لەزگین بۆتان چا بارۆ چنی ئاژانسوو هەواڵوو فوراتی قسێش کەردۍ و واتش: "فکر و فەلسەفەو ڕابەر ئاپۆی عالتەرین مۆدێلا پەی چارەسەری کێشەکاو تورکیای و ۋەرکۊتوو مېیامینی."

'پەی فاڕیای دیموکراتیکی جە ۋەرکۊتوو مېیامینینە تەنیا ئەڵتەرناتیڤا'

لەزگین بۆتان ئەرەیاۋناش: "ڕابەر ئاپۆ جەخت چانەی مکەرۊوە کە پێکئامایە فرە چەشنیەکۍ ناوچەکەی تەنیا سەرو بنەمێوە دیموکراتیکی متاوا بەردەوامی بە ژیۋای بڎا، ئی ئەنەیاوایە سیاسییە تەنیا ئەڵتەرناتیڤا پەی کێشەکاو سیستەمو دەوڵەت نەتەوەی."

لەزگین بۆتان ئانەیچش یاڎ وستۆ کە ئا سەرنجەی کە ڕابەر ئاپۆ جە نەورۆزو ئامەدو ٢٠١٣ینە پێشکەشش کەرد، جە لایەنو دۆڵەتو تورکیوە ڕاش ۋنە گیریا، و واتش: "دۆڵەتو تورکیای جە ساڵۊو ٢٠١٥ ینە جەنگش دەسپنەکەردۆ و چا کاتۆن تنوتیژی زیاڎش کەردەن. چا ماوەنە ١٥ شارۍ کاولۍ کریۍ، خەڵکی مەدەنی کۆمکوژ کریۍ. جەنگ جە سەرنیشتوو کوردەسانینە گرڎ لێوەرە وەڵا بیۆ، عەفرین و هەرێمەکۍ تەرو ۋەرنیشتی ئەرەگیرۍ کریۍ. ئینەیچ کارەساتش چنە کۊتۆ. جە پانیشتوو کوردەسانینە چەکی کیمیاویی دژ بە گەریلای بەکار بریا، گرڎ ئامراز و میتۆدێوە بەکار بریا، سەرەڕاو ئانەیچ گەلوو کوردی مڎرامانی گۊرەش ڕاوەبەر کەرد. جە هەلومەرجو ئیسەینە تەنیا چارەسەری گرڎو کێشەکا فکر و فەلسەفەو ئێژا ئۆجالانیا."

'ئەر چارەسەری دیموکراتیک پەسەن کریابیۍ، ۋەر بە وڕایەکا گێرۍ'

لەزگین بۆتان ئاماژەش پانەیچ کەرڎ کە ڕابەر ئاپۆ جە ساڵەکا ٢٠٠٠یوە وەڵۍ وینایش بۍ کە ناوچەکە بە خێرایی ڕووبەڕوو وڕای و کاولکاری بۆوە، چا کاتەنە ئینەش بەربڕیەن و جە هەمان کاتەنە هۆشداریش دان و واتش: "ئی وەڵۍ وینایە بە جەنگەکا ئیساتۍ پەشڕاس بۆوە. ئەر مۆدێلو چارەسەری دیموکراتیکی ئێژا ئۆجالانی کە پێشنیارش کەردەبۍ جابەجێ کریابیۍ، ئانە ڕا چی کاولکارییە گۊرا ۋەرکۊتوو مېیامینی و سوریای گێرۍ."

'ئەر دۆڵەت چارەسەریش گەرەکا، مشۊم گرڎو وەربەسەکا هۆرگێرۆ'

لەزگین بۆتان ئاماژەش پانەیچ کەرڎ، سیستەمو دیموکراتیکی، فره کولتووری و فرە زوانی به سەرمەشقایەتی کوردی جە ۋەرنیشتەنە بنیات نریان، ئینە ئانەی نیشانە مڎۆ کە مۆدێلێوە مومکین و گونجیان، بەڵام تورکیا هەوڵمڎۆ مۆدێلو چەوەسنایۆ و ناوەندیی ۋێش سەرو سوریایرە سەپنۆ، که ئا ڕێبازەیچە قبوڵکریا نییا .

بۆتان جە درێژەو قسەکاشەنە واتش: "تورکیا نمەتاوۆ دۆڵەتێوە چارەنوویس ساز بۆ جە ۋەرکۊتوو مېیامینینە ، دەسەڵاتو سەرەکی ناوچەکەی ئیسرائیل و وڵاتا ۋەرنیشتینۍ کە پەشتیوانیش چنە مکەرا، مڎرامانوو گەلوو کوردی سیاسەتو فاشیستیانەو تورکیایش پووچ کەردەنۆ. ئا کوردۍ ۋێشا سەرو فەلسەفەو ئێژا ئۆجالانی ڕێکوستەن، بە مۆدێلێوە مرۆڤدۆسانە، چنی گرڎو پێکئامایەکا پێوەرە ژیۋایشا خوڵقنان، پا جۊرە ڕێبازو نکۆڵی و فاشیستی تورکیایشا جە سوریا و ۋەرکۊتوو مېیامینینە پووچ کەردەنۆ."

'هەتا ئازادی ڕابەر ئاپۆی مسۆگەر نەکریۆ، ئاشتی بەدی نمۍ'

لەزگین بۆتان ئاماژەش پانەی دا کە دیدارەکۍ ئی دماییە چنی ڕابەر ئاپۆی دەرفەتێوە گۆرەش پەی گرڎ لێوە ڕەخسنان و واتش: "ئی دیدارۍ متاوا هەنگامێوە گرنگۍ با پەی دیموکراتیزەکەردەی تورکیای، هەرپاسە پەی لاوازکەردەی ڕژێمو فاشیستی و پەی ئەرەمەرزنای سیستەمێوە ئازادی و دیموکراتیکی پەی گەلا."

بۆتان ئەرەیاۋناش کە دۆڵەتو تورکیای مشۆم هەوڵەکا وەڵتەریش مردنۆ، پەنەوازا مۆدێلو چارەسەری دیموکراتیکی ئێژا ئۆجالانی بەبنەما گێرۆنە هەتا پرۆسەکە بەرەو وەڵۍ بلۆ، بەتایبەت پەنەوازا ئێژا ئۆجالان ئازاد بکریۆ. بە بەکارئاردەی مافو هیوای، لادای وەربەسەکا پەی ئێژا ئۆجالانی فرە پەنەوازا. ئەر داواو دیموکراسی و ئاشتی مکریۆ، مشۆم دەرز جە ملەملانەکا ۋەرکۊتوو مېیامینی هۆرگیریۆ و مۆدێلو چارەسەری ئێژا ئۆجالانی وزیۆنە بوارو جابەجێ کەردەیۆ، پەی ئینەیچ مشۆم ئێژا ئۆجالان ئازاڎ بکریۆ و بتاوۆ چنی گرڎ چین و توێژێوە گلێرگەی کۆبۆوە."