ئەنداموو مەجلیسوو پەژاکی ئامەد شاهۆ واتش: "ڕژێم بە سیاسەتوو قەنارەدای گەرەکشا بەشداریی گەلی سیستموو وێڕاوەبەری دیموکراتیکیتنە نەزۆک کەرۆ و تا مافی ڕەواو وێشدەسەبەر نەکەرۆ لوایش نەبۆ شۆنەو ئازادی و دیموكراسی و دادپەروەری و مافی سرووشتیی وێشرە".
ئەنداموو مەجلیسوو پارتوو ژیواسی ئازادوو کوردستانی (پەژاك)، ئامەد شاهۆ بەرنامەو ئی هەفتەو لاپەڕەینە ڕادوێنوو دەنگوو گەلینە دمایین فاڕیایەکاو مەنتێقەکەی و ترافیکی دیپلۆماسیی بەینوو دەوڵەتە ئەرەگیرا بەتایبەتی ئێران و و توركیا و هجوومەکێشا و ساڵڕۆو پیلانگێڵنیی میاننەتەوەیی دژ بە ڕابەر ئاپۆی هەڵمەتەو ئازادیی جەستەیی ڕابەر ئاپۆی و چارەسەروو پەرسەو کوردی و شەپۆلەو قەبارەدایەکاش ورسەنگنێ.
ئامەد شاهۆ تیشکە وزۆ سەروو سەردایەکەو ئیبراهیم ڕەئیسی پەی تورکیای و ئاماژە پانەیە مدۆ:"ئەگەر ئێران پیلانەو دژوو گەلوو کوردیوە تلیۆ و هەوڵێ پەلامارەو سەروو کوردا بدۆ، ئیتر ئا دۆخە کە ئیساتێ توركیانە هەن مشۆم ئێرانیچ چەمەڕوانییش کەرۆ. یانێ ئەگەر نیازوو ئێرانی ورگیسنای جەنگی و پشێوی بۆ زیاتەر جە تورکیایش پەنە مەکریۆ و پاڵپەشتێ پێسەو تورکیایچش مەبا، خاسترین ورچنییەی پەی ئێرانی ئانەن وا جا جەنگییە بارۆ و گێڵۆ شۆنەو چارەسەری دیموکراتیک و ئاشتییانەو پەرسەو کوردیرە".
ئەنداموو مەجلیسوو پەژاکی سەروو سیاسەتوو ئیسەو ئێرانی و ورچنییەی ئایندەو ئێرانی ماچۆ:"پەیڕەوکەردەی ورچنییەیێوە دیمۆکراتیکی جوگرافیێوە پێسەو ئێرانینە کە بە فرەڕەنگی و مۆزائیکوو گەلا ئشناسیان، بۆ بە بیشکێ دیموكراسی. بەداخۆ دەسەڵات ئا فرسەتە ئاڵتوونییەشە ناستەن. پەوکای بە دەمامکوو ورچنییەی ساختەی گەرەکشا ڕەوایەتیی بە دیكتاتۆریەت و فاشیزمی مەزهەبیی وێش بدۆ و وەختێوەنە گەل داراو وینای و سیستمێوە دیموكراتیكی و پەرەپەنەدای دیموکراسیین بە ئینسافوو ڕژێموو ئەرەگیروو ئێرانی نمازا. چا دۆخەنە کە چەمەڕوانیی ئانەیما بۆ کە دەوڵەت ددان بە مافی ڕەواو گەلارە بنیۆ مافشا بدۆ چەمەڕوانیێوە هاڵیین. چون بنەڕەتنە ماف ورگیریۆ مەبەخشییۆ. پەوکای ورچنییەی ئا مەیدانەنە کە زەروورا گەل مافوو وێش دلیشنە ورگێرۆ و مشۆم ممەیدانوو ورچنییەی بۆ بە مەیدانوو ورچنییەی دیموکراتیکی کە ئیساتێ ڕژێم ئا مەیدانەشە چەپەڵ كەردەن و هەرمانەو گەلینە کە دیموكراسییش دلێنە گەشنۆوە".
