هامسەرۆکایەتی کۆنسەو ڕاوەبەری کەجەکەی جە نۆیەمین ساڵیاڎو کۆمکوژیی گار ـی ئەنقەرەینە، کۆمکوژییەکەش شەرمەزار کەرڎ و ئەرەیاۋناش ۋنەپەرسایۆیۍ تاریخی جە گرڎ کۆمکوژییۍ و بکوژەکا مکەرمۍ.
ئەرەیاۋناو هامسەرۆکایەتی کۆنسەو ڕاوەبەری کەجەکەی پی جۆرەنە:
"جە ١٠/١٠/ ٢٠١٥ ینە جە مېڎانو گار ـی ئەنقەرەینە هرووژم کریا سەرو گلېرۆبیەی ڕەنج و ئاشتی و دیموکراسی و کۆمکوژیێوە گۆرە ئەنجامدریا، دیسان ئی کۆمکوژییە دڕندە و نامرۆڤانەیە شەرمەزارمکەرمۍ کە دژو دیموکراتیکبیەو تورکیای و چارەسەری پرسو کوردی پېسە قڕکەردەیۍ گۆرەی جە تاریخو تورکیاینە منویسیۆوە. بە ڕێزۆ یاڎو ئا کەسا مکەرمێوە کە چی کۆمکوژییەنە گیانشا جە دەسدا، جە کەسایەتی ئاڎیشانە بە ڕێز و حورمەتۆ یاڎو گرڎو گەشمەرڎا دیموکراسی و شۆڕشی مکەرمێوە، قەولما پەی گەشمەرڎا واوەی مکەرمێوە. سڵام و ڕێز مکیانمۍ پەی زامڎارەکا و کەسوکارو قوربانییەکا. ئا ڕووە دەیان هەزار کەسۍ مجیێرە مېڎانەکە، داواو ئاشتی و ئازادی و واڵە و برایەتیی گەلاشا کەرد. بە دیئاردەی و بە ئامانج یاۋنای پێوەرە ژیۋای ئازادی گەلا، ۋەرپرسیاریۍ تاریخی ئێمەن. بە ئەرەکۊشای هامبەش و یۆگێرتەو گەلان، بێگومان ئی ئامانجە مێنە دی. کۆمکوژی گار ـی ئەنقەرەی، کۆمکوژیێوە گۆرەو زنجیرە هرووژمەکا ڕژێمو ئاکەپە_مەهەپەیا بە نامۍ و دەسو داعشی ئەنجامدریا. هامشێوەو کۆمکوژییەکا تەری، جە کۆمکوژیی گارـی ئەنقەرەی هرووژمکریا سەرو دیموکراتیکبیەو تورکیای و چارەسەری دیموکراتیکی پرسو کوردی و یۆبیەی گەلا و داواو پێوەرە ژیۋای و یەکسانیی گەلا. فیکر و ڕێبازەکۍ چارەسەری ڕابەر ئاپۆی هێزس بەخشا بە هێزە سۆسیالیست و دیموکراتی و ئازادیپارێزەکا، هامپەیمانیی دیموکراتیکی بەینو گەلو کوردی و گەلا تورکیایش قەوەتتەر کەرد پەی دیموکراتیکبیەو تورکیای، بناغەو چارەسەریی دیموکراتیکی پەی چارەسەری گرڎو پرسەکا و بەتایبەت پرسو کوردی. بەڵام دەسەڵاتو ئاکەپە_مەهەپەی کە خاوەن زیهنیەتێوە تاڵانکەر و قڕکەر و نەژاڎپەرس و فاشیستا، پەی ڕاگێرتەی جە دیموکراتیکبیەو تورکیای و ۋەرکۊتوو مېیامینی، کۆنسێپتو قڕکەردەی و هرووژمی وەڵێوەختەش ئاماڎەکەردەبۍ چێرو نامۍ "پلانەو چۆک پنەداینە"، وە ئی پلانێشە جابەجێ کەرڎە دژو ئازادی و دیموکراسی و چارەسەری. کۆمکوژی گار ـی ئەنقەرەی سەرو بناغەو ئی کۆنسێپتو قڕکەردەی و هروژمیە، ئەنجامدریا. هامپەیمانیی دەسەڵاتو ئاکەپە_مەهەپەی و داعش چی چوارچێوەنە بۍ.
