لە ماوەی ڕۆژانی ڕابردوودا شەش هاولاتی لە ناوچەکانی دێولان، بۆکان، پیرانشار و مهاباد لەلایەن هێزە ئەمنییەکانەوە دەستگیر کراون و بێسەروشوێنکراون. هێشتا هیچ زانیارییەک دەربارەی هۆکاری دەستگیرکردنەکەیان و ئەو شوێنەی بۆی براون بڵاونەکراوەتەوە.
بەگوێرەی ئەو زانیاریانەی بڵاوکراوەتەوە لەلایەن سەرچاوەکانی مافی مرۆڤەوە، لەماوەی سێ ڕۆژی ڕابردوودا شەش هاووڵاتی خەڵکی ڕۆژهەڵاتی کوردستان لەلایەن هێزە ئەمنییەکانەوە دەستگیرکراون. ئەم دەستگیرکردنانە لە ناوچەکانی دێولان، بۆکان، پیرانشار و مهاباد ئەنجامدراون و تاوەکو ئێستا هیچ زانیارییەک لەسەر چارەنووس و هۆکاری دەستگیرکردنی ئەم کەسانە بەردەست نییە.
چوار هاووڵاتی بەناوەکانی فریا چاوشینی، محمدالـلە ڕەزایی، ئیسماعیل چوکڵی و زەبیر محمودی لە بەرواری ١٩ بۆ ٢١ـی حوزەیران لەلایەن هێزە ئەمنییەکانەوە دەستگیرکراون. سێ کەسیان لە شارەکانی بۆکان و دێولان، یەک کەسیان لە پیرانشار دەستگیرکراون.
هەروەها ڕۆژی هەینی ٢٠ـی حوزەیران، دوو هاووڵاتی تر بەناوەکانی کامەران ڕوازی ٢٨ ساڵە و سەڵاح بەهمینی ٣٧ ساڵەی خەڵکی مهاباد، بەبێ دەرچوونی هیچ فەرمانێکی دادوەری لەلایەن هێزە ئەمنییەکانەوە دەستگیرکراون و بێسەروشوێنکراون.
تاوەکو ئەم ساتە هیچ زانیارییەکی فەرمی سەبارەت بە شوێنی مانەوە و ئەو تۆمەتانەی کە ئەم کەسانەی پێ تۆمەتبار کراوە بڵاونەکراوەتەوە. سەرچاوە خۆجێیەکان سەبارەت بە زیادبوونی دەستگیرکردن بەبێ فەرمانی دادوەری و ناڕوونی بارودۆخی یاسایی دەستگیرکراوان نیگەرانیان دەربڕی
