ملەملانەکێ جە پانیشتوو سووریاینە ئینێ زیاڏبییەینە. لێوە سەروازێ ئیسرائیلیێ لوێنێ چن بەشێ جیاواز جە ناوچەو قونەیتەریەی و لێوەتەرۆ جە ناوچە و تەسیلو وەرنیشتوو دەرعای، دژو گێڵایۆ چەتەکا داعشی وینیشاندای ئەنجامدریا.

بەپا و سەرچەمە خۆجێیەکا، هێزێوە سوپاو ئیسرائیلی سەر سەعبو ئارۆی لوێنێ دلێ داگاو عەین زیوانی پانیشتوو شارەکەی، هەرپاسە جە تل ئەحمەری وەرنیشتی تەقەکریان. مەڵامەتوو تەقەکەردەکەیش هەڵای ئاشکرا نەکریان. هێزێوە تەر و ئیسرائیلی لوا ناوچەو عەین ئەل بەیزاو پانیشتی و خاڵێوە وشگنا و کاتیشا وەڵێ کیشیایۆ نیارە.

هیزی جە دەگا و بەریقا و بیر ئەجەمی بەمەڵامەتوو گولـلەواران و هێزەکا ئیسرائیلیۆ پەی سەر و زەمینە کشتوکاڵییەکا ئێرێوە گۆرە کەوتۆ و ڕووبەرێوە گۆرەش جە دارستان و کەشەکا سۆچنا. جە وەراوەرو ئانەینە جە لایەنو ڕەسمی سووریایۆ هیچ جوابێ نەدریانۆ.

وینیشاندای دژو گێڵایۆ چەتەکا داعشی

دەرعا بە دەیان کەسێ شارۆچکەکەو تەسیلی جە دژو گێڵایۆ چەتەکا داعشی وینیشاندایشا ئەنجامدا و ئەرەیاوناشا کە بییە و چەتەکا هەڕەشێوە ئەمنییەنە، بەتایبەتی بەشێوەشا کە لوێنێ دلێ ئەرەمەزییە ئەمنییەکا حکومەتو کاتی سووریای.

لێوەتەرۆ ڕوانگەو سوری پەی مافەکا مرۆڤی (سۆهر) ئەرەیاوناش کە جە ٢٤ سەعاتا ویەردەینە جە ناوچەکا چێرو کۆنترۆڵو حکومەتو کاتی سووریاینە ١٦ کەسێ بەمەڵامەتو تاوانە و تاکەکەسی، هرووژمی چەکداری و تەقایۆ ئەڵغامی گیانشا جەدەسدان.