بە بۆنەی ٤٣هەمین ساڵیادی بەرخۆدانی ١٤ی تەمموزی محەمەد خەیری دورموش، کەمال پیر، عەلی چیچەک و عاکێف یەڵماز، ئەمڕۆ ئەنجوومەنی بنەماڵەی شەهیدان و گەنجانی شۆڕشگێری کانتۆنی فورات، دامودەزگاکانی ئیدارەی خۆبەڕێوەبەری لە ناوەندی کەلتوور و هونەری باقی خدۆی کۆبانێ مەڕاسیمێکی بە بیرهێنانەوەیان ئەنجام دا.

مەڕاسیمەکە بە خولەکێک ڕێزگرتن لە شەهیدانی ئازادی کوردستان دەستیپێکرد و پاشان حەسەن کۆبانێ شەهیدانی بەرخۆدانی بە بیرهێنایەوە و گوتی: "بە چالاکییەکەی محەمەد خەیری دورموش، کەمال پیر، عەلی چیچەک و عاکێف یەڵماز بەرخۆدانێکی مێژوویی ئەنجام درا."

لە دوای قسەکان شانۆیەک لە لایەن ناوەندی کەلتوور و هونەری باقی خدۆوە پێشکەشکرا و هەروەها بەڵگەفیلمێک لەسەر بەرخۆدانی زیندانی ئامەد نیشان درا.

پاشان مۆم لە پێش وێنەی شەهیدان داگیرسێنرا و لە لایەن ئەندامانی گەنجانی شۆرشگێڕەوە دیاری بەسەر بنەماڵەکاندا دابەشکرا.