سەرو بانگەوازو ڕابەر ئاپۆی گەریلاکاو ئازادیی کوردەسانی هەنگامېوە تاریخیەشا نیا. ۋەر بەرەو مەڕەو جاسەنەینە جە ناوچەو ڕاپەڕینو پانیشتوو کوردەسانی مەراسیمێوە شکۆدارشا ڕاوەبەر کەرڎ. من هېزی وردەکارییەکې مەراسیمەکەیم نویستێبێنې. بەڵام دماو ئانەی مەراسیمەکە دمایش ئاما، جۆشوخرۆشو ۋێم و چن هەمڕێوە ڕۆنامەوانیم زیاڎش کەرڎ. گێڵنایۆ ئی جۆشوخرۆشەیە زەحمەتا، بەڵام جارێوەتەر گەرەکما وەڵاش بکەرووە.

چێوە گران قیمەتەکێشا دماو ۋێشا جیا ئاستې

دماو دمایئامای مەراسیمەکەی، دڵوەشې بێنمې پانەی کە داواکاریەکێما پەی ئا چەمپنەکۊتەی کە ڕوې وەڵې مەراسیمەکەینە ئەرەیاۋنابێما، بەڵێشا پەی کریان. بەشداراو مەراسیمەکەی وردە وردە وەڵاوې باوە. جە ڕووخسارو گرڎ لایێنە خەمباریێوە درکش پنە کریې، ئا قیمەتې کە گەرەکشا بې گێراش ئامێز و چنی ۋێشا بەراش، دماو ۋێشا جیاش ئازێنې و گێڵێنێوە.

بێگومان بڕې توڕەییچ بې، ۋەرو ئانەی حیچ هەنگامېوە یاسایی نەنریێنە، ئەر نریێبیې، تاوێنې گرڎ پېوەرە گێڵاوە نیشتیمان. ئا کەسې بەشدارې مەراسیمەکەی بێنې مۆڕاڵێوە گۊرەشا بې، ۋەروئانەی پەنەوازش بە کار و ۋەرپرسیاری هەن کە ڕا پەی زەمینێوە دیموکراتیکی وەشبکەرا. گرووپو ئاشتی و گلېرگەی دیموکراتیک بانگەوازشا پەی لایەنە کۆمەڵایەتییەکا کەردەبۍ کە زیاتەر خاوەنداری جە پڕۆسەکەی بکەرا. ۋەروئانەی پەنەوازا دەمودەس گێڵاوە و هەرمانە بکەرا. بەڵام خەمباری سەرو مېیاچەمایشا ۋەرو چەماوە گوم نمەبۆ.

داواکاریی چەمپنەکەوتەی قبووڵکریا، چنی گەریلای چمپنەکەوتەی مکەرمێ

بارودۆخو من بڕێ جیاوازا. جە ماوێوە کەمەن گفتوگۆ چنی ئا گەریلایا مکەرمێ کە چەکەکێشا سۆچنێنێ. جۆشوخرۆشێوە فرە دڵمش ئەرەگیر کەردەن. تەنانەت، دڵو وێمەنە گەرەکما خێرا جەماوەری مەراسیمەکەی بڵاوەش ونە کەرمێ. ئا ساتەوەختەی کە ڕوانێ چەمەڕا بێنا، ئاما. بەڵام بارودۆخی ناجێگیری هەنووکەیش مەبۆنە وەرچەم نەگیریۆ. مەزانو چی، بەڵام بەڕاو من یەکینەکێ ئاساییشو یەنەکەی کە ئاگادارو بارودۆخەکەی بێنێ، ڕاوچای فرەشا گێرتەنەرە وەر. سەرەڕاو ئانەی کە ڕاوچای پەنەوازا گیریانەوەر، ئاساییشو یەنەکەی هەوڵمرۆ ئێمە جە ناوچەکەی دوور وزۆوە. نەک تەنها من، ئەرەیاونا مییاننەتەوەییەکێشا ڕووبەڕوو هەمان بارودۆخی بیێنی.

