ئاژەی نادیارو دووۍ هاموڵاتیۍ باڵبەس کریایا کوردی
دووۍ هاموڵاتیۍ کوردۍ ۋەرکۊتوو کوردەسانی خەڵکو شارەکا نەغەدەی و مەریوانی کە جە لایەنو هێزە ئەمنییەکا ئێرانیوە باڵبەسۍ کریێنۍ. هەڵای حیچ زانیاریێوە سەرو ئاژەیشا دیار نییا.
بە پاو گوزارشتەکا ئاماژە بە باڵبەسکەردەی دووۍ هاموڵاتیا جە شارە جیاوازەکا ۋەرکۊتوو کوردەسانینە مکریۆ.
بە پاو ئا گوزارشتا، ڕۆو دووەشەممەی٢٠/١/٢٠٢٥، پەروین ئەدواییە، چالاکەو مافەکا ژەنا و زاوڵا، دماو چڕیەیش پەی ئیدارەو ئیتلاعاتو مەریوانی، دەسبەسەرەنە و پەی شۊنەمێوە نادیاری بریێنە.
یاگۍ ئاماژەیەنە پەروین ئەدواییە جە ساڵەکا ۋېیەردەینە جە بوارو مافەکا ژەنا و زاوڵانە چالاکە بیێنە و وەڵتەریچ جە ساڵۊو٢٠١٩ ینە جە لایەنو هێزە ئەمنییەکاوە دەسبەسەرە کریێبۍ، دماو ئانەی جە لایەنو دادگاو شۆڕشو مەریوانیوە بە "هەوڵدای دژ بە ئاسایشو وڵاتی و هامکاری چنی یۆ جە پارتە کوردیەکا" تۆمەتبارە کریێبۍ، سزاو ٥ساڵا زینانیش سەرەرە سەپیا. ئی سزایۍ جە لایەنو دادگاو لوایۊپۊرەو پارێزگاو کوردەسانیوە کەمکریاوە پەی ساڵێوە زینانی.
پەروین ئەدواییە سەرەڕاو ئانەی ٧ڕوێن دەسبەسەرەنە، بەڵام هیچ زانیاریێوە سەرو مەڵامەتو دەسبەسەرکەردەیشەرە، یاگێش و ئا تۆمەتۍ وزیێنۍ پاڵش دیار نییا. هەرپاسە مافو چەمپنەکۊتەیش چنی بنەیانەی و پارێزنەرەکەیش چنە قەڎەغەکریان.
ئی چالاکە مەدەنیۍ جە ساڵانی ۋېیەردەنە جە بوارەکاو مافو ژەنا، زاوڵا، و ژیوگەپارێزینە جە شارو مەریوانی چالاکە بیێنە و دەورێوە کاریگەرش بیەن.
هەرپاسە جە لێوەتەرۆ، ڕۆو شەممەی٢٥/١/٢٠٢٥، جە شارو نەغەدەینە ئەفشین مستەفاپوور، هاموڵاتیێوە تەمەن ٤٠ساڵ، دماو چڕیەیش جە لایەنو ئیدارەو ئیتلاعاتو ئا شارەیۆ، دەسبەسەر کریان و بریان پەی زینانو ئا شارەیە.
سەبارەت بە مەڵامەتو دەسبەسەرکەردەیش ئەفشین مستەفاپوور و ئا تۆمەتۍ ئاراسەش کریێنۍ، بە هەمان شێوە هیچ زانیاریێوە وەڵا نەکریانۆ.
