ئەرەیاونا و کۆمیتەو ڕاوەبەرا جمیەرە و شۆڕشو یۆگێرتە و گەلا (هەبەدەهە)ی، قارەمانا زینانو ڕۆچێ مەردەیشا یاڏئارڏیمێوە. هەبەدەهە ئەرەیاوناش؛ مڏرامان و ١٤و تەمموزی نیشانێ شکۆو ئەوەکۆشاین جە دژو چەوەسنایۆ.

جە ئەرەیاوناکەینە ئاماژە پانەی کریان کە قارەمانا زینانو پەکەکەی جە زینانو ئامەدی جە ١٤و تەمووزو ١٩٨٢ جە دژو کودەتاو فاشیستی ١٢و ئەیلولی، مڏرامانێ تاریخی بێ و ئەرەیاوناش کە کەمال پیر، م.خەیری دورموش، عاکیف یڵماز و عەلی چیچەک جە دژو دیکتاتۆرو فاشیستی، جەدژو خەیانەت و تەسلیمیەتی، جەسە و وێشا کەرد سەنگەر، مڏرامانشا کەردە و گەشمەرڏێ بیێ.

هەبەدەهە ئەرەیاوناش: "جە وەراوەرو ئەشکەنجەی و هرووژمی بە چۆکئاردەی دیکتاتۆرو فاشیستی، ١٤و تەمموزی جە هەمان کاتەنە مڏرامانا جە دژو ئا جینۆسایدەیە و ئا چەوەسنایا کە سەر و گەلوو کوردینە سەپیا بێ.

مڏرامان و ١٤و تەمموزی ١٩٨٢جە دژو ئەرەگیری و فاشیزمی هێزێوە فرەش بە ئەوەکۆشای بییە و نەتەوەیی و ئازادی گەلوو کوردی بەخشا.

خاوەنداری جە ئیرادە و ڕۆحو مڏرامانو ١٤و تەمموزی ئارۆیش جە ئەوەکۆشای و مڏرامان جە دژو فاشیزمی و چەوەسنایەکا نیشانە مرۆ."

جە ئەرەیاوناکە و هەبەدەهەینە گیانبەختکریایا ڕۆچێ مەردەی و مانگێرتەی نادیارو ٢٠و ئایاری ١٩٩٦ی ئایگون ئوغور، حسێن دەمیرجئۆغڵو، ئایچە ئیدل ئەرکمەن، عەلی ئایات، موژدەت یانات، حەیات جان، ئاڵتان بەردان کرمگلەر، تەحسین یڵماز، عوسمان ئاکگیون، ئولاش حیجاب کوچوک، ئلگچ ئۆزکەسکن و یەملها کایا بەڕێزدارت یاڏوستیمێ.

هەبەدەهە ئەرەیاوناش کە گەشمەرڏەبییە و ١٢شۆڕشگێڵا نەریتێوە گرنگو مڏرامان و خەباتش جە ئەوەکۆشای ئازادی و سۆسیالیزمینە خوڵقنان.

جە کۆتای ئەرەیاوناکەینە بانگەواز جە کرێکارا، جوانا، ژەنا، وەڵکەوتێ تورکیای و سەرنیشتوو کوردەسانی کریا کە ئەوەکۆشای شۆڕشگێڵی دژ بە فاشیزمی گەشە پنەدانە، بانە دەنگو زینانیا سیاسی و پەی چارەسەرکەردە و نەوەشی زینانیا جە مەرجێوە ئینسانینە ئەوەکۆشای بەرز بکەراوە و ئەوەپەرسای جە فاشیزمی بکەرا، پەی ئی مەبەسەیە یۆبییە و ڕێکوزتەی بنیات بنیا.