شنس یاوەرما بێ کە بارودۆخەکە فرە درێژەش نەکێشا، دماو ئاماو وەرپرسا کەجەکەی ئێمە جە ماوێوە کەمەنە یاوایمێ یاگێ گونجیای. بەڵام دماو ماوێوە کوڵی، جارێوە تەر گرژی وەش بی. تەنانەت ئی دۆخە چن جارێ واوەی بییۆ.

ڕۆنامەوانێ تەرێ کە هەستشا کەرد ئێمە ملمێ دلێ گەریلاکا، گەرەکشا بێ چنیما بەیا. هەڵبەت مافو وێشانە، دما و مەراسیمێوە چی جۆرەی حەر ڕۆنامەوانێوە بەپەرۆشۆ کە سەرنجو گەریلای هورگێرۆنە و گەرەکشا ئار یوەم کەس بۆنە کە مایکەکەی وزۆنە وەردەمشا. بەڵام چار نەبێ، وەرو ئانەی هێزەکا ئاساییشی ڕازی نەبیێ، ناچارێ بیێیمێ یاگەگێ جیا بازمێ.

جە باوشی کەردەی قەدەغەن!

ئێمە و چوار ئەرەیاونێ جیاوازێ، مردایمێ. زاناما کە تەنها ١٠ گەریلێ مەناوە پەی چەمپنەکەوتەی. دما و وەڵابییەیۆ قەرەباڵغییەکەی، ٢٠ گەریلێ بەشێوەو گرووپی چوار پەنچ کەسی یاگەکێشا جیا ئاستە. حەر گەریلێوە کە مێڏانەکەی جیا ئاسێ بە سەردەخەنەی گەرم و سڵامکەردەی ماڵئاوایی کەردێ. جە گرووپو دووەمو ئا گەریلایا کە مێڏانەکەشا جیا ئاست، چەمم بە شیار دەرسیمی کۆت. نزیک بییۆ و پرسایرەش کەردە؛ 'ئۆو هەڤاڵ بارش وەشەنی؟' من وەڵتەر نەوینابێم، ویرم کەردۆ چنین منش ئەشناسانی، واتش، 'ئێمە تەماشەتا مکەرمێ، هیواو سەرکۆتەیتا پەی وازو'. یەکتریما گێرت ئامێز. چا کاتەنە ئەفسەرێوە ئاساییش ئاما بەینما: 'قەدەغەن!' فرە دڵگران بییانی. مەیاونە چی. میت، تەسەکە و گرڏ و مێمانەکا لوێ، ئیتر ئینە چی؟ بەڵام گەرەکم ژەبێ بابەتەکەی گۆرە بکەرو، ئا مۆڵەتا دمای پنە بارو کە ئیسە پنەما دریا بێ. دما و ماڵئاوایی بە دەنگێوە نزم، ئا گرووپەش مێڏانەکەش جیا ئاست.

مێڏانەکە بە تەمامەتی چۆڵکریا و ٢٠ گەریلێ بە ڕاوچای ئەمنی مێڏانەکەشا جیا ئاست. دماتەر ڕۆنامەوانێ بەرەو کەشەکا لوێ.

هەرپاسە سەرنجم سەر و تێبینییەکام بێ، خەریکو ئامادەکەردە و ڕاپۆرتەکێ بێنا، پەشتیمۆ، گۆشم جە دەنگو ئا وەرپرسە بێ کە واچێ 'سەرە و ANF'ین. دەمو دەس هورستا، چەمەکێم و چەمێ هەڤاڵە کامێرامانەکەیم وەریۆی کەوتێ و جە ماوەو چن چرکێوەنە کەوتیمێ جوڵە کەردەی. وەڵتەر بە پلیکانەو گەریلاکارە ویەردیمێ، بەرەو سەر لوایمێ. کاتێ بە ویرکەردەیۆ لوێنا تێبینی ئانەیم نەکەرد، بەڵام دماتەر یاوانینە پلەو گەرمای ٤٥ پلەن، جە بەیانییۆ جوڵە کەردەینە بێنمێ و بە نزیکەو ٢٠ کیلۆ کەرەستێ تەکنیکییێ بە پلیکانەکانەکارە بەرەو سەر لوایمێ، بەڵام کولانە تەرین هەستو مانیای نەبێ، تەنانەت جۆش و خرۆشما یاوبێ لوتکە.

