ئیدارەو وێڕاوەبەریی شەنگالی  شەشەم ساڵەو ئەرەگیرکەردەی عەفرینینە ئەرەیاوناێوەش وەڵا کەردۆ.  کۆنفڕانسێوە ڕۆنامەوانیینە، کە جە مەزارگەو گەشمەردە دڵگەشی و گەشمەردە بەرخودانی کەشوو شەنگالینە بە ئامادەبییەی بنەیانەو گەشمەردا، نوێنەراو ڕێکوزیا و ئەرەمەرزیایەکاو وێڕاوەبەری شەنگالی کریا، ئە لایەن ئەرەیاونایەکە دەسەو ڕاوەبەریی شەنگالی ڕیهام حەسەنی واناوە.  

ئەوەڵووو ئەرەیاونایەکەینە ئاماژە پانەیە کریان، "وەڵێ ٢٠١٨ عەفرین نموونەو ژیوای دیموکراتیکی بێ، کە پەی ماوەو هەزار ساڵا گردوو نەتەوەکاو کوردی، ئێزدی وعەرەبی بە شێوێوە ئازاد و یەکسان، بە کولتوور و ئایینوو وێشاوە دەژیوێنێ. ئەنجاموو بەرژەوەندیی هێزە هەژموونگەراکا و بێدەنگیی هێزە میاننەتەوەییەکاوە، عەفرین جە ١٨ ئاداروو ٢٠١٨ دەوڵەتوو تورکی و چەتەکاش ئەرەگیر کەرد. وەراوەروو هجوومە دڕندانەکاوە مدرامانوو گەلوو عەفرینی تا دمایی مانادار و تاریخیی بێ. مدرامانوو گەلی و جەنگەواناو ئازادیینە یەپەگە و یەپەژە بە سەدان قوربانیێشا دێ.  بە سەدان قارەمانێ گیانشا پەی خاک و وەڵاتەکەیشا بەخت کەرد. ئێمە جە کەسایەتیی گەشمەردە ئاڤێستا خابورینە سەرجەموو گەشمەرداو عەفرینی، ئازادی بە ڕێزۆ یادێ کەرمێوە".

'ئەقڵیەتوو داعشی عەفریننە'

درێژەو ئەرەیاونایەکەینە ئامان: " ماوەو شش ساڵا ملوو بە سەر داگیرکەری دەوڵەتوو تورکی و چەتەکاش  عەفریننە مویەرۆ، شش ساڵێن ستەم، ئەشکەنجە، فاڕای دیموگرافیای کە فاڕای ئایینی و باوڕیچش گێرتەن وێ، کوشتەی، تاڵانیی سروشتی، ئڕفانای، دەسدرێژی، تێکدای یاگە مەبرەکەکا و هتد.. گردوو کردەوەکاو بەروو ی ئەخلاقی ئینسانی تا ئیساتێ بەردەواما. بە هەمان شێوە کە داعش بە هامکاریی دەوڵەتوو تورکی ساڵەو ٢٠١٤ شەنگالنە کەردش. ئارۆ عەفریننە هەمان ئا کەسێ و ئا ئەقڵیەتە ئامادەییشا هەن. جیهان ئا ڕاسییە مزانۆ، کە شش ساڵێن عەفریننە ئەرەگیرکاریی هەن، ئەمرە هەنە،  هیزی شەنگالنە و ئارۆ عەفریننە".

'گەلوو عەفرینی بە هومێوو گێڵایۆ وێگێری مکەرۆ'

هەرپاسە سەرنجە پەی سەروو بێدەنگیی ڕای گردینەو جیهانی ئەرەکێشیان، "بە تایبەتی ئانێ بە نامێ مافەکاو ئینسانیوە جووڵیاوە، ئا ڕێکوزیێ بە نامێ دیموکراسییوە وێشا نامێ منیا، چی ئا ڕاسییە نمەوینانێ. ئەگەر مویناش چی وەراوەروو دەوڵەتوو تورکینە نمەبانێ داراو هەڵوێستی. هەرپاسە پاڵوو ئەرەگیرکەرییوە گەلوو عەفرینی، کە کە ناچار بە کۆچبەری بییەن، سەرباروو گردوو دژوارییەکا بە هومێدوو گێڵایۆ پەی ماواو وێشا چندین ساڵێن وێگێری کەرا. بەڵام جارێوە تەر دەوڵەتوو تورکی ڕوانە هجووم کەرا سەروو گەلی، کە جە ئەنجامنە بە سەدان کەسێ گەشمەردێ و بریندارێ بیێنێ".

'عەفرین و شەنگال یۆنێ'

ڕیهام حەسەنە واتش، "ئێمە گەرەکمانە ویرش بارمێوە، کە پێسە چەنی ساڵەو ٢٠١٤ ڕۆڵەکاو عەفرینی ڕووەشا کەردە شەنگالی، هەمان وەختەنە ساڵەو ٢٠١٨ینە ڕۆڵەکاو شەنگالیچ ڕووەشا کەردە عەفرینی. ئێمە پێسەو کگلێرگەو ئێزدی هەرگیز ئا ڕوا ویر مەکەرمێ، ئی پێوەسییە بە ونی وەش بییەن.  وەروو ئا ڕاسییە ماچمێ شەنگال و عەفرین یۆنێ ئێمە بڕواما چانێنە، عەفرین بە مدرامانوو گەلا ماوێوە نزیکنە جە چەتەکا ڕزگار مکریۆ و گەلەکەما گێڵۆوە سەروو خاکوو تاتەوبابایاش. پێسە چەنی تارێخەنە ئیمپراتۆریەتوو عوسمانی وڕان و ڕۆو ئارۆینە داعش کۆبانێ، منبج، دێرەزور، ڕەقا و شەنگالنە مەڕیا، بە هەمان جۆر دەوڵەتوو تورکیچ دماییش پەنە مێ".

'پێویسا ڕێکوزیایەکاو مافوو ئینسانی هەرمانەو وێشا بیاونا یاگێ'

ئەرەیاونایەکەو وێڕاوەبەریی شەنگالی پێسە دماییش ئاما: "ئاخرۆ ئێمە جارێوە تەر گەشمەرداو مدرامانوو سەردەمی بە ڕێز و پەنەزانیۆ یاد مکەرمێوە. هەرپاسە سڵام وەنەو مدرامانوو گەلوو عەفرینی شەهبانە مکەرمێ. ششەم ساڵیادوو ئەرەگیرکەردەی عەفرینی بەتندی شەرمەزار مکەرمێ. سەروو ئا بنەمێوە ئێمە پێسەو وێڕاوەبەریی شەنگالی داوا وەنەو ڕێکوزیایەکاو مافوو ئینسانی، هێزە میاننەتەوەییەکا و نەتەوەیۆگێرتەکا مکەرمێ، کە خاوەنداری جە هەرمانە و وەرپەرسییشا بکەرانێ. دمایی بە ئەرەگیرکەری و قڕکاریی دەوڵەتوو تورک و چەتەکاش بارانێ."

کۆنفڕانسە ڕۆنامەوانییەکە بە دروشمەکاو 'گەشمەردێ مەمرا' ، 'بژیوۆ مدرامانوو عيفرینی' دماییش ئاما