هامسەرۆکەی گردینەو پارتوو یەکسانی و دیموکراسیی گەلا (دەم پارتی) تولای حاتەم ئۆغۆللارییە جە جەمۆبییەی فراکسیۆنوو پارتەکەیشنە پەرلەماننە پەرسەکێش نرخنێ. ناڕەزایەتیی تندش نیشانە دا دژوو قسەکاو سەرۆکی گردینوو مەهەپەی دەوڵەت باخچەلی.

حاتەم ئۆغۆللارییە واتش کوردستاننە و سەرانسەروو تورکیاینە، ٧ تا ٧٠ ساڵێن مدرامان مکریۆ دژوو دەسملەرەگێرتەی ئیرادەی، گرد لایێو خاوەنداریی وەنەو ئیرادەو خەڵکوو جولەمێرگی مکەرا، واتش: "ئاکەپە هەمیشە وێش پێسەو قوربانیی دەسوو کودەتایەکا نیشانە مدۆنێ، هەردەم کودەتاو ٢٨و شوباتی بە نموونە ئارێوە، بەڵام هەمان دەسەڵات ئارۆ سەروازێ مکیانۆ سەروو جادەکا، ئینە دیمەنەکەن، ئینە وەردەموو پارێزگاو جولەمێرگییا. تارێخ ئی ڕسمەشە یاد نمەشۆ. ماچا ئێمە دژوو کودەتای سەروازیینمێ، بەڵام ئەها سەروازێ چەنی ئینێ چێنە. پینەیە سەروازەکێشا کەردێ هامبەشوو کودەتای سیاسی جولەمێرگەنە".

تولای حاتەم ئۆغۆللارییە ڕەخنەش جە قسەکاو دەوڵەت باخچەلیی گێرت، کە نیایرەی قەیومیش بە یاسایی نامێ نیا، واتشۆ نیایرەی قەیومی زیندەبەچاڵکەرەی دیموکراسییا تورکیانە، داواش ونەو هێزە دیموکراسی و ئۆپۆزیسیۆنەکاو تورکیای کەردە، دژوو قەیومی بمدراوە و  دیموکراسی بپارێزنا، واتش: "مزانمێ ئەگەر زیاتەر گیریەیمێ، متاومێ سەرێ بگنمێ و پاشەکشێ بە فاشیزمی بکەرمێ".

هەرپاسە ئەوەخوایش کەردۆ دەسەڵاتوو ئاکەپە و هامبەشەکێش ئارۆ هەڵسیی دروینێ  پەی غەززەی مجانێ، کەچی هەمان ستەم جولەمێرگنە مکەرا و واتش: "جولەمێرگیچ غەززەن، گەلوو فەڵەستینی چەنی دژوو ستەموو ئیسرائیلی مدرامان مکەرا، خەڵکوو جولەمێرگی و گردوو گەلاو تورکیایچ مدرامان مکەرا".

حاتەم ئۆغۆللارییە جەختش کەردۆ قەیوم گێڵایۆین پەی سەدەو هەژدەی، پەی سەردەموو پاشایەتی، واتشۆ ئینە  زیهنیەتوو فیرعەونی و زوحاکی و هیتلەرین، ستەمکارێ حەرگیز چارەنویسشا خاس نمەبۆ، واتش: "چی دنیێنە خەیلێ پاشێ و زوحاکێ و فیرعەونێ دژوو ئینسانیەتی شکسشا ئارد. شمە مەحکوومێندێ بە شکست".

هەرپاسە ئاخرۆ جەختش کەردۆ جە کۆشیای دژوو قەیومی بەردەوام و گەورەتەر مبۆنە.