هەپەگە-نەڕەچە بە ڕێز و شکۆوە یاڎو کادرا سەرمەشقې پەکەکەی و قارەمانا ڕۊچې مەردەی ١٤ تەمووزیش کەرڎۆ و جەختش کەرڎۆ بە عالتەرین شێوە بانې بە یاگەگیرې ڕێشا. هەپەگە-نەڕەچە ئاماژەش بە بەردەوامی هرووژمەکا سوپاو تورکی کەرڎ سەرو گەریلای.
هەپەگە-نەڕەچە بە ئەرەیاۋنێوە جە ٤٣ ساڵەو ساڵوەگەڕو مڎرامانوو ڕۊچې مەردەی گۆرې ١٤و تەممووزینە یاڎو قارەمانا ١٤و تەممووزیش کەرڎۆ، هەرپاسە دەسنیشانش کەردەن سەرەڕاو ئایېربەسو پەکەکەی و مردنای جەنگی چەکڎاری، هرووژمەکې سوپاو تورکی سەرو هەرێمەکاو گەریلای بە گرڎ ئامرازێوە دلېنەبەردەی بەردەواما.
پەیامو هەپەگە-نەڕەچەی پەی یاڎو مڎرامانوو ١٤و تەممووزی پی جۊرەنە:
"بە ڕێز و شکۆوە یاڎو مڎرامانوو ١٤و تەممووزی و کادرا سەرمەشقې پەکەکەی، هەمڕایاما محەمەد خەیری دوورمووش، کەماڵ پیر، عەکیف یڵماز و عەلی چیچەکی جە ٤٣ـەمین ساڵوەگەڕو چالاکییە تاریخیەکەیشانە مکەرمېوە. مڎرامانوو ١٤و تەممووزی کە دژو فشارو ملکەچبیەی و ئەشکەنجەی نامرۆڤایەتییانەی جە زینانو ئامەدی بە هۆشمەندیێوە شۆڕشگێڵنی و باوەڕبەوې بیەیې گۊرۆ دەسشپنەکریا، ڕاو مڎرامانوو پارتو پەکەکەیماش نیشانە دا.
ئی ڕۊحیەتو مڎرامانیە سەلەمناش جە دژو گرڎ جۆرە فشار، ئەشکەنجە و هرووژمەکا دژ بە هێڵۊو ئاپۆچییەکا، تەنیا بەڎەنیچ مەنەبۆ ۋێڕاگری مکەرۆ و پی مڎرامانەیۆ سەر گنۆ. ڕوحو مڎرامانوو ١٤و تەممووزی کە بە فیداکاریوە ئاڵاو ئەوەکۊشایش یاۋنا بە بەرزتەرین ئاست، جە ٤٢ ساڵی ۋېیەردەنە هێڵۊو ئەوەکۊشایش نەخشنا و بی بە گۊرەتەرین سەرچەمەو هێزی کە قەرار و مڎرامانش پنە بەخشایمې. هەپەگەیچ ۋەرتەرین هێزو فیداکاری ئی هێڵێنە. ئەرەیاۋنمېش پېسە چنی تا ئیسە ئەنجام دریان و جە ئیساتێچ بەدماوە سەرو ڕاو فیدایی ئاپۆیی بەردەوامې بیمې، بە عالتەرین شێوە ئا فیداکارییە جابەجێ بکەرمې و نوێنەرایەتیش بکەرمې. سەرو ئی بنەمایە ڕۊو شکۆو نەتەوەیی گەلوو کوردی پیرۆز مکەرمې."
هرووژمەکې دۆڵەتو تورکی درێژەشا هەن
هەپەگە-نەڕەچە دەربارەو هرووژمەکا دۆڵەتو تورکی ئی زانیاریێشە وەڵې کەردێوە:
"سەرەڕاو ئایېربەسو پەکەکەی و قەرارەکا مردنای ئەوەکۊشای چەکڎاری، هرووژمەکا سوپاو تورکی ئەرەگیری سەرو گەریلای درێژەشا هەن. هێزەکېما جە ١و ئاداریوە تاوەکوو ١و تەممووزی، تاکو هرووژمێوە بە ئامانجو دلېنەبەردەی بەکاربۍ، هیچ چالاکیێوەش ئەنجام نەڎان.
درۆن، فڕۆکەی بێفڕۆکەوانی جەنگی و سیخووڕی سەرو هەرێمەکاو پارېزنای مەدیایرە خولیاوە. پېسە ئانەی وەڵتەریچ ئەرەیاۋنابێما؛ هەر هەرمانێوە سیخوڕیکەردەی و کەشف ئامادەکارییا پەی هرووژمېوە.
