نەجدەت ئاتالای واتەواچو کۆمیتەو سویسراو ئازادی پەی عەبدوڵا ئۆجالانی واتش، " کۆڵنەنە جوابو سڵامەکەو ڕابەر ئاپۆی بڎەیمێوە. چڼە قەوەتۍ بیمۍ ئانڼە دەسو ڕابەر ئاپۆی قەوەت مکەرمۍ."
سیاسەتمەدارو کوردی، هامکات واتەواچو کۆمیتەو سویسراو ئازادی پەی عەبدوڵا ئۆجالانی، نەجدەت ئاتالای پەی ئاژانسیما قسێش کەردۍ و باسش جە گرنگی ڕاپیماو ١٦و تشرینو دووەمو کۆڵنی کەرڎ و واتش: "پەی مەیسەرکەردەی داواو ئازادی گرڎما کۆڵنەنە گلێرۍ بیمێوە."
نەجدەت ئاتالای ئاماژەش پانەی کەرڎ کە گرڎ کارێوە مکەرا پەی بەشداریکەردەیۍ قەوەتی جە ڕاپیماکەینە و واتش، "باوەڕیما بە سەرکۆتەین. گەلوو کوردی مافی ڕەواو ۋێشا هەوڵو سەرکۆتەی بڎۆ و سەریج گنۆ، مزانمۍ ئی ئەرەکۆشایە قوربانیێوە فرەش گەرەکا بەڵام مافو ۋێمانە و چەمێما جەیانەو کەسی تەری نیا. داواو ئانەی مکەرمۍ کە چنەما هۆرگیریان. گەرەکمانە واچمۍ؛ بە کلتوور و بەهاکاو ۋێماوە بە ئازادی جە وڵاتو ۋێمانە بژیومۍ."
گەلو سویسرای کۆڵنەنە ئاماڎۍ با
ئاتالای باسش چانەی کەرڎ جە سویسرانە گلێرۆبیەیۍ فرۍ ئەنجام مڎا، سەردای یانا مکەرا و چەمپنەکۆتەی چنی ئەرەمەرزیاو دۆسەکاشا مکەرا و واتش، "وەڵاکریاوۍ پەی داواو بەشداربیەی جە ڕاپیماو ١٦و تشرینو دووەمی جە گرڎو سنوقەکا پۆستەینە نریێنێرە. هەرپاسە ترۆمبێلۍ ئاماڎۍ کریێنۍ پەی بەشداربیا و لوای پەی کۆڵنی. ئیساتۍ قۆناغێوە فرە گرنگەنە پەی گەلوو کوردی و چەمەڕێنمۍ گرڎ کەسۍ ۋەرپرسیاری هۆرگێرۆ و بەشدارۍ ڕاپیماکەی با. بە پەیلواو ئێمە جە سویسراوە بەشداریێوە فراوان جە کۆڵنەنە مەبۆ."
پەی قەوەتکەردەی دەسو ڕابەر ئاپۆی
ئاتالای دەسنیشانشکەرڎ بەشداری قەوەتو ڕاپیمای کۆڵنی، ئاڼنەی تەر دەسو ڕابەر ئاپۆی هێقم مکەرۆ و واتش، "گەلوو کوردی عەیامێن ماچۆ موخاتەبو کێشەکا کوردی پەی ئەرەنیشتەی ڕابەر ئاپۆن. پۊکەی بە ڕاپیمای کۆڵنی تەئکید مکەرمێوە کە ڕابەر ئاپۆ موخاتەبمانە. پەی قەوەتکەردەی دەسو ڕابەر ئاپۆی مشۆم کۆڵنەنە هەوڵوێسما نیشانە بڎەیمۍ." ئاتالای سەرنجش وست سەرو پەیامەکەو ڕابەر ئاپۆی و جەختش کەرڎۆ چانەی کە پەی جوابدایۆو ئا پەیامیە پەنەوازا داوا جە گرڎ کەسێ بکەرمۍ جە گلێرۆبیەو کۆڵنینە ئاماڎۍ با. ئاماژەش پانەیچ دا چڼە جە کۆڵنەنە قەوەتۍ با ئانڼە دەسو ڕوبەر ئاپۆی قەوەت مکەرا.
