋۍ هاموڵاتیا بە نامەکا "عارف ئۊمەری (٥٠)ساڵی و ئەحمەڎ حەسەنی (٣٥) ساڵی ئیزیێۋە. حەردوۋە هامۋڵاتیەکە ١١ ڕوۋۍ چېۋەڵتەر پۍ کۊکەرڎەیۊ گژوگیواۋی ۋەھارەی روۋەشا ئۊو کەشەکەی کەرڎێبۍ.
رێکوزیاو مەڎەنی ئاشتی پارێزی ئەمریکی (سی پی تی) ئەرەیاۋناش؛ حەردوۋە هامۋڵاتیەکە جە ھجومۍ ئاسمانی دۊڵەتو تورکینە گەشمەرڎۍ بیېنۍ.
بەپاو ئامارێۋە سی پی تی، جە ئایارو ٢٠١٥یۊ حەتا ئیسە نزیکەو ١٥٠ هاموڵاتیۍ مەڎەنیۍ بەمەڵامەتو ھجومی ئاسمانی دۊڵەتو ترکیوە گەشمەرڎۍ بیېنۍ و ٢٦٠ هاموڵاتیېچ زامڎارۍ بیېنۍ.
سی پی تی ھجومەکۍ دۊڵەتو ترکیش پۍ سەرو پانیشتوو کورڎسانی بە تنی شەرمەسار کەرڎۍ.
ھ.ش
