هامسەرۊکەو گەنجا و وەرزشوو هەرێموو فوراتی ئاڤاشین مستۊ ئەرەیاوناش، کە ئازاڎیی جەستەیی عەبدوڵڵا ئۊجالانی مسۊگەر کەرا و داواش جە گرڎ کەسێوە کەرڎە هاگاداری جە هەڵمەتەو 'ئازاڎی پەی عەبدوڵڵا ئۊجالان'ی کەرا.
ڕۊو ١٠و تشرینوو یوەمی جە ٧٤ ناوەنداو سەرانسەروو جیهانیوە هەڵمەتەو "ئازاڎی پەی ڕابەر ئاپۊی و چارەسەرێوە سیاسی پەی پەرسەو کورڎ"ی دەسش پەنە کەرڎ. گەنجاو هەرێموو فوراتیچ چی هەڵمەتێنە بەشدارۍ بیۍ.
ئاڤاشین مستۊ هامسەرۊکەو گەنجا و وەرزشوو هەرێموو فوراتی سەبارەت بە بەشداریی گەنجا جە هەڵمەتەکێنە قسێش پەی ئاژانسوو ئانەفەی کەرڎۍ.
ئاڤاشین مستۊ ئەوەڵوو قسەکاشنە واتش:" ڕابەر ئاپۊ ماچۊ، ئێمە جە گەنجیوە دەسما پەنە کەرڎ و بە گەنجی سەرۍ گنمۍ.' ئی قسۍ هێزێوەن پەی ئانەیە ئێمە جە ڕووەو جەستەییوە ڕابەرەکەیما ئازاڎ کەرمۍ. ڕابەر ئاپۊ تەنیا ڕابەروو نەتەوەو کورڎی نییا، بەڵکوم ڕابەروو هەرنەتەوێوەن، کە ئینا چێروو ستەمگەری و دەسەڵاتدارینە، پەی شناسنامەو ئینسانیەتی و بۊ بنیاتنیای گلێرگێوە ئەخلاقی، سیاسی و ژیواێوە تازەی بنیاتنیایش دژوو ستەمکارا ڕابەرایەتیما دەسش کەرڎ بە کۊشیای، ئێمەیچ پێسە گەنجاو هەرێموو فوراتی، بەشداریما جە هەڵمەتەو ئازاڎیی جەستەیی ڕابەر ئاپۊینە کەرڎ و چا بوارەنە دەسما بە کۊشیای کەرڎەن."
ئاڤاشین مستۊواتش، پێویسا هاگاداریی زیاتەروو ڕابەروو گەلوو کورڎی عەبدوڵڵا ئۊجالانی کەرمۍ و درێژەش بە قسەکاش دا واتش:" ڕابەر ئاپۊ پەی بنیاتنیای ڕایۍ ڕاسۍ و ڕزگارکەرڎەی گلێرگەی چنگەو قڕکەرڎەینە کۊشیاێوە بێوێنەش کەرڎەن، ئا هەنۍ کە تاریخەنە نامۍ کۊیلەیش وەنە نریێنە، سەیەو ڕابەر ئاپۊینە ڕاسیی وێشش پەی بەرکەوت، ڕابەر ئاپۊ دژوو سیستموو دەسەڵاتداری، شارستانیەتوو تاتەسالاری و عەقڵیەتوو پیاسالاریی دەسەڵاتداری، سیستم و ئاڵترناتیفش پەی ژەنا خۊڵقنا.
ئاڤاشین مستۊ ئاماژەش پانەیە کەرڎ، که هەرمانەی سەرەکییەو ژەنا پەشتیوانیی ڕابەرەکەیشانە و واتس:"هه زاران ژەنۍ و گەل بەشداریی ئی ڕاسییەیشا کەرڎەن و وێشا چنگەو دەسەڵاتینە نەجات دان و ڕێبازی دروسوو دیموکراتیکی، ئازاڎ و کۊمەڵایەتییشا پەسەند کەرڎەن. تەنانەت بنەو گۊشەگیریێوە ڕەهاینە، ڕابەر ئاپۊ کۊشیاێوە بێهامتاش پەی بنیاتنیای گلێرگەی ئەخلاقی و سیاسی کەرڎەن."
ئاڤاشین مستۊ هامسەرۊکەو گەنجا و وەرزشوو هەرێموو فوراتی سەرنجەش وستە سەروو قسەکاو ڕابەروو گەلوو کورڎی عەبدوڵڵا ئۊجالانی، کە ماچۊ 'گەنجۍ متاوا سەرمەشقایەتیی شۊڕشی کەرا' پێسە دماییش بە وتارەکەیش ئارڎ:" نموونە شۊڕشوو وەرنیشتین، کە بە سەرمەشقایەتیی گەنجا و ژەنا دەسش پەنە کرڎ، دەوڵەتە سەرمایەدار و دەسەڵاتدارەکۍ بەرڎەوام واچێنۍ ژەنی مەتاوا گلێرگەنە بەشدارۍ با. وەلۍ ژەنەو کورڎی سەیەو ڕابەر ئاپۊینە ئانەش پێچەوانە کەرڎۊ. حەتا ئازاڎیی جەستەیی ڕابەر ئاپۊی مسۊگەر نەبۊ، ئێمە بەرڎەوام وێگێری کەرمۍ.
