جمیەروو گلېرگەو دیموکراتیکی (تەڤ-دەم)ی پەشتیوانیش پۍ هەڵمەتەو میان نەتەوەیی ئازاڎیی پۍ ڕابەروو گەلوو کوردی عەبدوڵا ئۆجالانی و چارەسەری سیاسی پرسوو کوردی بەربڕی و داواش جە گلېرگەو میان نەتەوەیی کەرڎ فشار وزا سەروو دەوڵەتوو تورکی.
تەڤ-دەم جە ئەرەیاۋنېوەنە داواش کەرڎېنە جە دژوو بەردەوامی گۆشەگیری رەهاو سەروو ڕابەروو گەلوو کوردی عەبدوڵا ئۆجالانی و رێکوزیا میان نەتەوەییەکۍ بە تایبەتی نەتەوەیۊگېرتەکۍ فشار وزا سەروو دەوڵەتوو تورکی.
ئەرەیاۋناکەی پی جۆرەنە:
"سیاسەتێوە کە دەوڵەتوو تورکی فاشیستی ڕاوەبەرش کەرۆ، سیاسەتێوە تاوانکارانەن و ڕېخە و سەرچەمەکەش پۍ سەردەموو عوسمانی گېڵۊوە. حکومەتوو فاشیستی جە وەڵېکۊتەی گلېرگەی یاخوڎ بنیاڎنیای پیمەرە دیموکراسیە راستەقینەکا چ جە تورکیا و چ جە وڵاتا دەوروبەریش تەرسۆ، حەرپۊکەی حۊڵ مڎۊ کە بە گرڎ جۊرېوە حەقە جە ئیراڎەو ئاڎیشا بسانۆ.
چی سەردەمەنە تورکیا موینۆ ناوەندێوە سەرەکی کە کاریگەری کەرۆ سەروو هەرێمەکەی و جەهانی ڕابەر عەبدوڵا ئۆجالانا. ڕابەر عەبدوڵا ئۆجالان ڕۊحوو مدرامانی و ئیراڎەو گەلا و کولتورە مرۆڤایەتیەکاش زینڎەکەرڎەنۆ، بەڵام حکومەتوو فاشیستی چا وەڵېکۊتەیە تەرسۆ؛ حەرپۊکەی بە شێوېوە بەئەنقەس سیاسەتوو قڕکەرڎەی ڕاوەبەرکەرۆ تا قەزیەو ڕابەر عەبدوڵا ئۆجالانی نە دلېنە و نە جە جبەرۆ نەجوڵیۆ.
چا ڕېوە دەوڵەتوو فاشیستی حۊڵ مڎۆ تاوانەکاو ۋېش پەردەپۆش کەرۆ و جە ۋەرپەرسیەکا ۋېش جە ۋەران ۋەروو کۊشیای و مدرامانوو ڕابەرایەتی و مافە رەواکاشەنە پېسە دیلێوە پۍ مرۆڤایەتی ئازاڎیی، بڕەمۆ. سەروو ئانەیە مشۊم حکومەتوو فاشیستی تورکی ڕۊشنش کەرۊوە پۍ رای گرڎیی و ڕا بە دیڎاری و چەمپنەکۊتەی ڕسمی بڎۆ، تا چارەنوویسوو ڕابەر عەبدوڵا ئۆجالانی جە دماو بوومەلەرزەکەی ڕۊشن بۊوە.
ئێمە پېسە جمیەروو گلېرگەو دیموکراتیکی (تەڤ-دەم)ی داوا جە گرڎوو رێکوزیا میان نەتەوەییەکا بەتایبەتی رێکوزیاکا چېروو چەترەو نەتەوەیۊگېرتەکا، رێکوزیاکا پەیوەس بە مافوو زینڎانیا و سی پی تی کەرمۍ کە فشارەکاشا پۍ سەروو حکومەتوو تورکی چڕ کەراوە و ملش پنە بڎا کە چارەنوویسوو ڕابەرایەتی ئاشکرا کەرۆ، با ڕا بڎۆ شاندێوە ڕابەر عەبدوڵا ئۆجالانی بوینۆ و ئاگاڎاروو ئاژەو تەندروستی ئاڎی با و پۍ ئازاڎیی جەستەیی ڕابەر ئاپۆی هەنگامەی کرداریە بنریۆ.
هاموەخت داوا جە گەلا و پێکئاماکا جە کوردسان و جبەروو هەرێمەکەی، گرڎوو هێزە سیاسیەکا، هێزە نیشتمانییەکا، رێکوستەکا گلېرگەی مەدەنی کەرمۍ کە مجیارە مېڎانەکا، پەشتیوانی جە مدرامانی سەردەمیانەو ڕابەرایەتی کەرا. داوا جە گەلەکەیما کەرمۍ کە بەشداری چالاکییەکاو خېمە نیایرە و ئێشکگری با کە پۍ پەشتیوانی جە گەلوو سەرنیشتوو کوردسانی و هەڤاڵاو دلۍ زینڎانی جە شارەکاو سەرنیشتوو ۋەرکەوتوو سوریاینە دەسشپنەکەرڎەن. تا ماڕای گۆشەگیری سەروو ڕابەر عەبدوڵا ئۆجالانی، گوڕ بە کۊشیای و مدرامانی مڎەیمۍ".