جە هەرێمەکاو گەشمەرڎە دەلیلی جە ۋەرنیشتوو زاپی، مەتینا و خواکوڕک، هەرمانەکې وەشکەردەی جاڎەی سەروازی و بنکە و بارەگای ئەرەگیری درێژەش هەن.
هرووژمەکې پەی سەرو کۆو مەڕۍ و سەنگەرې هێزەکاما بە گرڎیی و بە تایبەتی سەرو مەڕەکاما جە مېڎانوو مڎرامانوو دەرگەلێی جە هەرێمو مەتینای درێژەشا هەن. بە دیاریکریای جە دژو مەڕەکا گەشمەرڎە غەمگینو دەرگەلێ ٤ جارې بە تەقەمەنی بەهێز، ٤ جارې بە گازی کیمیاویی و ٥ جارې بە شۆفڵ و حەفارە هرووژم کریان.
سەرو هەرێمەکاو زاپ، مەتینا، خواکوڕک و گارەی هرووژمەکې بە تۆپ، چەکی قورس و هاوەنې درێژەشا هەن. جە ما بەینو ٢٧و حوزەیرانی و ١٣و تەممووزینە ٢٢٤٣ هرووژمې کریێنې سەرو ئی هەرێماما.
زاپ و مەتینانە ئەرەگیرا داواو تەسلیمبیەی جە هێزەکاما مکەرا. ئی بانگەوازە جە ڕوو جەنگی دەروونی هرووژمی ئەرەگیریوە کە تاوەکو ئیساتې درێژەش هەن کۊششێوە بێئیسفاڎەن. بەڵام مەشۆم ئانە بزانیۆ بانگەوازو تەسلیمبیەی بێ شکۆی جە دژو گەریلاکا ئازادی کوردەسانی کە درێژەپنەدەرې ڕاو مڎرامانو ١٤و تەممووزینې، هەوڵدای و دژمنایەتیێوە قورسا.
هرووژمەکې سوپاو تورکی
- ٤ و ٥ و تەممووزی جە هەرێمو مەتینای، مەڕەکېما جە مېڎانوو مڎرامانوو دەرگەلێ ٤ جارې بە تەقەمەنی بەهێز بۆمبواران کریې.
- ٥ و ٦ـ و تەممووزی جە هەرێمو مەتینای، مەڕەکېما جە مېڎانوو مڎرامانوو دەرگەلێ ٤ جارې بە گازی تیژی هەڵسمچ و گازی کیمیاویی جۆربەجۆر بۆمبواران کریې.
- جە ما بەینو ٢٩و حوزەیرانی و٥ و تەممووزینە جە هەرێمو مەتینای ٥ جارې هەوڵدریا بە ئامێرەکاو وڵکەردەی و حەفارەی مەڕەکاما جە هەرێمو مڎرامانوو دەرگەلێ وڕنانە.
- ٥ و ١٠و تەممووزی جە هەرێمو مەتینای، مەڕەکېما جە مېڎانوو مڎرامانوو دەرگەلێ و دێشیلی ٣ جارې بە درۆنی بەبۆمچنیا بۆمبواران کریې.
- جە ما بەینو ٢٧و حوزەیران و ١٣و تەممووزینە جە هەرێمو مەتینای، مېڎانوو مڎرامانوو بێشیلی، دەرگەلێ و سەری مەتینای ٩٨١ جارې بە چەکی قورس، تۆپې و هاوەنې بۆمبواران کریې.
- جە ما بەینو ٢٧و حوزەیرانی و ١٣و تەممووزینە جە هەرێمو گەشمەرڎە دەلیلی جە ۋەرنیشتوو زاپی، مېڎانەکې مڎرامانوو ئامێدی، کەشو وەهاری و سەرگەلێ ٦٠٢ جارې بە چەکی قورس، تۆپې و هاوەنې بۊمبواران کریې.
- جە ما بەینو ٢٧و حوزەیرانی و ١٣و تەممووزینە جە هەرێمو گارەی، مېڎانەکې کەشو زەنگل، دێڕەشی، کانی سارکێ، گووزێ، زێڤکێ، سێدارە، دەشتەو کافیای، سپیندارێ، یەكماڵ، مژێ، گرگاشێ، تەپو ڕەشیدی ٥٤٥ جارې بە چەکی قورس، تۆپې و هاوەنې بۊمبواران کریێنې.
- جە ما بەینو ٢٧و حوزەیرانی و ١٣و تەممووزینە جە هەرێمو خواکوڕکی، مېڎانەکې مڎرامانوو بەری زینێ و سنین ١١٥ جارې بە چەکی قورس، تۆپې و هاوەنې بۊمبواران کریێنې."
