تەڤگەرو گلېرگەو دیموکراتیکی (تەڤ-دەم) بە ئەرەیاۋنێوە "کۆنگرەو دیالۆگی نیشتیمانی" شامیش ڕەڎکەردۆ. تەڤ-دەم ئانەش یاڎ ئاوردۆ کە کۆنگرەکە نوێنەرایەتی گەلاو سووریای نمەکەرۆ و هەمان ئاوەزیەتو پەشتگۊش وستەی و دووروستەیۆ ڕژێمی وەڵینی ڕاوەبەر مکریۆ.

تەڤ-دەم ئاماژەش پانەی دا بەشداراو کۆنگرەکەی بە شێوێوە تاک لایەن و  جە یەک مېڎانۆ هۊرچنیێنۍ، ژەنی بەشدارۍ کۆنگرەکەی نەبێنۍ و هەرپۊکەی قەولو ئەرەمەرزنای سووریایۍ هەمە ڕەنگی و دیموکراتیکی بە بێ ئەنجام بەرشی.

تەڤ-دەم ئەرەیاۋناش ئا قەرارۍ جە کۆنگرەکەنە دریێنۍ بە پاو بەرژەوندی کەسە بەشداەکا دریێنۍ و نوێنەرایەتی حەقەتینەو گەلاو سووریای یاگێشا نەگرتەن.

هەرپاسە تەڤ-دەم ئانەیچش یاڎ ئاوردۆ جە سەرەتاو شۆڕشو سووریاینە سەرو ئەرەمەرزنای گلېرگەی دیموکراتیکی و ئازادی جە سەرنیشتوو ۋەرکۊتوو سووریاینە کۊشش مکەرۆ و واتش: "ئیدارەو ۋێڕاوەبەری دیموکراتیکی گرڎو پێکئامای و کەلتوورەکا هەرێمەکەی چنەشەنە بەشدارێنۍ و ژەنی سەرمەشقایەتی مکەرا، ئەرەمەرزیان".

تەڤ-دەم بانگەوازو سووریای تازەیش سەرو بنەماو سیستەمو مېیانی دیموکراتیکی کەرڎ، پەی ئانەی ژەنی جە قەرارداینە بانۍ بە هامکارۍ بنەڕەتی.

جە دما دمایی ئەرەیاۋناکەینە تەڤ-دەم سیاسەتو پەشتگۊشوستەیش ڕەڎ کەردۆ و ئاماژەش پانەی دا بەردەوامی ئەوەکۊشای پەی ئەرەمەرزنای سووریایۍ دیموکراتیکی مېیانی بە پاو فیداکاری گەلوو سووریای ئەنجام دریا.