'بێدەنگبە'

دما و چن هەنگامێ تەر، وەڵێ ئانەی یاومێنە دەروازەو ئەشکەوتەکەی، سەرنجم وست سەر و ڕۆنامەنوویسێوە لاو چەپیمۆ. وەڵێ ئاری بەسی هۆزاتەم وینا کە بەزەحمەت تاوێنا وینوش بە مەڵامەتو لق و پۆیەکا دارەکەیۆ. بەمەڵامەتو دووریشۆ گۆشم جە دەنگیش نەبی، بەڵام گرڏ چێوێ جە ڕاو ئاماژەیۆ وچیێ. هەڤاڵە کامێرامانەکەم بە ئاماژە دەسش وست سەر و دەمیش و واتش 'بێدەنگبە' و بەردەوامێ بییەیمێ. دما و چن هەنگامێوەتەر وینام گەریلێ وەردەمو مەڕەکێنە مردێبێنێ.

'مەڕەکێ خاوەن پارێزنێوە سروشتییەنە'

مەڕەکێ ئینا بەینو دووێ بەڕی گۆرەینە بەرزییەکەش نزیکەو ٧٠-٨٠ مەترا بۆنە، خاوەن پارێزنێوە سروشتییا. کاتێ بە پلیکانەکارە سەرگنی، جە لای ڕاسۆ بەرێوە هەن بەرزییەکە١٠-١٥ مەترا و پانییەکەش ٣-٤ مەترێ فراوان بۆنە. پەی دلێ تەسک بۆوە. وەردەمو مەڕەکێنە ناوچێوە کوڵانە هەن، چن گەریلێوە سەرو کورسی پلاستیکی چەرمە نیشتێنێرە. دلێ مەڕەکێنە ٤-٥ گەریلێ ڕووبەڕوو یەکتری نشتینێرە.

'ئەرەیاونای ئازاد ئامان'

کاتێ لوایمێ مێڏانەکە، گرڏ هورئێستێ. بەهزاد چارچەڵ واتش 'ئەرەیاونای ئازاد ئامان'. سڵامشا جە گرڏی کەرد، هیواو سەرکۆتەیشا وازا. منیش دەمودەس ئا سڵامەم یاونا کە بە درێژایی ڕێکێ هورم گێرتەبێ. فرە بە گەرمی پێشوازیما چنە کریا. چا کاتەنە یۆ بە یۆ سڵاما جە گەریلاکا دلێ مەڕەکێ کەرد. دەموودەس پەرساشا مەڕاسیمەکە چنین بێ. مەڕاسیمەکە چن پەی ئێمە یاگێ تامەزۆری بێ، پەی ئاریشا زیاتەر بە جۆش و خرۆش به، پێشبینی کەردە و ئینەی سەخت نییا.

قسەکەردەی فرە قورسا، بەڵام چەمو هەر گەریلێوەنە ئیرادە و متمانە وێبییەی گۆرە هەن.

فرە خاس مزانا چێش مکەرا، گەرەکشانە چێش بکەرا. هەمیشە ماچانە کە ئامادێنمێ پەی هەر ئەگەرێوە. ڕەنگە پێسە و دروشمێوە بەر گنۆ، بەڵام گرڏ جموجوڵێوەشا کاریگەر بێ.

