کوردا دەسشا بە پیرۆزکەردەو نەورۆزی کەردەن، پێسە ساڵانی، ئێساڵیچ جە ٢١و ئازارینە بە جۆش و خرۆشۆ جە ئامەڎەنە نەورۆزوو دلێڕاسەی کریۆوە، پیرۆزبایۍ گەورە ئەنجام مڎریۆ. بە نزیکبیەیۆ وەختوو هۊرچنیەکا ٣١و ئازاری، نەورۆز بە جۆشتەر پیرۆز کریۆ.

پۍ پیرۆزکەردەی نەورۆزی جە ئامەڎەنە پارتوو دیموکراسی و یەکسانی گەلا (دەم پارتی)، پارتوو هەرێمە دیموکراتیکەکا، کۆنگرەو گلێرگەو دیموکراتیکی و تەڤگەروو ژەنا ئازاڎیی ئینۍ دلۍ کۊمیتەو ئاماڎەکارینە. نەورۆزوو ئامەڎیی بە دروشمەو "هۊربێزدۍ وەختوو ئازاڎیی و سەرکۊتەیا" جە ٢١و ئازارینە جە پارکوو نەورۆزینە جە ئامەڎ کریۆ.

چا بارۆ سەرۆکەو کۆمیتەو ئاماڎەکاری پنار ساکیک تەکینە پۍ ئاژانسوو هەواڵوو فوراتی (ANF)ی قسێشکەردە ئاماژەش پانەی دا، گرڎوو ئاماڎەکارییەکا تەمامۍ بیێنۍ. بە تامەزرۊییۆ نەورۆزی پیرۆز کەرمۍ. حەرپاسە سەرنجش وست سەروو مەعناو نەورۆزی پۍ کوردا، بە تایبەت پۍ ماڕای گۆشەگیری سەروو ڕابەروو گەلوو کوردی عەبدوڵا ئۆجالانی، پێویسا بە تامەزرۊییۆ جە مێڎانەکا نەورۆزینە ئاماڎێبێنۍ.

بیمۍ بە دەنگوو ئاشتی و ئازاڎیی

تەکینە باسش چانەی کەرد جە ئامەڎەنە بە ژیۋگەو هۊرچنیەکاوە نەورۆزی بەجۆش تەر کەرمۍ و واتش: "مزاندۍ ئێساڵ ۋێما پۍ هۊرچنیەی ئاماڎەکەردەن. نەورۆز پۍ گرڎوو گەلا و بەتایبەت گەلوو کوردی هۊرگیروو مەعنێوە تایبەتیا. نەورۆز ماناو تازەبیەیۆ و مدرامانیا. بە دروشمەو "هۊربێزدۍ وەخت وەختوو ئازاڎیی و سەرکۊتەیا" نەورۆزی پیرۆز کەرمۍ. پۍ ماڕای گۆشەگیری سەروو گرڎوو گەلی و بەتایبەت گۆشەگیری ئیمراڵی، پەنواز کەرۆ بە تاسەو تامەزرۆییۆ جە مێڎانەکا نەورۆزینە بیمۍ. پۍ ئانەی بیمۍ بە دەنگوو ئاشتی و ئازاڎیی مشۊم جە مێڎانەکا نەورۆزینە بیمۍ."

پێوەرە کۊشیای گەورەتەر کەرمۍ

تەکین باسش چا ئاماڎەکارییا کەرد کە پۍ نەورۆزیشا کەردێنۍ و واتش: "سەرەڕاو کاندیدەکاما، پەرلەمانتارا، هامسەرۆکا شارەکا و مەنتیقەکا و ڕاوەبەرا پارتی جە مێڎانەکا نەورۆزینە ئاماڎۍ بیمۍ.گرڎ ئاماڎەکاریێوەما تەمام کەردەن، ئاماڎێنمۍ پۍ ئانەی نەورۆزێوە گۆرە چنی گەلەکەیما کەرمۍ. پێسە دەم  پارتی هۊرگیروو پارادایمێوەنمۍ کە گرڎوو گلێرگەی جە ۋێش گێرۆ. جە وڵاتێوەنە پۍ ئانەی کۆمارێوە دیموکراتیک بنیاڎ بنریۆ، ئێمە ئینایمۍ مێڎانەکانە؛ بەیدۍ پێوەرە کۊشیای گەورەتەر کەرمۍ، ئێروو نەورۆزی گەشکەرمۍ. بەیدۍ پێوەرە ئێروو نەورۆزی کەرمێوە."