ئەندامەو ڕاوەبەریی کەژەکەی "بەسۍ ئەرزینجان" پەی فراوانکەرڎەی هەڵمەتەو 'چەنی ژەنی، ژیوای و ئازاڎی بەرەو شۊڕشوو ژەنا' بانگەوازش ئەرەیاونا. ئەرزینجانە واتش، "مشۊم ژەنی ڕا نەدا ئەرڎۊغان ور چنیۊ، مشۊم ژەنی ئاڕاستەو ڕاڕەوو سیاسەتی فاڕا.

ئەندامەو ڕاوەبەریی کەژەکەی "بەسۍ ئەرزینجان"ە، جوابوو پرسیارەکاو ئاژانسوو هەواڵوو فرات (ANF)یش داوە.

 سەروو بنەماو هەڵمەتەو 'ئێمە چەنی ژەنی، ژیوای، ئازاڎی بەرەو شۊڕشوو ژەنا هەنگامە منیەیمۍ ' جە بواروو پەرەسانایە سیاسییە ڕوانەکانە جمیەروو ژەنانە، مشۊم ئێمە هەڵمەتەکۍ چەنی ور سەنگنمێ؟ مشۊم مامەڵەی ڕیشەیی ئێمە و پلانسازییەکێما چەنینۍ با؟

ئێمە ٨وو ئاداروو ٢٠٢٣ جە ڕۊو جیهانی ژەنە ڕەنجدەرانە پەی بەرزئرمانای یاڎوو ژەنەگەشمەرڎا جە کۊشیای ئازاڎی ساڵەو ٢٠٢٢ بە هەڵمەتێوە تازۍ ئازاڎی  سەروو بنەماو دروشموو "ئێمە چەنی ژەنی، ژیوای و ئازاڎی بەرەو شۊڕشوو ژەنا هەنگامە منیەیمێ" خێرامایما چا ڕۊیە کەرد. شۊڕشوو ئێمەی ژەنا جە وەرنیشتنە، ئاستوو نائاسایی گەریلاکاما جە مدرامانوو زاپی و ئاڤاشینینە کە بەدەسشا ئارد، قەراروو ئێمەش پەی بەرەووەڵێبەرڎەی و ئەرەمەرزنای کۊنفیدڕاڵیزمی دیموکراتیکی و چی دماییەیچۊ سەروردای ژەنا چێروو دروشموو 'ژەنی، ژیوای، ئازاڎی' کە دماو کوشیای "ژینا ئەمینی"یۍ جە ئێراننە سەرەش ور دا، ئاست، بانگەشە، جەماوەریبییەی و لایەنوو جیهانیبییەی و کۊشیای ئازاڎیی ژەنێش بە شێوێوە ڕۊشن بەر وست.

وەروو ئانەی جە سەرڎەمێوەنە، کە پەی ژەنا تاریزین ئێمە دەسما پا هەڵمەتەو ئازاڎییە کەرڎە، ئێمەی ژەناو کورڎی دلۍ قەراردای و بانگەشەو جوابدایۊ ئینایمۍ هەرمانەو وەڵیوەبییەیمانە. هەوڵ مدەیمۍ هەڵمەتەکێما چەنی جەموو ئا ژەناو کورڎسانی و وەرکەوتوو دلێڕاسەی، کە جە دژوو دەوڵەتی تورکی فاشیستی و چەنی گرڎوو ئا ژەنا، کە دژوو سیستموو پیاسالاری وەرانوەرۍ باوە، پەرە پەنە دەیمۍ و فراوانش کەرمۍ. چی چوارچووەنە ئامانجما ئانەن کە ئێمە کۊشیای ئازاڎیی ژەناما جەماوەریی کەرمۍ و گرڎ شۊنێنە وەڵاش کەرمێوە، گلێرگێوە تازە مەرزنمێرە بە بەشڎاربییەی گرڎکەسی، کۊشیای کۊمەڵایەتی و کۊشیای ژەنۍ چی سەرڎەمنە کە بەرەو وەڵۍ ملۊ، هێزوو کۊشیای ئازاڎیی ئینسانی گەورە کەرمۍ. یۊ جە مەبەسەکاما ئانەن، کە هەنگام بە هەنگام ئامانجوو ئەرەمەرزنای کۊنفیدڕاڵیزمی دیموکراتیکوو ژەنا، سەروو ئا بنەمێوە بەرەو وەڵی بەرمۍ.

جە ئەوەڵۊ بۊنەو ٨و ئاداری ڕۊو جیهانیی ژەنە ڕەنجدەراوە، ڕۊو مدرامانی و ئازاڎیی ڕابەرایەتیما، هینوو ژەنە وێگیرەکاو دلۍ زینڎانەکا، هامڕا ساعیب پێویسییە تایبەتەکا، هینوو گەریلایا، بنەیانەو سەرەبەرزوو گەشمەرڎا، هینوو خەڵکەکەیما و ئینسانیەتی مەبارەک کەرمۍ. بە وەشەویسی و ڕێز و سڵام جە گرڎوو ئا ژەنا کەرمۍ، کە بەشڎارییشا چا چالاکییانە کەرڎەن.