فرەش پنە نەشی هەڤاڵە کامێرامانەکەم دەسش بە ئامادەکارییە تەکنیکییەکا کەرد. من و مێمانەکێم جە گرووپو ئاشتی و گلێرگە و دیموکراتیکی، تێکۆشین ئۆزان و بەهزاد چارچەڵ جە دەروازەو مەڕەکێ لوایمێ دلێ ئا بەشەی کە پەی چەمەپنەکەوتەی ئامادەکریا بێ. ڕاس وەردەمەنە نیشتێرە، پاڵو یەکتری. گرڏ و سەرنجەکام چڕ مکەروە و چەمپنەکەوتەکەی دەس پنە کەرو. من مەلو دلێ وردەکاریی چەمپنەکەوتەکەی، چونکە کاتێ ئینەی نوسێنا وەڵابییەبێوە.

'جە چەمەکاشەنە هەڵوێسی بێ دووە دڵی سەید ڕەزای بې'

دماو چەمپنەکۊتەکەی لوایمې دلې مەڕەکې. کاتێ قسې کەرێنمې، بەسێ هۆزاتە کە تازە چەمپنەکۊتەکەیش دمایش پنە ئامابې ئاڎەیچ ئاما. بە زەردەخەنۆ ئاما چووەر و واتش 'خێرئامای هەڤاڵ باریش' و باوشیما کەردە یۆیرە. جە کاتو مەراسیمەکەینە، یۆ جە هەڤاڵە ڕۆنامەنوویسەکام کاتێ بەسې هۆزاتەش دیێبې، واتەبێش 'جە چەمەکاشەنە هەڵوێسی بێ دووە دڵی سەید ڕەزای هەن'. ئا قسێشە ئامێوە یاڎم. بە ڕاسی پاسە بې، سەرەش نەنامنانەرە.

هەر بژیودې

بەسێ هوزاتە بە دڵوەشیێوە فرۆ پا سڵاما چنەش کریێنې، داواش چنەکەردیمې سڵام و وەشەسیایی ئاڎیچې بیاونمې. هەرپاسە یووەم پرسیارەو ئاڎې ئانې بې کە مەراسیمەکە چنینا. کۊششم کەرڎ وێنەکاو مەراسیمەکەیش نیشانە دەو کە تازە جە مۆبایلەکەمەنە وەڵام کەردێبێنێوە. ئینتەرنێت خاس نەبې و چا ساتەنە کە بەسێ هوزاتە وەرۆ مردا و گرڎو گەریلاکایچ پېوەرە پەشتیشۆ بێنې، وێنەکە بەرکۊت، واتش: "هەڤاڵا فرە بە دیسیپلین ئامێبێنې یاگەکې، هەر بژیوا." پرسیارەم ۋنە کەردە دەربارەو پەیلوایش سەرو ئی هەنگامې چێشا؟ واتش: "هەنگامېوە سیاسیەما هۊرگێرتە. ئەر حکومەت هەنگامێوە نەنیۆ بەردەوام نمەبۆ، ئێمە خاوەن ئیرادەنمې." ئاماژەش پەنەیچ کەرڎ، کە دەوڵەت باخچەلی دەسش بە پرۆسەکەی کەردەن و وا تش: "حکومەت یاوان ئی خاڵې، مەترسییە پێشئامایەکې ناوچەکەیش درک پنەکەردێنې". جە وەختو گفتوگۆیې گەرمینە، ڕۆنامەنوویسێک ئاما و چەمپنەکۊتەیش چنی بەسێ هوزاتې دەس پنەکەرڎ. ۋەردەمو مەڕەکێنە چنی گەریلاکا درێژەما بە گفتوگۆکا دا. گرڎ جە جۆشو خرۆشو مەراسیمەکەینە ئامێبێنې جبەر و باس چا هەرمانا کەرێنې کە پەنەوازا پەی بنیاڎنیای گلېرگێوە دیموکراتیکی بکریا.