شاهۆ چا دیدارەنە سەروو شەپۆلەو قەنارەدایەکا دلێ ئێرانینە قسێ کەرۆ و ماچۆ:"شەپۆلەو قەنارەدایەکا ئینا وەختێوەنە کە وەرپەرسوو لوجنەو مافوو ئیناسنوو نەتەوە یۆگێرتەکا بە ئێرانی ئسپارییان. یانێ دەوڵەتێوە کە پاشێلوو مافوو ئینسانی هەرمانەشنە کریان بە وەرپەرسوو لوجنەو مافوو ئینسانی نەتەوە یۆگێرتەکانە، ئینە مەسخەرەکەردەین. ئا هیزێ گاڵتەشا بە ئیرادە، مافوو ئینسانی، دیموكراسی و ئازادیی مێ. وەختیوەنە گەوهەروو گلێرگەی کوردی دیمۆکراسیوازیین و دژوو قەنارەدایا. یانێ چند دیموكراسی گەشە کەرۆ، ئاندە قەنارەدای لاواز بۆ و دەرفەتوو گەشەکەردەی دیموكراسی مێ ورەرۆ. ڕژێم بە سیاسەتوو قەنارەدای گەرەکشا بەشداریی گەلی سیستەموو وێڕاوەبەریی دیمۆکراتیکینە نەزۆک کەرۆ تا مافی ڕەواو وێش دەسەبەر نەکەرۆ وەختوو گێڵایش شۆنەو ئازادی، دیموكراسی، دادپەروەری و مافی سرووشتییشرە نەبۆ".
ئامەد شاهۆ درێژەو چەمپەنەکەوتەکەیشنە نرخنای گرنگش سەروو هەڵمەتەو ئازادیی جەستەیی ڕابەر ئاپۆی و چارەسەروو پەرسەو کوردی کەردەن و مواچۆ: " حەرتاكێوە ئازادیی وێش بە ئازادیی ڕێبەر ئاپۆیۆ بەستەنۆ، یانێ بێ رابەر ئاپۆی مەتاوۆ بژیوۆ. چوون ڕابەر ئاپۆ هێزوو پەروەردەی و ڕێکوستەی گلێرگەین و ئاد نەبۆ پەروەردە وق ڕێکوستەی گلێرگەی چالاکیی گەلی نییەنێ. پەوکای خەڵک هەڵمەتەو وانایوە کتێبەکاو ڕابەر ئاپۆیشا دەس پەنە کەرد و وێشا پەروەردە کەرا. یانێ بە پەروەردەکەردەی فرسەتوو رێکوستەی خولقنا، چونکوم تا ڕێکوستەی فرەتەر بۆ زیاتەر دیموكراسی گەشە کەرۆ و چالاكیی گەلی زیاد بۆ. پانەیچە زوانوو دیكتاتۆری و ئەرەگیری كپ و لاواز کریۆ. پەی ئانەینە ڕابەر ئاپۆ بییەن بە زوانوو دیموکراسی و چالاكیی ئینسانیەتی. ئا هەڵمەتێ ئیتر کرێڵوو کریایوە گردوو قۆرتەکاو دلێ ئێرانینە، کە متاوۆن ڕێنیسانسێوە تازەتەر دلێ ئێرانی و وەرکەوتوو کوردسانینە ساز کەرۆ. بەتایبەت شۆڕشوو ژەنی، ژیوای، ئازادیی، کە بناغێوە هێقموو کۆشیایش متەرە، زەروورا سەروو ئا بناغەیوە ئا هەڵمەتێ ئەرەمەرزیۆ. ئا هەڵمەتێچە بێگومان بۆ بایسوو گەشەو دیموكراسی و بونیادنیای نەتەوەی دیموكراتیكی جوگرافیاو ئێرانینە و وەڵابییەیۆش بەرەو ئاسیا و وەرکەوتوو دلێڕاسەی".
ئەنداموو مەجلیسوو پەژاکی بە بۆنەو نزیکبییەیوە ساڵیادوو گەلەکۆمەی میاننەتەوەیی دژوو ڕابەر ئاپۆی واتەنش: " مدرامانوو ڕابەر ئاپۆی گەلەکۆمەی میاننەتەوەییش پووچەڵ کەردۆ و ئیمڕاڵییش کەرد بە یاگێ ژیوایوەی، ئیمڕاڵیینە سیستمێ تازەش نیارە و پارادیگماێوە سەردەمییانەش ئاردەنە. بەتایبەت بە مدرامانوو ڕابەر ئاپۆی هێزش بە گەلی بەخشا. مدرامانوو گەلوو كوردیچ زیاتەر گەشەش کەرد، وەروو ئانەیە زیاد جە نیم سەدەین گەلما خاوەندارێتی جە ڕابەر ئاپۆی و گەریلای کەرۆ. بە هەمان شێوە گەریلا ڕوانە بە کۆشیای وێش حەماسە خولقنۆ. ئا مدرامانە هومێد بە ئینسانیەتی بەخشۆ. ئیتر گەلوو كوردی ئینا جا بڕوێنە بەبێ رابەر ئاپۆی ژیوایش مەبۆ، پەوکای ماچا بەبێ سەرکی ژیوای مەبۆ، پەوکای گەلوو کوردی ئیتر دژوو ئا گەلەکۆمەیە چەمێش کریێنێوە و بڕوام هەنە ساڵڕۆو گەلەکۆمەکەینە خاوەندارێتی بیاوۆ قەلاپۆپە و مزانیی بە ئینسابیەتی بدریۆ".
