ئارۆ دووە شەممە، عەلی ڕەبیعی، واچەرو فەرمی حکومەتو ئێرانی جە ئاشکراش کەرد: "وڵاتەکەش پیتنای یۆڕانیۆمیش پەی ٢٠٪ی (UF6- یورانیۆمی ٢٠٪) بەرزکەردەنەوە و جە دلێگە ئەتۆمیەکێ وڵاتیەنە دەست کریان بە پیتناکەی".
عەلی ڕەبیعی واتەنش: "چەنی دەستکەردەی بە پیتنای یۆڕانیۆمەکەی، ئاژانسو میاندەوڵەتی وزەی ئەتۆمی ئاگاردار کریانەوە و ئێران پابەندی وێش بە پیمانەکێ ئاژانسەکەی و سوربییەی پەی بەدەستوستەی وزەی ئەتۆمی مەدەنی و دوور جە بەکاربەردەی سەربازی دووپاتە کەردەنەوە".

وەڵتەر هەم  حەسەن ڕۆحانی، سەرۆککۆمار و هەم ئەنجومەنو شوراو ئیسلامی ئێرانی سەبارەت بە پیتانی یۆڕانیۆمی بە هەسی (UF6- یورانیۆمی ٢٠٪)ی ڕەزەمەندیشان نیشانە دابێ و بڕیارشان دابێ جە زووتەرین وەختەنە پیتناکەی دەست پنە بکەریۆن.
پیتنای یۆڕانیۆمەکەی، جە چوارچێوەو ئا بڕیارێ سەرۆککۆماری و پارلەمانو ئێرانی و هەر پاسە قۆڵتەربییەی ناکۆکییەکێ ئێرانی چەنی ئەمەریکای و بەقسێ وەرپەرسە ئێرانیەکان چوون ڕاکارێ پەی شکستدای بە دەورپێچەکێ سەرو وڵاتەکەیشان، ئێران جە ئاستێوی بەرزتەرەنە دەستش پنەکەردەن.

یاگۍ یادئاوەریەن کە بە پاو ڕێککەوتەی ئەتۆمی ئێرانی چەنی گرووهۊ ٥+١ی، ئێران سالانە پەیش هەۆ تەنیا ٢٠٢ کیلۆگرامێ یورانیۆم بە هەسی ٣.٧٪ی پیتنۆنە. بەڵام ئێران چەنڎین جارێ  ئا ڕێککەوتیشە پاشێل کەردەن و یۆڕانیۆمش بە هەسی ٤.٥٪ی پیتنان و ڕێژەکەش جە ٣٠٠ گیلۆگرامان تێپەڕنان.
جە ئیسەنە پیتانی یۆڕانیۆمی بەهەسی (UF6- یورانیۆمی ٢٠٪)ی پاشێلکەردەی گەورەو ئا ڕێککەوتەیەنە و ئەگەر هەن کاوەدای تونڎێ ئەمەریکا و ئاژانوسو میاندەڵەتی وزەی ئەتۆمی و گرووهۊ ٥+١یش شۆنیەرە بەیۆنە و ڕاکارێ و دەورپێچێ زیاتەرێ دژ بە ئێرانی بگیریانێنەوەر.