ئەرەنیشتاو کەمپوو پەنابەراو گەشمەرڎە ڕۊستەم جودی (مەخمور)ی سەبارەت بە کۊچیشا سەرنیشتۊ بەرەو  پانیشتوو کورڎسانی و ستەموو پەدەکەی سەروو گەلیوە، قسێشا پەی ئاژانسوو هەواڵوو فوراتی (ANF) کەرد.

شوکری نێروەهی واتش، کە ئادۍ بۊنەو ستەموو دەوڵەتوو تورکیوە ناچارۍ بیۍ دەگایەکاشا چۊڵ کەرا پێسە دوا: "ئێمە واتما ڕووە کەرمۍ پانیشتی پەی دلۍ کورڎەکا، پەی کورڎسانی. پەوکای واچێنمۍ ئانۍ شۊڕششا کەرڎەن و دلۍ عەشیرەتوو ئێمەنە بۊتاننە و سەرنیشتوو کورڎسانینە کەس نەمەنەبۍ پێسە پێشمەرگەی  چا شۊڕشەنە دا بەشدار نەبییەبۊ. پەوکای ڕووەما کەرڎە واگەی، وەلۍ بەداخۊ ئێمە سەرنیشتۊ ئامێنمۍ و چی کەمپانە ئەرەنیشتێنمێ، بەڵام ئادۍ چێششا کەرد؟ وەختۍ یەرۍ پییۍ کەمپەکەشا بێسەروشۊن کەرد. ئەرەنیشتاو کەمپەکەی قەرارشا دا  بلا و چارەنویسوو ئا کەسا پەرسا. نزیکەو ١٠٠ کەسا لوایمۍ ئاسایش. نێچیرڤان بارزانی ئاما پەی دیداری و کۊبییەیۊش کەرد.  کۊبییەیۊکەینە نێچیرڤان بارزانی قسۍ دماییش ئەوەڵۊ کەردێ. واتش، پانیشتنە کەسێوە بەروو بنەیانەو بارزانییوە سەرە جمنۊ، سەرەش پان کریۊوە. حەرگیز ئا قسێمە فکر نمەشۊ. یانۍ ئینە ڕاسیێوەن و تا ئیساتۍ ئا ڕاسییە بەرڎەواما".

'ئانە دوژمن مەکەرۊش، بنەیانەو بارزانیی ملوو کوردیرە ماراش'

شوکری بێروەهی درێژەو قسەکاشنە واتش، "یانۍ ئانە کە دوژمن مەکەرۊش ئادۍ وەراوەروو دەسکەوتەکاو کوردی کەراش. یانۍ ڕوۍ نیا کە گەلوو کوردی ڕووبەڕووۍ خیانەتیش نەباوە. ئادۍ خیانەت جە پانیشتی، وەرنیشتی و وەرکەوتی و وەختوو ورچنیەیەکانە وەنەو کورڎسانیچ کەرا. یانۍ تا ئارۊ گرد ڕوێوە هامکاریی دوژمنی کەرا. ئانە ئەقڵیەتێوە خراپا. یانۍ مشۊم گەلوو کوردی و بەتایبەتی گەلوو پانیشتی وەراوەروو ئانەینە هەڵوێستش بۊ. بڕۍ کەسایەتیۍ هەنێ، کە هەڵوێست نیشانە مدا، بەڵام بێدەنگبییەی بە ماناو دلێنەشییەی گەلوو کوردین. پەی نموونەی، با وێشا واچا، عەبدوڵاو بشار ئاغای، عەشیرەتوو مچریانی، حەمیدۍ شەریف چێششا پەی کەردێنێ؟ چندین ساڵێن یانەو وێشانە سەینێشاوە. وەختۍ داواو هامکاریی کەرێنێ، بە سەدان خەڵکۍ لوێنۍ دەمشاوە و هامکارییشا کەرێنێ. حەرگیزیچ نەواچێنۍ کە شمە کوردۍ پانیشتیندۍ نمەیمۍ دەمتاوە. یانۍ بەرڎەوام پاسە مامەڵە کەرێنۍ و گرد ڕوێوە هامکارییشا کەرێنێ. خاسا چی ئادۍ وەراوەروو زارۊڵەکاماوە هامرایەکاماوە خیانەت کەرا؟ پەی نموونەی چند ڕوۍ چۍ وەڵتەر هامرێما سەروو ڕاو وێشاوە بێنۍ لوۍ کەمینەشا پەی نیێرە، خاسا چە ئەخلاقێوە چە ئایینێوە ئانەیە قەبووڵ کەرۊ. یانۍ داواو ئێمە جە گەلوو پانیشتی ئانێنە دەمودەس پەشتیشا وەر بدانۍ و دژوو بنەیانەو  بارزانی مرداوە. حەرچوار پارچەو کورڎسانیچ دلێنە بشۊ ئا بنەیانە پەیشا گرنگ نییا. یانۍ تا دەسکەوتوو بنەیانەکەیشا بپارێزنا متاوا چەمۍ چوارپارچەو کورڎسانی ورکەنا. کە مدیەی پەی تاریخی ئیدریس بارزانی وەک پێشەنگێوە موینی. کەس نمەتاوۊن بە نەرێیی قسێش سەر کەرۊ بەڵام بە داخۊ نێچیرڤان بارزانی کوڕشا، کە تا خاوەنوو ئا ئەقڵە دماکەوتانەیە بۊ حەرگیز پێسە کوڕیش مەوینووش".

