تەلعەت یونس هامسەرۆکوو ئەنجومەنوو ڕاوەبەرایەتی هەرێموو جزیرێ ئەرەیاۋناش، کە ئاڎۍ هەمیشە پېوەرە سیستموو بنیاڎنیای و پارېزنای بەراڕاوە و واتش: "ئیدارەو خۆسەری و گەلەکەما بە پاو جەنگی، گەمارۆ و هجومی ۋېشا بەڕێکوستەی کەرڎەن".
تەلعەت یونس هامسەرۆکوو ئەنجومەنوو ڕاوەبەرایەتی هەرێموو جزیرێ پۍ ANF قسېس کەرڎۍ و دەسنیشانش کەرڎ کە دەوڵەتوو تورکی جە سەرەتاو ئاخېزیۆ هجوم کەرۆ سەروو سەرنیشتوو ۋەرکەوتوو سوریای. تەلعەت یونس واتش: "دەوڵەتوو تورکی پۍ ماڕاو ئیراڎەو گەلەکەیما بە گرڎ شێوېوە هجوم کەرۆ و ئا هجومایچە بە مافوو وېش مزانۆ، ماڕای ئاخېزوو ئازاڎیی و دیموکراسی سەرنیشتوو ۋەرکەوتوو سوریای و دمایی ئارڎەی بە پرۆژەو ئیدارەو خۆسەری پۍ ۋېش کەرڎەنش بە تەنیا ئامانج. بڕۍ جار بە ئەرەگیری جوغرافی، بڕۍ جاریچ پۍ تێکدای ئارامی و ئاسایش و مەنتیقەکەی بە گرڎ جۊرۍ هجوم کەرۆ و ئا هجومایچە بە مافوو ۋېش مزانۆ، پی جۊرە گەرەکشا گەلوو مەنتیقەکەی هەمیشە جە قەیران و نەهامەتینە مەنۆ، چی چوارچێوەنە بە شېوېوە قورس هجومش کەرڎ سەروو ئەرەمەرزیاو بیناسازی و خزمرتگۆزاریەکا. ئیدارەو خۆسەری بە گرڎوو دەرفەتەکاش پۍ ئاسانکاری ژیۋای خەڵکی و جوابدایۆ پەنەوازیەکاشا ئەرەمەرزیېش مەرزنېرە. دەوڵەتوو تورکی هجومش کەرڎ سەروو ئا ئەرەمەرزیا. پی جۊرە گەرەکش بۍ ئیدارەو خۆسەری ۋەروودەم و گەلینە بێ چارە و بێ هیوا کەرۆ. گەرەکش بۍ گەلوو مەنتیقەکەی کە ساڵانێوەن جە ۋەران ۋەروو کۊکوشی، ئەرەگیری و کوشتەینە مدرامان کەرۆ، ناچارۍ کەرۆ کە کۆچ کەرا. پۍ ئانەی ڕا گېرۆ چا ئۆپراسیۆنا قەسەدەی کە دژوو شانەکاو داعشی دەسش پنەکەرڎېبېنۍ، پۍ ئانەی بتاوۆ کۊشیایش ۋەران ۋەر بە تیرۆری لاواز کەرۆ و بتاوۆ گروپە چەتەکا پېسە داعشی مەنتیقەکەنە چالاکۍ کەرۆ، هجومەکېش ۋەرفراوانتەرۍ کەرڎۍ.
ۋېڕاوەبەری بە ئاخېزوو گەلی مەرزیارە. هەمیشە سیستموو پارېزنای و بنیاڎنیایش پېوەرە بەردەن ڕاوە. سەروو ئی بنەمۍ ئەرەمەرزیېکۍ ۋېڕاوەبەری و گلېرگەی قارەمانما ساڵانێوەن ۋېشا بەڕێکوستەی کەرڎەن. ژیۋای ڕووانەو ۋېشا بە پاو جەنگی، گەمارۆ و هجومی ڕێکوستەن. هجومەکۍ بەردەوامېنۍ، پۍ ئانەی بتاوا دەرفەتەکا ۋېڕاوەبەری و کاریگەرییەکاش کەم کەراوە، هەمیشە سیاسەتوو گەمارۆی و گۆشەگیری جابەجۍ کەرا. ئیدارەو خۆسەری پۍ ئانەی بتاوۆ جوابدەرۆ بۆ جە ۋەران ۋەروو پەنەوازیەکا گەلینە، ۋېس بەپاو ئا هەڵو مەرجەیە بەڕێکوستەی کەردەن و پا جۊرە هەرمانەکاش ڕاوەبەر کەرۆ".
تەلعەت یونس هامسەرۆکوو ئەنجومەنوو ڕاوەبەرایەتی هەرێموو جزیرێ دەسنیشانش کەرڎ کە سەرەڕاو ئا گرڎ هجوما، گەل پەشتەو ئەرەمەرزیا و هێزەکاشاوە مردۍ و واتش: "گەلەکەما دەستبەردارۍ شۊنما و مەنتیقەکا وېشا نەبیۍ، گرڎ سەروو هەرمانەکاشاوە مەنۍ و قەراروو مدرامانیشا دا. ئی هەڵوێسەو گەلی پاسەش کەرڎ کە هجومەکۍ نەیاوا بە ئامانجەکاشا و جە هەمان وەختەنە بیۍ بە پاڵپەشتێوە گۊرە پۍ هێزەکاو پارېزنای و ئەرەمەرزیاکاو ئیدارەو خۆسەری".