گەریلاکې بە باوەڕۆ چەکشا هۊرگێرتەن

دەخەم نمەشۆ کات کەما و کاتێوە فرە زیاتەر پەنەوازا پەی ئانەی زیاتەر بیاوانە، بەڵام ۋەرپەرسێوە باسش چانەیە کەرڎ کە ئاڎې ناوچەکەی چۆڵ مکەرا و پەنەوازا ڕۆنامەوانا بلانە جبەر. ئیسە عالتەر چا کەسا مېیاوونە کە کوچې زووتەر ناوچەکەشا جیائاستەن. ئا گەریلې چەکەکێشا سۆچنێنې، بە باوەڕ بە ئاشتی، دیموکراسی، ئازادی و سۆسیالیزم چەکشا هۊرگێرتەن. بەڵام مەشۆم جیاشا بازمې و جیې بیمێوە. جە نەبیەی هەنگامەی یاسایی و مافی ناڕەحەتەنا. خاسا، کاتو ویرکەردەیۆ چی چێوایچە نیا، کاتو خواحافیزیکەردەیا!

'دیدارێوە جە پڕێنە'

کاتێ یۆ بە یۆ خوا حافیزی جە گەریلاکا کەرێنا، چەمم کۊت سەرو گەریلێوە جوانی. جە کاتێنە هەوڵ دێنا یاڎم بێوە، پەرساش: هەڤاڵ بارش، ساڵۊو ٢٠١٢ ئامابێنی پەی شارو ئامەدی؟" بەڵێ ئیساتې مێوە یاڎم ئەدهەم! کاتێ ڕۆنامې بەخشێناوە فرەو وەختی ئێنا پەی ئامەدی. جە یۆ چا سەفەرانە ڕاکێم چنی ئەدهەمی ۋېیەرنۍ بې. فرە نەفاریا بۍ، بەڵام بە جلې گەریلایۆ نەشناسێناشۆ. کاتێ ئەوەکۊشای جە چوارچێوێوە دیموکراتیکەنە جە بەین شیەبې، قەرارشدابې بۆ بە گەریلا. ئیساتې سەرمەشقێوەیچا جە ئەوەکۊشای دیموکراتیکی و ئاشتینە بە وینایش فرە کەیف وەش بێنا.

'لوولې کڵاشینکۆفەکا دلې ئېرینە سوورە بیێبێوە'

کات تەمام بۆ، ئەشۆ بلمې. ئیساتې هەنگامەکې ۋەردەمیما گۊرەتەرې با. ئێمە گەرەکما نیا بلمې. گرڎما جە باوشی گێرتې. بەسێ هۆزاتە واتش: "هۊشتا وێتاوە بۆ، ئێمە مەشۆم هەرمانې فرې بکەرمې، شمەیچ مەشۊم هەرمانە بکەردې، نمەبۆ ڕابەرایەتیما تەنیا جیابازمې." ئێمەش ڕوانې کەردیمې، سڵام و وەشەسیایش بە گرڎ لێوەما یاونا و جە یۆی جیێبیەیمې! چنی سەرکۊتەیما سەرو پلەکانەکارە، هومێڎێوە فرەما بې. هەست مکەرو سەرو هێڵە باریکەکې بەینو کەشی و دەشتەکې ملو. کاتێ هەنگامەکێم دمایشا ئاما، چەمم کۊت سەرو شۆڵەچراوەو ئێرەکەی کە چەکەکێشا چنە سۆچنابۍ. لوولې کڵاشینکۆفێوە سۆتې دلې ئێرینە سوورە بیێبێوە، بەڵام ئی جارە بەمەڵامەتوو ئا گوللـێوە سوورە نەبیێبێوە کە ئاڕاسەو دوژمنی کریۆ، بەمەڵامەتو ژیۋایێوە تازەی، ئەوەکۊشای و ئاشتیۆ سوورە بیێبێوە....