کۊمەڵەو مافشناسا پەی ئازادی (ئۊهەدە) داواش کەرد، دەمودەس گۊشەگیری ئیمراڵینە دماییش پەنە بۍ و داواکاری زینڎانییە سیاسییا بیاویۊ یاگۍ. هەرپاسە داواش وەنەو ڕێکوزیایەکاو داکۊکیکارو مافەکاو ئینسانی کەرڎە، نزیکۊ چەمداری مانگێرتەی زینڎانییا کەرا.
کۊمیسیۊنو زینڎانەکاو ناوەندی گردینو کۊمەڵەو مافشناسا پەی بۊ ئازادیی (ئۊهەدە) سەبارەت بە مانگێرتەی زینڎانییە سیاسییا جە چوارچوەو هەڵمەتەو "ئازادیی پەی عەبدوڵا ئۊجالانی و چارەسەری سیاسی پەی پەرسەو کوردی" کە ٢٧ی تشرینو دووەم/ نۊڤەمبریوە دەسشا پەنە کەرڎەن، وەرڎەمو بیناو کۊمەڵەکەینە رحانە کۊنفڕانسێوە رۊنامەوانینە ئەرەیاوناێوەشا واناوە. هامسەرۊکە گردینەکاو ئۊهەدەی ئەکین یەتەر و سەرحەد چاکماک و ئەنداماو کۊمەڵەکەی بەشدارییشا کۊنفڕانسە رۊنامەوانییەکەنە کەرد.
جە ڕاوەبەراوناوەندی گردینو ئۊهەدەی ئایشە شەهریبان دەمیرەلە، کۊنفڕانسە رۊنامەوانییەکەنە واتش، ڕابەرو گەلو کوردی عەبدوڵا ئۊجالان ڕۊو ١٥و شوباتو ١٩٩٩یوە، کە بە پیلانگێڵنیێوە میاننەتەوەیی دریا دەسو تورکیایۊ، گۊشەگیریینە زینڎانی کریان و واتش، "ساڵەو ٢٠١٥یوە گۊشەگیری دژوارتر کریان. ئا گۊشەگیرییە ڕەها، ئەنجامو مامەڵەی سیاسی دەسەڵاتداری ئاکەپە-مەهەپەین پەی دلێنەبەرڎەی پەرسەو کوردی. جە ٢٥و ئادارو ٢٠١٩یوە تا ئیساتۍ هیچ هەواڵ و زانیاریێوە جە بەڕێز عەبدوڵا ئۊجالانی نییا".
دەمیرەلە درێژەنە قسۍ وەزیری وەڵینی داد عەبدولحەمید گولی جە ساڵەو ٢٠١٩ وستۊ ویر، کە واتەبێش، پەی دیدارو بەینو عەبدوڵا ئۊجالانی و پارێزنەراش هیچ وەربەسێوە نەمەنەن و چا ڕووەوە ئەرەیاونا، "چوار ساڵۍ ملوو ئا قسێرە ویەرد، وەلۍ گۊشەگیریی ڕەها زینڎانو ئیمراڵیینە هەڵای بەرڎەواما. سی پی تی بەینو ٢٠-٢٩و ئەیلولو ٢٠٢٢نە سەرڎای دوورگەو ئیمراڵییش کەرد، وەلۍ بارەو ئا سەرڎایوە هیچ راپۊرتێوەش وەڵا نەکەرڎۊ. ڕاسیێوە هەن ئارانە، کە گۊشەگیریی تندکریا ئیمراڵینە کاریگەری کەرۊ سەرو زینڎانەکای تەری. مانگێرتەی جە وارڎەی کە زینڎانییە سیاسییا بە داواکاری ورگێرتەی گۊشەگیری دوورگەو ئیمراڵینە و چارەسەرکەرڎەی پەرسەو کوردی بە ڕای دیموکراتیکە و ئاشتییانۍ دەسشا پەنە کەرڎەن، جە چارەسەرکەرڎەی پەرسەو کوردینە یەکلاییکەرەون".
دەمیرەلە گۊشەگیرییش ئیمراڵینە پێسە "ئەشکەنجە"ی ئشناسا و واتش، "ئا گۊشەگیرییە دژوو پیمانە و بنەماکاو یاسایە میاننەتەوەییەکەن. مشۊم گۊشەگیری دەمودەس ورگێریۊ و داواکاریی زینڎانییە سیاسییابیاویۊ یاگۍ. نزیکۊ شۊنیرەلوای و چەمداری پەی دۊخی تەندروستی و سڵامەتیی ئا زینڎانییا کەرمۍ، کە بە پاو مافە دەستوورییەکاشا مانشا گێرتەن. چا ڕووەوە داواما جە گردوو ڕێکوزیایەکاو بوارو مافی و یاسۍ ئانەنە، کەوەرپەرسیی وێشا بیاونا یاگۍ. مشۊم دەمودەس گۊشەگیری ئیمراڵیینە ورگێریۊ و پەرسەو چارەسەرکەرڎەی پەرسەو کوردینە بە ڕاو دیموکراتیکی و ئاشتی گردوو پارتە سیاسییەکا، ڕێکوزیا مەدەنییەکا و ڕێکوزیا دیموکراتیکەکۍ، شانە بدارە وەرو بارو وەرپەرسبییەکەیشا. پێویسا داواکارییەکاو زینڎانییە سیاسییا بیاویا یاگێ".
