لە ١٦وو نیسانینە سەرۊکوەزیرانوو هەرێموو باشووروو کورڎسانی، مەسرور بارزانی هەولێرنە بەشڎارییش جە وەربانگێنە کەرد و ئەرەیاونابێش: "ئێمە حەرگیز مەتاومۍ بیمۍ بە هامبەشۍ خیانەتی، گەندەڵی، تیرۊری، تۊقنای، وێرانکاری و بەکارئارڎەی خەڵکی پەی مسڵەحەتوو وێما".

مەڵبەندوو ٣ۍ هەولێروو یۊبییەی نیشمانیی کورڎسان (یەنەکە)ی، جوابوو مەسرور بارزانی-یش داوە.

ئینە ئەرەیاونیاکەن:

" دەعوەتکەراو جنڎرما خاکورەشێنێ

 خاکورەشۍ ئانێنۍ کە زیادتەر جە سەد بنکا و بارەگایا و قەرەقولی جنڎرمۍ توركیێشا ئارڎێنی حدوودوو پارێزگاکاو هەولێری و دهۊكی. خاکورەش ئانەن کە ڕاش وەشە کەرڎێنە جنڎرمۍ ڕوانە هاموەڵاتیۍ گەشمەرڎۍ کەرا،  دارستانەکایچ بڕاوە و ژیوگەو کورڎسانیچ وێران کەرا. قسۍ و ورسونیشتەکا سەرۊکوو کابینەو نۊی، جە ڕووە سیاسی و ئابووری و دیپلۊماسی و تەنانەت هەرمانە پێوەبییەیەکێچنە، هەرێموو کورڎسانییش پەی تونێلێوە تاریكی کێش کەرڎەن.

ئانە کە ئیسەتۍ هەرێمنە ڕووە مدۊ، پاشێلکەرڎەیۍ تەماموو ئاکاروو دەوڵەتڎاریی هامکێشە تیۊری و سیاسییەکایچا، پێسە ئانەی کە جە بەشێوە تەروو ئەرەیاوناکەیچنە ئامان و پەرسۊیچ، حوکمڕانە تاکڕەوەکەو هەرێمی، گرڎ وەخت وەرڎەموو بەرەو بەغڎاینە کەوتەن و مشۊم شانازیی بەچێشیوە کەرۊ؟ هەرمانەکێش، جگە جە تێکدای و ناستەی تایبەتمەندییە سیاسییەکەو هەرێموو کورڎسانی كە جە عێراقنە بێش، چێشی تەر جانتا بەتاڵەکەشنە مەنەن پەی فڕەدای؟ سەروو ئاستوو دنیێچنە، خەریکا گرڎوو دۊسە پەشتیوانەکایچ دوورۍ وزۊوە. سەروو ئاستوو دلێچنە، تەبایی و یەکڕیزییەکەیچش بەرەو خلبیییەیۊ بەرڎەن، خەریکا گرڎوو پەیوەندییەکا سفرۍ کەرۊوە.

 ئی برادەرە باروو ئابووریچنە گرڎوو سەرچەمەکاو واریاتی و قووتوو خەڵکوو کورڎسانی و مووچەو مامۊستای و پێشمەرگەی و ئاسایش و پۊلیسیش یاونان بنبەسێوە تاریك".

س.ز