شوکری نێروەهی باسوو ماوەو زیندانیبییەیش زیندانوو پەدەکەینە کەرد و واتش، "من ساڵەو ٢٠١٥  مێرگەو شیشێنە گێڵێناوە، گێرتاشا. بۊنەو ئانەیۊ گێرام، ئاشتی کۊچەر واچۍ تۊ پەکەکەنی، تۊ لوانی دلۍ پەکەکەی. منیچ واتم ئەگەر من لوابوو دلۍ پەکەکەی یانۍ مەنسور (بارزانی)ییچ پەکەکەن. چوون ئادیچ مێرگوو شیشێنە مەنۊوە. یانۍ بە ئەقڵیەتێوە پاسنەوە مامەڵەشا چەنی کەردا. من واتم ڕاسا من پەکەکەییینا، من کوردنا.  ویرۊکەرڎەی من پەکەکەیین، جیاوازییش دلۍ کورڎەکانە مەکەروو. وەروو ئانەی ئەو ویرۊکەرڎەیە خراپە لاو ئێمەوە نیا.  ڕابەر ئاپۊیچ ئا ویرۊکەرڎەیە خراپەش فێروو ئێمە نەکەرڎەن. یانۍ ئا هۊشیارییەو ئێمە ڕابەر ئاپۊیۊ ورما گێرتەن نەتەوەیین، واڵە و برایی و ئاشتیین. ماوەو ٢٠ ڕوا منشا گێرت. ڕوۍ جارێوە ئێنۍ و ڕسمم گێرێنێ. یانۍ مامەڵەی کورڎەوارییانە پێسنەن؟ تەنانەت پەنەم واتێ، شمە کەسۍ سیخوڕۍ تەنیا پەی ڕوۍ زینداننە مەگێرۊ. پەی نموونەی ئا وەختە بڕۍ ئەندامۍ حزبوڵاو ئێرانی ئینۍ پەی لاو عێراقی و سوریای، بەڵام نەگیریێنێ. بە هەوڵەکاو پارێزنەرێوە ئشناسیاو تاتەیم ئازاڎ کریانێ. بەڵام پەنەشا واتا، کە بە مەرجوو ئانەی تۊ کورڎسانۊ، یانۍ هەولێرۊ  نەلیوە مەخمور ئازاڎت کەرمێ. ئا شەوۍ بەرەو موسڵ ڕوانەشا کەردا و ڕاو موسڵیوە لوانۍ مەخمور. یانۍ پاسە وەرشا دانێ".

