ئەنجوومەنو شارو تل ڕفعەتی کانتۆنو شەهبای پەی  شەرمەزارکەردەی گۆشەگیریی سەرو ڕابەرو گەلو کوردی عەبدوڵا ئۆجالانی ڕاپیمایشا کەرد. بەسەدان کۆچبەرێ عەفرینی و ئەرەنیشتا تل ڕفعەتی بەشێوەوە جەماوەری بەشداری ڕاپیمایشا کەرد.

جەماوەر وێنەکێ ڕابەرو گەلو کوردی عەبدوڵا ئۆجالانی، لافیتەو "ئازادیی جەستەیی ڕابەر ئاپۆی چارەسەری پرسوو کوردی"ن بەرزکەردۆ و بە جۆشۆ بەشداری ڕاپیماکەی بیۍ.  

جە ڕاپیماکەینە ئەنداما ئەنجومەنوو بنەیانەو گەش مەردا تل ڕفعەت ڕەشید فەتکۆ قسێش کەردی و واتش: "ئامانجو دەوڵەتو تورکی جە گۆشەگیری ڕابەر ئاپۆی، جیاکەردەیۆ گەلی و ڕابەر ئاپۆین. بەڵام ئێمە قەد جە فەلسەفەو ڕابەر ئاپۆی لامەرەیمێ و بەردەوام پەی ئازادیی جەستەیی ڕابەر ئۆجالانی درێژە بە ئەرەکۆشایما مرەیمی."

بە دروشمەو "بێ سەرۆکی ژیوای مەبۆ" دمای بە ڕاپیماکەی ئاما.