ئەنجوومەنوو عەرەبەکاو شەنگالی، داواش جە دەوڵەتوو عێراقی کەرڎە، کە وەراوەروو هجوومەکاو دەوڵەتوو تورکینە، سەروەریی خاکەکەیش پاریزنۊ وجەختشا کەرڎۊ کە ورە و ئیرادەشا جە گرڎ نۊعە هجوومێوە بەقوەتتەرا.
ئەنجومەنوو عەرەبەکاو شەنگالی بارەو هجوومەکاو دەولەتوو تورکیوە پەی سەروو دەگاو خەلەفوو هەرێموو بارێوە، ئەرەیاوناێوەش وەڵا کەرڎۊ.
ئەرەیاوناکەی جە راو سەرۊکوو ئەنجوومەنوو عەرەبەکاو شەنگالی، ئەبوو سەقەریوە ونیاوە.
جە ئەرەیاوناکەینە ئامان "بە نامۍ ئەنجومەنوو عەرەبەکاو دەوروبەروو شەنگالیوە هجوومەکەو سەروو شەنگالی شەرمەزار کەرمۍ. دەوڵەتوو عێراقیچ شەرمەزار کەرمۍ و پەنەشا ماچمۍ کە کە سەروەریی خاکوو وێشا پارێزنا. شمە چا دەوڵەتا نییەندۍ کە حەرکەس بۍ و خاکەکەیش گێرۊ".
سەقەر وتیچش ئا یاگۍ ئارۊ، لاو دەولەتوو تورکیوە بورڎومانە کریا، یاگێوە مەدەنییەنە و واتیچش "یووە جە دەگایەکاو خانەسۊرەی، پێسە گرڎما وینمێش، دلۍ بنەیانەکەینە هجوومەکە کریان، پا هجووما گەرەکشانە ڕا گێرا جە گێڵایۊ ئاوارەکا. ئانە هەرمانێوە سیاسییەنە، دەسوو فرەو لایەنە سیاسییاش چەنەن. وەروو ئانەی وینمۍ ئاوارەکۍ پەوپەڕوو هێزیوە گێڵاوە، پەوکای پاسە کەرا، کە ئێدۍ نەگێڵاوە".
ئەرەیاوناکەینە وچیان: "بە نامۍ خەڵکوو شەنگالیوە، بە گرڎوو پێکئامایەکاشۊ، چ عەرەب، چ کورڎ، چ ئێزدی، ئێمە پێسە بنەیانیوە سەروو ئی خاکیوە مژیومۍ. عێراقێوە وچکلەما سەروو خاکوو شەنگالیوە وەش کەرڎەن. ئێمە هومێدما هەن کە عێراقیچ شەنگالی پەی وێش کەرۊ بە نموونە".
بە نامۍ گەلوو عەرەبیوە ئێمە داوا جە ڕێکوزیایە میاننەتەوەیی و لایەنە پەیوەندیدارەکا کەرمۍ کە دەنگ بەر وزا، وەراوەروو هجوومەکاوە مرڎاوە. گرڎ جارێوە کە دەوڵەتوو تورکی پەلامارەو شەنگالی مدۊ، کەس نقەش چۊوە نمێ".
ئەنجوومەنوو عەرەبەکاو شەنگالی ویرێش وستیمێوە کە ٧٤ جارۍ ئەمرە ملوو گلێرگەو ئێزدییەکارە جابەجا کریێنە و واتش: "ئێمە ئا هجووما جە ئەمرەکا بە جیاوازتەر مەوینمۍ. جارێوە تەر بە دەوڵەتوو عێراقی ماچمۍ، کە عاسمانوو وێش ڕووەو تەیارەکاو تورکیایرە وزۊرە. ئا یاگۍ بورڎومانۍ کریێنۍ یاگۍ سەروازیۍ نییەنۍ، یاگۍ وەیکەرڎەی ئاژەڵینێ".
بە نامۍ عەرەبەکاو شەنگالیوە جارێوە تەر، هجوومەکا شەرمەزار کەرمۍ و داوا جە دەوڵەتوو عێراقی کەرمۍ سەروەریی عاسمانیش پارێزنۊ".
ئاخروو ئەرەیاوناکەیۊ ئامان، کە ئا یانە هجوومش کریان سەر، یانەو قاسم ملکۊی ئێزدین و ئەرەیاونیا کە "ئێمە پێسە عەرەبە ئەرەرنیشتەکاو مەنتێقەکەی، کە ئارۊ مەنتێقەکەما جە ڕاو تورکیایۊ بورڎومان کریا، ئەرەیاونمێش با گرڎ کەس بزانۊ، ئانە پەیامێوەن تا گەلەکەما کەمپەکانە نەگێڵۊوەک وەلۍ ئێمە ئینایمۍ چۍ و ئیرادەما جە گرڎ هجوومۍ قەوەتتەرا، گۊش جە قساو کەسی مەگێرڎۍ، لوودۍ سروو یانە و ماواو وێتا ".
س.ز