جە چڼین ناوچۍ تورکیای و کورڎەسانی و ۋەرکۆتوو مېیامینی، جە کۆمکوژی و هرووژمەکانە، داعش و ڕێکوزیا هامفکرەکا داعشی جە لایەنو دەسەڵاتو ئاکەپە_مەهەپەیۆ پېسە هێزو دایۋنەی بەکاربەرد. دەسەڵاتو ئاکەپە_مەهەپەی چی ڕێوە گەرەکش بۍ وەرمو عوسمانی تازەی و قڕکەری بەدی بارۆ. بەڵام چونکی داعش بە ئەرەکۊشای دیموکراتیک و یۆگێرتەو گەلا مەڕیا، ئی پلانۍ دەسەڵاتو ئاکەپە_مەهەپەی بەدی ناما و سەرنەکۆتە. شکسو دەسەڵاتو ئاکەپە_مەهەپەی و ئا قەیرانە قووڵۍ کۆتشەنە، دەرەنجامو ئی ئاژەینە. هەوڵدای تەیب ئەردۆگانی فاشیست و دەسەڵاتو ئاکەپە_مەهەپەی جە ۋەرا ۋەرو ڕووەدایەکا ۋەرکۊتوو مېیامینینە پەی وەشکەردەی کەشوهەوایۍ و نیشاندای ۋێشا پېسە ناڕازی، عیلاقەش پینەیۆ هەن. دماو ئانەی بە پلانەو داعشی نەتاواش بیاوۆ بە ئامانجو عوسمانی تازەی و نەتاواش بۆ بە هێزی سەروەر جە ۋەرکۆتوو مېیامینینە، ئیتر هەوڵشدا کێشەکاو بەینو ئیسرائیلی و عەرەبی و ئێرانی و دۊڵەتا تەری قووڵتەر بکەرۆوە و جەنگ هۆرگیسنۆ و ئی جەنگیە وەڵا بکەرۆوە. بە قوڵکەردەیۆ جەنگو ۋەرکۆتوو مېیامینی و وەڵاکەردەیۆ ئی جەنگیە، گەرەکشا بیاوۆ بە ئامانجی هەژموونگەرایی و پاوانوازی ۋێش. بە پێچەوانەو ئانەیۆ کە بانگەشەش پەی مکەرۆ، نە دژو کۆمکوژیی گەلان، نە دژو کۆمکوژییەکا ئیسرائیلین. گرڎو کۆمکوژییەکا و بەتایبەت کۆمکوژیی گارۍ جە ١٠/١٠/ ٢٠١٥، جەنگ و سیاسەتو قڕکەردەی و گۆشەگیری کە دەسەڵاتو ئاکەپە_مەهەپەی ئەنجامش دان، گرڎو ئی حەقەتینا بەروزا.
جە نۆیەمین ساڵیاڎو ئی کۆمکوژییە نامەردانەینە، دیسان ئی کۆمکوژییە شەرمەزارمکەرمۍ، واوەیش مکەرمېوە کە ۋنەپەرسایۆ تاریخی جە گرڎو کۆمکوژیی و بکوژا مکەرمۍ. سەرو ئی بناغەیە، بانگەواز جە گەلا و هێزە دیموکراتیک و سۆسیالیست و ئازادیوازا مکەرمۍ، سەرو بناغەی ستراتیجی ئەرەکۊشای هامبەش و یۆگێرتەی قەوەتتەر بکەرا و ئەرەکۊشای گۆرەتەر بکەرا".
