تیرۆرکەردەی د. سەلاح هه‌ورامی ٢٨ ساڵێش پەڕکەردەوە
تیرۆرکەردەی د. سەلاح هه‌ورامی، مامۆستاو زانکۆی، ڕۆشنۋیر، نۋیسەر و سیاسەتمەدار، ٢٨ ساڵێش پەڕکەردەوە و هیشتای بکوشەکێش دەستگیرۍ و دادگایی نەکریێنۍ و سزا نەدریێنۍ و دۆسیەکەش چەمەڕاو دادگەرییەن.
کەم رۊ و رۊدیارێو جە رۆچشمارو کوردیەنە هەن، خیانەت، تاۋان و تیرۆرێوش چنە نەبۆنە کە پەدەکە و بنەماڵەو بارزانی پەشتیشەوە نەبانۍ. یۆ جە ئا خیانەت، تاۋان و تیرۆرا، بە ئامانجگێرتەی و تیرۆرکەردەی د. سەلاح هه‌ورامی-ن.
٢٨ ساڵۍ جەی وەڵتەر جە رۆدیارو ١٩٩٥/٠٣/١٣ی،
جە شارو هۆلێر (هەوڵێر)یەنە، دکتۆر سەلاح هه‌ورامی مامۆستاو زانکۆو سەلاحەدین-ی، ڕۆشنۋیر، نۋیسەر و سیاسەتمەدار بە پیلانێۋی هامبەش کە دەستگاو سیخوڕی و هەواڵری تورکی (میت)ی و دەستگاو پاراستن-و پەدەکە-ی پەشتیشەوە بێنۍ، تیرۆر کریا.
د. سەلاح هه‌ورامی خەڵکو هەرێمو هەورامانی بۍ و بە هەڵۋێستە نەتەوەیۍ و نیشتمانییەکاش و وڵاتپارێزیەکەیش و پەشتیۋانیش جە کۆشای بەشەکاو تەرو کوردستانی بەگردیی و سەرنیشت (باکور)و کوردستانی، ئەشناسیێوە و نامێش بەرکەردێبۍ. هاموەخت سەرسەختانە دژ بە جەنگو کوردکوشی و براکوشی بۍ کە جە ئاسەردەمەنە پەدەکە و یەنەکە-ی بەرپا کەردەبۍ و هەزاران هەموڵاتیۍ پانیشتو کوردستانیش کەردێبێنۍ قوربانی و بارگرانی و دژواری فرەش پەی ژیۋای خەڵکی دروست کەردەبۍ. جە ئا چوارچوەنە هەورامی کارۍ و چالاکیێش بێنۍ و ژمارێۋی فرۍ نۋیستۍ و وتارێش وەڵاوۍ کەردێوە بە ئا ئامانجە دلۍ یانە شێۋیاکەو کوردی رێکبۋزۆنەوە و یەکێتیی نەتەوەیی کوردی دروست ببۆنە و گەل جە جەنگی و نەهامەتییەکان رزگارش ببۆنە. د. سەلاح هه‌ورامی فرەتەر بابەتۍ و وتارەکانو وێش جە رۊچنامەو وڵات-یەنە نۋیسۍ، بەڵام بە هۆکارو ئانەی هەڕەشێش سەرۆ بێنۍ بەناچاری بەنامێ تەرەوە نۋیسۍ و بابەتەکاش جە ئا رۊچنامەنە وەڵاوۍ مکەرێۋە.
فرە جارۍ پارتە دەسەڵاتدارەکۍ (پەدەکە و یەنەکە) گوشار جە د. سەلاح هه‌ورامی کەرێنۍ تا ببۆنە ئەندامشان،و جە رێکۋزیاکانشانە دەستبەکار ببۆنە. بەڵام هەمیشە ڕەتش کەرێۋە دلۍ پارت و لایەنێۋیەنە یاگۍ بگێرۆنە کە دژ بە گەلەکەیش مدرانەوە و هامکاری دوژمنی و وڵاتە ئەرەگێرەکان مەکەرۆنە و جەنگێۋی دلێوێیش تووشوو گەل و وڵاتەکەیش کەردەن.
هامزەمان د. سەلاح هه‌ورامی و دۆستایەتیی و هاوەڵایەتییش چەنی سەرکەردە، رۆشنۋیر و نۋیسەر و رۊچنامەوان دکتۆر سیروان-ی بێنە کە ئاڎیچ دماتەر جەلاو پەدەکەیەوە شەهید کریا و پێوەرە کۆشای هامبەشان پەی قوتارکەردەی پانیشتی جە جەنگی و نەهامەتی و ئەرەگێرتەیی بێنە. پەیوەندیدار بە ئانەی سەرقاڵۍ ئەرەمەرزنارەی پارتێۋی سیاسی بێنۍ بە نامۍ (یەکێتیی نەتەوەیی دیموکراتیکو کوردستانی- یەنەدەکە/ YNDK). بەڵام وەڵۍ بەفەرمی ئاشکراکەردەی ئا پارتەیە، د. سەلاح هه‌ورامی جە رۆدیارو ١٩٩٥/٠٣/١٣یەنە جە کەردێۋی وەڵتەر پیلان پەیکریانە جەلاو میتو تورکیای و پاراستنو پەدەکە-یەوە جە هەولێر تیرۆرکریا. هەڵبەتە دماتەر جە ١٩٩٥/٠٣/٢٠یەنە بە ڕەسمی (یەکێتیی نەتەوەیی دیموکراتیکو کوردستانی- یەنەدەکە/ YNDK) ئعلان کریا و ئاواتەکەو د. سەلاح هەورامی ناکام نەبی و بە ئاکام یاوا.
ئارۊ سەرەڕاو ئانەیە کە تیرۆرکەردەی دکتۆر سەلاح هەورامی ٢٨ ساڵێش پەڕکەردەنەوە، کەچی هیشتای ئەنجامدەرۍ تاۋانەکەی و بکوشەکێش دەستگیرۍ و دادگایی نەکریێنۍ و سزا نەدرێنۍ. بە ئی جۆرە تیرۆرو د.سەلاح هەورامی-چ، چوون سەڎان تیرۆرۍ تەرۍ کە پەدەکە-ی و بنەماڵەو بارزانی بە هامبەشی چەنێ دوژمنانو کوردی ئەنجامێشان دێنۍ، پەردەپۆش کریان و دۆسەکەش چەمەڕاو رۊزگارێن کە دادگەری بەیۆنە ئاراوە و ئەنجامدەرۍ تیرۆرەکەی و بکوشەکێش بەسزاو گەلی بیاۋنیانۍ.