'هەڕەشۍ ئەشکەنجەدای و ورەتەیشا وەنەما کەرڎە'

تەکین قەواڵی باسوو ئانەیش کەرد، کە ئەوەڵوو ساڵەو ٢٠١٨ پەی دابینکەرڎەی بژێویی وێش و بنەیانەکەیش ڕووەشا کەردێبۍ لاو شەمزینانی و واتش، "وەختۍ هەرمانەکێما تەمامیا گەرەکمابۍ گێڵمێوە. ئامایمۍ پەی دۊڵەو زاوێتەی و چا گێرتیمێشا و تا ئاسایشوو دهۊکی چەمدارییشا کەردیمێ. چونکوم دەوروبەرمانە سەیارۍ بێنۍ نەتاوێنمۍ حیچ لاێوەرە بلمێ. ئێمەشا بەردیمۍ ئاسایشی گردینوو دهۊکی. چا پێسە ئانەی چێوێما  کەرڎەبۊ سەیارەنە وەزنایمێشارە. وەختوو وشکناینە هیچ چێوێما نەبۍ پەنە، کە تەرسیش بۊ. بەڵام پەی ماوێوە چا مردنایمێشا.  ئا ماوە فرە گول بێ، مامەڵەشا و شێوازشا فرە نائەخلاقی بێ. یانۍ ئەگەر دوژمنوو ئینسانی پاسە کەرۊ، دماجار دوژمنا، ئینسان هەست بە ئازاری مەکەرۊ. بەڵام ئادۍ نلاێوە بە کوردی قسێت چەنی کەرا و لێوە تەرۊ مامەڵێوە چانە کەرا. پەوکای مامەڵەشا چەنیما خراپ بێ. بە چەمێوە خراپ پەیما دیینێ. تەنانەت واچێنۍ ئێمە مدەیمێتا دەسوو تورکەکاوە، بەرمێتا و دەروازەو خابورینە ورەشمێتا. هەرپاسە هەڕەشۍ ئەشکەنجەی و دایوەنەیشا وەنە کەردیمێ. هۊکارەکە چێش بێ؟ ئێمە پەی دابینکەرڎەی بژێویما لوێبێنمۍ وا، هەرمانەما کەردێبێ. یانۍ تەنیا پەی ئانەیە. یانۍ ئەگەر بە ڕاسییچ  کەرڎەبیێما و چێوێما پەنە گیریێ، ڕاش شێنە، بەڵام پاسە  نەبێ".

'هەواڵگێریی پەدەکەی و تورکیای پێوە هەرمانە کەرا'

