گەریلاو هەپەگەی ئۆرهان دەمیر (قەهرەمان موراد) جە ٣٠ ئەیلولوو ٢٠٢٢ ێنە جە مېڎانوو کەش و هەکاریی مەتیناینە جەجەنگەنە گەشمەرڎە بی. پرسەو گەشمەرڎە دەمیری بەشێوێوە جەماوەری سەرکریاوە. بە سەرمەشقایەتی جەمەو کولتوری پەشتیوانی و هاریکاری ئا بنەیانا کەسوکارشا جە خاکی قەڎیمەنە جە دەسدان (کاتدەر) جە مەنتیقەو جورنەڕەشی رحاینە ژمارێوە فرە بەشداریشا جە پرسەکەینە کەرد. جە تەعزیەکێنە کە جە گەڕەکەو باخچەلی ئەڤلەری بە دروشمەو "گەشمەرڎۍ مەمرا" و هەلهەلەی لوواڕاوە، جەماوەرەکە جە تەرەفوو بنەیانەو دەمیریوە خێرامایشا ۋنە کریا.

پەرلەمانتاروو دەم پارتی رحای عومەر ئۆجالان جە تەعزیەکېنە قسێش کەردۍ و واتش، "سەروو ئی خاکیۆ حەقەتینۍ هەن، جەنگێوە کە چنڎین ساڵێن بەردەواما ئینا ئارانە. ژمارێوە فرە گیانشا جە دەسدان. ئێمە پېسە دەم پارتی پەی چارەسەریێوە دیموکراتیکی و ئاشتیانەی و شکۆمەندانەی حۊڵەکېما وستێنۍ گەڕ. سەروو خاکوو کوردسانینە دەسەڵات ئی حەقەتینا مەوینۆ و پەی چارەسەری هیچ حۊڵێوە مەڎۆ. ئێمە ئینایمۍ شۊنێوەنە کە ئێرش ۋەربیەنەنە و گەورەتەرین ئێش و ڕێشەکێش ئینۍ چنە. بنەیانە ئینا چۍ، سەڎان کەسۍ سەرەوەشیشا ۋنە مکەرا. ئێمە داوا مکەرمۍ ئی نادادیە دمایش پنەبۍ. تاکەی مشۊم گەنجۍ ژیۋای جە دەس بڎا؟".

پەرلەمانتار عومەر ئۆجالان سەرنجش وست سەروو گۆشەگیری سەروو رابەروو گەلوو کوردی عەبدوڵا ئۆجالانی و واتش، "ماوەو ٣٨ مانگان گۆشەگیریێوە قورس سەروو بەڕێز ئۆجالانی پەیڕەو مکریۆ. ڕاو چارەسەری یاوان بە بنبەس. ۋەر بە دیموکراسی گیریان. تا کەی ئینە بەردەوام بۆ؟ ۋەروو ئانەی سەخت تەرین ئێش چەشۆ، ئێمە ئینایمۍ چۍ. کورد مافوو ۋێشا بە شێوێوە ئازاڎ و بە کولتوروو ۋێشۆ بژیۋۆ. بڕۍ ژیۋایشا ئینا سەروو ئی جەنگەیۆ. با ڕا ۋەروودەم و چارەسەرینە بکەراوە و ئیتر ۋنی نەمجیۆ. چا شۊنێنە گۆشەگیری بۆ، جەنگیچ ئینا ئاران. جە گرڎ شۊنێوەنە هجووم مکریۆ سەروو دەسکەوتەکا کوردی. ئێمە ناچارێنمۍ ئینەی جە گرڎ شۊنێوەنە باس بکەرمۍ. ئێمە خاوەنداری جە گرڎوو بەهاکاما مکەرمۍ. ئێمە جە گرڎ شۆنێوەنە باسوو یاسای مکەرمۍ. چارەسەری جە ڕاو دماییئاردەی بە گۆشەگیری مێنە ئاراوە. ئا کەسۍ ئینۍ جەنگەنە دماجار ڕێکۍ گنا. بەڕێز ئۆجالان ئینا دلۍ گۆشەگیریینە. وەختۍ بەڕێز ئۆجالان قسۍ بکەرۆ، ڕا ۋەروودەم و چارەسەرینە مکریۊوە".