ئەڏایا شەنگالی کە بەشداری مەراسیمو چەک سۆچناو گەریلای بیێ، سڵامشا جە هەڵوێسو گەریلایەکا کەرد، ئەرەیاوناشا پی هەڵوێسەیە گەریلا دەرفەت پەی ئاشتی و گلێرگە و دیموکراتیکی خوڵقنۆ، دمای بە ونمەتی و جەنگی مێ و داواشا جە دۆڵەتو تورکیای کەرد هەنگامە بنیۆ.
مەراسیمو گەریلاکا 'گرووپو ئاشتی و گلێرگە و دیموکراتیک' ی کە جە ١١و تەمموزی شارو سلێمانینە، چەکەکێشا سۆچنێ و پی جۆرە دەرفەت پەی پڕۆسەو 'ئاشتی و گلێرگە و دیموکراتیک'ی کەردۆ، جە شەنگالیشەنە دەنگش داوە. دما و مەراسیمەکەی جەلایەنو فرە و مییانەکا لواشۆنیش پەی کریا. دلێ ئا بەشداربییانە پێسە و شاندێوە جە شەنگالەنە لواڕاوە، ئەندامێ وێڕاوەبەرا شەنگالی و تەڤگەرو ئازادی ژەنا ئێزدی (تاژێ) بێنێ.
ئی هەنگامێ چنی وێش ئاشتی مارۆنە
جە بەشداربیەکا مەراسیمەکەی، شەمێ ڕەمۆ ئەندامە و کوردیناسیۆنو تاژێ، ئەرەیاوناش، پێسە و خەڵکو شەنگالی، بە سۆچنا و ئا چەکا "خەمبار" ێ بییەیمێ، چونکە ئا چەکێ جە سەردەمو فەرمانەکەینە ئێمەش جە دەسو چەتەکا داعشینە ڕزگار کەرد.
شەمێ ڕەمۆوە ئاماژەش پانەی دا کە جە لێوەتەرۆ دڵوەشێنمێ کە پی هەنگامێ پەشتیوانی جە بانگەوازییەکەو ڕابەر ئاپۆی پەی ئاشتی و گلێرگە و دیموکراتیکی و دمای ئاردەی بە ونمتەی و کوشتەی کریا. شەمێ ڕەمۆوە واتش: "ئێمە ئینایمێ جا بڕوێنە کە ئی هەنگامێ بۆنە مەڵامەتوو ئاشتی، یەکسانی و واڵە و برایەتی گەلا."
شەمێ ڕەمۆوە جە دڕێژەو قسەکاشەنە ئەرەیاوناش کە هیوامانە کە ئی هەنگامێ تا دمای بەردەوام بۆنە و واتش: "ئانەی کۆت سەر و شانو ڕابەر ئاپۆی و پەکەکەی جابەجێ کریا، ئیسە کاتو ئانەین دۆڵەت هەنگامەی ڕۆشنە بنیۆ تا ئی هەنگامێ مسۆگەر کریۆنە."
شەمێ ڕەمۆوە ئاماژەش بە پەیامە ڤیدیۆییەکەو ڕابەر ئاپۆی کەرد و واتش: "هەر کاتێ باسو ڕابەر ئاپۆیما کەردێ، تەنیا زینان و گۆشەگیری ئێ وەرو چەماما. بەڵام کاتێ پەیامەکە وەڵاکریاوە گرڏ چێوێ بە شێوەی وەرچەم فارییا و پرۆسێوە تازە دەسش پنەکەرد. سەرەڕاو ئانەی دڵما فرە وەش بێ بەوینایش بەڵام پەنەوازا جە ڕووە و جەسەییۆ ئازاد بۆنە و تاوۆنە بەئازادیی پرۆسەکەی بەرەو وەڵێ بەرۆ."
گەریلێکێ یاگێ وێشا دڵو گلێرگە و ئێزدینە کەردەنۆ
ئەندامە و کوردیناسیۆنو تاژێ، نیعام بەدەلە، کە جە مەراسیمەکەنە بەشدارە بیێنە، لواپەی وێش پی جۆرە گێڵناوە: "سەرەتا سڵام و ڕێزو وێم ئاراسە و گرڏ و ئا کەسا مکەرو کە جە مەراسیمەکەنە بەشدارێ بێنی. بەتایبەت پەی ئەڏایا و گەریلاکا. مەراسیمەکە پەی ئێمە پێسە و ئەڏایا شەنگالی هەم وەشی و هەم خەمگین بێ. فرە و ئا گەریلایا کە چەکەکێشا دلێنە بەردێ، ساڵە و ٢٠١٤نە بە هاوارو شەنگالیۆ ئامێبێنێ و شەنگال و هەزاران گەلوو ئێمەشا جەکۆمکوژی ڕزگار کەردەبێ."
نیعام بەدەلە ئاماژەش پانەی دا، جە مەراسیمەکەنە فرە خەز کەرێنا ئی هەستەمە بێ ئەرەیاوناش: "گەرەکم بێ جە نزیکۆ گەریلاکا وینو و جەئامێزشا گێر، چونکە جە ساڵە و ٢٠١٤نە ئارێ ڕزگارشا کەردیمێ."
جە بەردەوامی قسەکاشەنە نیعام بەدەلە ئەرەیاوناش: "گەریلاکێ فرەیشا سەر و خاکو شەنگالینە زامڏارێ بیێ. داخەم مەشۆ بە مەڵامەتوو بارودۆخو ئەمنی نەتاواما فرە نزیکێ بیمێ، ئێمە هەدییەما جە شەنگالۆ ئاردەبێشا، بەڵام نەتاواما هەدییەکاشا ڕاستەوخۆ پێشکەش بکەرمێ، هەتا کۆتایی هیواو سەرکۆتەیشا پەی وازمێ و پنەشا ماچمێ کە شمە ئینایدێ دڵو گرڏ تاکێوە گلێرگە و ئێزدینە یاگێتا هەنە، گەلوو ئیزدیی هەرگیز یاڏتا مەکەرۆ و نمازۆ جەیاڏکریەیتێ."
ئانەی پەنەواز بێ کریا، ئیسە نۆرەو دۆڵەتییا
نیعام بەدەلە جە کۆتاینە ئەرەیاوناش کە ئانەی کۆت ئەستۆو رابەر ئاپۆی و پەکەکەی ئەنجامدریا و واتش: "کاتێ ڕابەر ئاپۆ بانگەوازش کەرد، هەنگام بە هەنگام تا ئیسە بانگەوازییەکەش جابەجێ کریان، جە هەنگامەی یوەمەنە کۆنگرە بەسیا و ئێربەستەی تاکلایەنە ئەرەیاویا. ئا کاتەی ئێربەستەی ئەرەیاویا بێ، بەڵام دۆڵەتو تورکی بە گرڏ و هێزیشۆ بەردەوام بێ جە هرووژمەکاش پەی سەر و هەرێمەکا پارێزناو مەدیای. دما هەنگامە دلێنەبەردە و چەکەکا بێ جەلایەن و ٣٠ گەریلایاوە، پێسە و پەشتیوانی و بەهێزکەردە و دەسو ڕابەر ئاپۆی. ئیتر چیسەولای دۆڵەت پەنەوازا هەنگامەی جدیە بیۆ، بەتایبەتی پەنەوازا ڕابەر ئاپۆ و گرڏ و زینانە سیاسیەکا ئازادێ کریا."
