۸و حوزەیرانو ۲۰۲۲ ێنە جە چۋارچێۋەو ۋنەکۊڵیاکا داواکاری گرڎی ئامەڎینە پۊلیس ھورش کوا سەرو یاناو ۲۲ کەسێشا ئەرەگیر کەرڎۍ، کە دلېشانە ۲۰ کەسێشا ڕۊنامە نۋیسۍ بێنۍ. ڕۊنامەنۋیسەکۍ ماوەو ٨ ڕوۋا چېرو ۋنەکۊڵیاینە بێنۍ و دماتەر جە ١٦و حوزەیرانینە ڕەوانەو داڎگای کریێبێنۍ.

 سەرنۋیسەرەو ژن نیوزی "سافییە ئالاگاش"ە، هامسەرۊکو جەمەو ڕۊنامەنۋیسا دیلجە فورات (DFG)ی "سەردار ئاڵتان"، سەرنۋیسەرو ئاژانسو میزۊپۊتامیا(MA)ی "عەزیز ئۊروچ"، ڕاۋەبەرو نۋیستەو ڕۊنامەو خۊبوونی "محەمەد عەلی ئەرتاش" و "زەینەل بولوت، عومەر چەلیک، مەزڵوم دۊغان گولەر، ئیبراهیم کۊیونجو، نەشە تۊپراک، ئەلیف ئونگور، عەبدولڕەحمان ئۊنجو، سوات دۊگوخان، ڕەمزییە تەمەل، ڕەمەزان گەجیکەن، لەزگین ئاکدەنیز و مەهمەت شاهین" بە تۊمەتو "ئەنڎامبیەی جە رێکوستەینە" قەرارو زینڎانیکەردەیشا پۍ بەرکریا. حەرپاسە حەریۊ جە ڕۊنامەوانا "گوڵشەن کۊچوک، ئەسمەر تۊنچ، محەمەد یاڵچین، قادر بایرام، فەیناز کۊچوک و ئیحسان ئەرگولەن" بە مەرجو مەنەیۊیشا چێرو چەمڎاری داڎگاینە مەرەخەسۍ کریۍ.

نۋیسینگەو داواکارو گرڎی ئامەڎی جە ئاخرو مانگەی ۋیەردێنە ۋنەکۊڵیێکێش تەمام کەرڎۍ و تۊمەتەکۍ ۋێش جە چۋارچێۋەو شەکواکێشەنە ڕەوانەو لقو ٤و داڎگاو سزا قورسەکا ئامەڎی کەرڎ. داڎگایچ سەرو داواو داواکاری گرڎی تۊمەتەکېش دژ پا ڕۊنامە نۋیسا پەسەنڎ کەرڎ.

ھ.ش