پارتو ژیای ئازاڎیی کورڎسان (پەژاک)ی و گلېرگەو ژەنا ئازاڎیی ۋەرکەوتوو کورڎسانی (کەژار)ی جە خوڵقېوەنە چېرو نامونیشانو "بە رۊحو مدرامانو گەشمەرڎا ٩و ئایاری تا یاوای بە سەرکۊتەی پەشتیوانی جە ئاخېزو ژەنۍ، ژیای، ئازاڎیی کەرمۍ" ئاماژەشا بە سیاسەتو جە داردای جە لایەنو دۊڵەتو ئێرانیوە کەرڎەن پېسە یۊ جە ئامرازەکا سەرکوتکەرڎەی و چا چوارچێوەنە جە داردای چوار شۊڕشگێڵا کورڎی و ئەنڎامۍ پەژاکی؛ حەریۊ جە "شیرینە عەلەمهولی، فەرزاد کەمانگەر، عەلی حەیدەریان و فەرهاد وەکیلی" و چالاکێوە تەر بە نامۍ "مەهدی ئیسلامیان" جە ٩و ئایارو ٢٠١٠ی ۋیرئاورڎەنۊ و ئەرەیاۋنانش: "ئا کرڎەوە وەحشیانۍ کۊمارو ئیسلامی ئێرانی نەتەنیا نەتاوانش ڕا جە وەڵېوەلوای ئامانجو گەشمەرڎا ٩و ئایاری گېرۊ، بەڵکم ئارۊ ئاکامو کۊشیای هەڤاڵاما جە دوۋە تۊو فەلسەفە و دروشمەو "ژەنۍ، ژیای، ئازاڎیی"نە بیەن بە هێزێوە گۊرە و تەنگش بە کۊمارو ئیسلامی ئێرانی ھورچنیەن".

حەر جە درێژەنە ئەرەیاونانشا: "پەی بەرزڕاگېرتەو یاڎو گەشمەرڎا ٩و ئایاری و شەرمەسارکەرڎەو سیاسەتو جە داردای و ھەرمانە نا مرۊڤانەکا کۊمارو ئیسلامی ئێرانی، حەرپاسە پەشتیوانی جە ئاخېزو "ژەنۍ، ژیای، ئازاڎیی" جە دلېنەو کورڎسانی و ئێرانی و پۍ بەرزکەرڎەیۊ دەنگو گرڎو ئازاڎیوازا سەرھورڎای جە دژوو دەسەڵاتی"، پېسە پەژاکی و کەژاری رۊو ٦و مانگەو ئایاری جە شارو برۊکسێل و پایتەختو بەلژیکای چالاکیېۋە جە نەوعو ڕاپیمای و گلېرۊبیەی ڕاوەبەر کەرا.

داوایچشا جە گرڎ لایەنە ئازاڎیوازەکا کەرڎەن بە رەنگە و هێماو ۋێشاوە بەشڎاری چی ڕاپیماینە کەرا و چالاکیی جە دژوو سیاسەتو جە داردای و ھاموەخت پۍ پەشتیوانی جە ئاخېزو "ژەنۍ، ژیای، ئازاڎیی" ھېقم تەر کەرا.

وەخت:

٦-٥-٢٠٢٣

سەعاڎ ١٣:٠٠-١٧:٠٠

شۊنی:

بروکسێل لە Monument leopold II ,place de trône بەرەو Place de schuman

هـ . ش