تەکین قەواڵی دەستنیشانش کەرد، کرد کە هەواڵگێریی پەدەکەی گێرتێبێنۍ و پێسە بەرڎەوام بی: " بنەڕەتنە نەک حەر هەواڵگێریی پەدەکەی، ئینسان متاوۊ بواچۊ کە لاو هەردووە هەواڵگێرییەکەیۊ گیریێبێنێ. وەروو ئانەیە تەلەفونەکامانە بڕۍ نویسیۍ تورکیۍ بێنێ، ئادۍ زانێنۍ و پەیما وانێنێوە. یانۍ دیار بۍ کە چەنی هەواڵگێری تورکەکا هەرمانە کەرێنێ. دماو ئانەی زاناشا ئەرەنیشتۍ کەمپەکەینێ، ئەرەنیشتۍ مەخمورینۍ ئیجارەشا بەتەمامەتی شێوازوو وێشا فاڕا. وەروو ئانەیچ سەروو ئێمەرە سەپنێنۍ کە واچمۍ ئێمە هامڕێنمێ، ئێمە گەریلێنمێ. یانۍ سەرباروو ئانەیە شناسنامەو پەنابەریما بێ، واچێنمۍ کە هاوسەرگیریما کەردن، بنەیانەما هەن، پەی بژێویی بنەیانەکا ئامێنێ، بەڵام زەخت وزێنۍ سەرما  کە واچمێ، ئێمە هامڕێنمێ. مەسەلەن بەرڎەوام جە من پەرسێنۍ تۊ ئینای کام پارچەو کورڎسانینە جە چە هەرێمێوەنە گەریلایەتییت کەرڎەن؟ هەرمانەت چا چێشە بێ؟ یانۍ بە زۊرە گەرەکشابۍ بواچمۍ ئێمە گەریلێنمێ. وەختۍ ئا سەپنایەما ڕەت کەردۊ، ئی جارەشا بە شێوێوە جیاواز مامەڵە کەرێنێ. یانۍ بە بەستەی چەما و کەلەپچەکەرڎەی، تاریکیینە بە تەنیا ئاستۊ، گەرەکشابۍ تەرسناما تا بلمۍ چێروو باروو ئا چێوەینە گەرەکشابۍ سەروو ئێمەرە سەپناش. وەلۍ ئانەما قبووڵ نەکەرد، کە گەرەکشابۍ سەپناش. یانۍ چێش ڕاس بۍ ئێمە ئانەما وات. وەروو ئانەیە تا ماوێوە ئێمەشا  چا ئاستۊ. وێش چا حیچ چێوۍ بە نامۍ یاسۍ و دادپەروەریوە نیا. یانۍ تا بلوو وەرڎەموو دادوەری ئشیا شش مانگۍ پەی ساڵێوە چێروو ئەوەکۊڵیاینە بیێنا. پەوکای ئا نادادی و بێبەزەییەیشا بێ.

ئا وەخت هەڕەشێوە چانێشا وەنەما کەرڎە، واتشا جاریوە تەر بەیۊ بادینانرە کوشمێت،  مدەیمێت دەسوو تورکەکاوە. ئیساتۍ بادینان وەنەو من قەدەغە کریان. یانۍ ئەگەر بلوو یا کوشام یا مدام دەسوو تورکەکاوە یا پا مەرجە ئازاڎم کەرا. تەنانەت بەڵێننامەشا پەنە ئیمزا کەردا. هیچ چێوێما سەرەرە ساق نەبیۊ چند لایەنێوەیچ هەوڵەکێشا وستۍ هەرمانە، بیۍ بە کەفیل. کەفیلەکێچ پەی ئانەیە بێنێ، کە ئەگەر من چێوۍ کەروو، ئادۍ گیریا. یانۍ پا جۊرە بیێنۍ کەفیل. پەوکای ئازاڎ کریایمێ. پەی نموونەی من یاگی تەریچنە زیندانی کریانا. مەسەلەن سەرنیشتنە چند جارۍ زیندانیی کریانا، بەڵام جە حیچ شۊنێوەنە پێسە ئاگەی ڕووبەڕوو بێئەخلاقی و نادادی نەبییەناوە. تەنانەت بە من واچێنۍ کە تەسلیموو تورکەکات کەرمێ. من واتم  کوردنا و تۊیچ کوردنی ئەگەر ویژدانت قبووڵش کەرۊ تەمام دەم دەسشاوە. سەروو ئانەیچ فرەشا عەزیەت دانێ، فرەو چێوایچ هەنۍ ئینسان واچۊشا،  بەڵام چون ئەوەی نائەخلاقیێنۍ مەوچیا. ڕەنگا پەدەکە دۊخێوە جیاوازیچنە بۊ بەڵام دیسان داواو ئێمە ئانێنە کە چا خیانەتە پاشگەز بۊوە. ئیساتۍ یەرۍ شارۍ پیسە هەولێر، دهۊک و زاخۊی بە تەمامی بیێنۍ شاروو هەواڵگێری، کەوتێنۍ چێروو کۊنتڕۊڵوو تورکەکا. با پەدەکە چا خیانەتەیە گێڵۊوە و ئانە سەروو گەلوو کوردیرە ئارڎەنش دووبارە نەکەرۊە".