مدرامانوو ئێمەی ژەنا کە جە ٨وو ئادارینە دەسش پەنە کەرڎ و گرڎوو دنیێرە وەڵا بییۊ، گرڎ ساڵیوە گەورەتەر بۊ. ئارۊ کە مدرامانما سەروو بناغەو دروشمی ئەفسووناویی 'ژەنی، ژیوای، ئازاڎی' نەک هەر ڕا وەرڎەموو ژیوای ئازاڎی و یەکسانینە کەرۊوە، هەمان وەختنە جە دژوو گرڎوو ناحەقی، نایەکسانییەکان کە لاو سیستەمی باڵادەسوو پیایۊ خوڵقییان و تێک دریان بەگرڎی وێگێری کەرۊ. جە پەرسەکا پێسە ورگێرتەی تنڎوتیژی سەروو ژەنا، ڕاگێریی جە کوشتەی ژەنا، دماییئارڎەی بە هامسەرگیری جە تەمەنوو زارۊڵەیینە و فرەهامسەری، بەدەسئارڎەی مافەکاو هاموەڵاتیبییەی یەکسانی پەی ژەنا، کۊشیای جە دژوو هەژاریی ژەنا، مافوو ژەنا پەی جەباربەرڎەی زارۊڵەی، ڕێزگێرتەی و وەرەچەمگێرتەی ڕەنجی سەرەکیی ژەنا، خەباتی ماناڎار و بەنرخوو ژەنا دلی یانەینە، پەرەپەنەدای بە هامژیوایی ئازاڎی، دیموکراتیککەرڎەی بنەیانەی، گەشەپەنەدای بە ژیوای ئیکۊنۊمیکی سەروو بنەماو ئیکۊلۊژی و وەیکەرڎەی زارۊڵەی، سەروو بنەماو گەشەپەنەدای بە کەسایەتیی ئازاڎی، ئاڎۍ جمیەرەکاو ئازاڎیی ژەناما بە برەودای بە پڕۊژەی یاگەگێرەوە، پەی ژیوای سەروو ئا بنەمۍ ڕۊڵ و ئەرکوو وێشا یاونا یاگۍ. پەوکاتەی مدرامانوو ژەنا بییەن سەرباشقەو گرڎوو مدرامانە کۊمەڵایەتییەکا، بی بە دەنگوو ستەموەنەکریایا و بیۍ ئیلهاموو خولقنای دنیێوە تازۍ. سەرەوردای ژەنا کاراکتەرێوە گەرڎوونییش ور گێرتەن و فاڕیان پەی سەرەوردای گرڎوو بەشەکاو گلێرگەی و پیایا و جە دژوو چەوسنایۊ، تنڎوتیژی، جەنگی و کۊیلایەتی بەشڎاری جە سەرەوردایەکاو ژەنانە کەرا.

چی چوارچووەنە "ساکینە جانسز"ە، کە بە مەراموو یاونای جمیەرەکەیما پا حەڎە ڕەنجێوە فرەش کێشت و ئارۊیچ "ڕاپەڕین ئامەدە، ئەڤین گۊییە، ئایسەڵە، ناگیهان ئاکارسەلە، دەلال نورهەقە، بێریڤان زیلانە، پەیمان باگۊکە، مەلسا موشە، سارا تۊڵهەڵدانە، روکەن قامیشلۊوە، ژیوای تۊڵهەڵدانە، زەینەب ساروهانە، زنارین عامودۍ و چیچەک هارونییە" و گرڎوو گەشمەرڎاما جە چوارپارچەو کورڎسانینە، بە ڕێز و پەنەزانایۊ ویر وزمۍ. ئێمە بانگەشە و قەرارما پەی ئەرەمەرزنای گلێگێوە ئازاڎی بە پاو یاڎوو ئاڎیشا دووبارە کەرمێوە.

"ڕابەر ئاپۊ" پەی ژەناو کورڎی، ژەناو وەرکەوتوو دلێڕاسەی و ژەناو دنیۍ ڕابەرایەتییێوە جیاوازا، وەروو ئانەی بە دیایێوە ستراتیژیک مامەڵە چەنی ناکۊکییەکاو ژەنا کەرۊ و چارەسەرشا کەرۊ، خەتەو ئازاڎیی ژەنۍ، فەلسەفەو و هەڵوێسوو ژیوای سەروو ئانەیە بەرجەسەن، دلۍ وێشەنە وێناش کەرۊ، ئا جیاوازییە بەدەس مۍ.

ڕابەرایەتیما بە پاڕادایمی دیموکراتیکی، ئیکۊلۊژیک و ئازاڎیی ژەنۍ، ئا تایبەتمەنییەو ڕابەرایەتیی جیهانییش بەدەس ئارد. ئا ڕابەرایەتییە ئینسانییانە و ژەنانەن. پی بۊنەوە ٨وو ئاداری ڕۊو جیهانی ژەنا بە وەشەویسی، ڕێز و وەفاڎاریوە، ٨وو ئادار جە هامڕای هەقەتینو ژەنا ڕابەر "عەبدوڵڵا ئۊجالان"ی مەبارەک کەروو. ڕابەرایەتیما سەروو بنەماو ئازاڎیی کەلیمەکاو "ژەنی" و "ژیوای"ش ئارڎۍ پاڵوو یۊی. گرنگترین بەرنامەو جمیەروو ژەناما سەروو بنەماو وەڵاکەرڎەیۊ ئەندێشەکاو ڕابەرایەتیما و مسۊگەرکەرڎەی ئازاڎیی جەستەیی ئاڎی بۊ. ئازاڎیی ڕابەریما ئازاڎیی ژەنا و گەلان. سەروو ئا بنەمۍ ئێمە قورسایی وزمۍ سەروو خەباتەکاو بەدەسئاورڎەی ئازاڎیی جەسەیی ڕابەرایەتیما.

 بەڕێزۊ سڵام کەروو جە گرڎوو زینڎانییاو ئازاڎی جە زینڎانەکاو تورکیای و ئێرانینە، ٨وو ئاداری چاڎیشا مەبارەک کەروو. زینڎان بناغەو نەریتوو مدرامانوو ئێمەن. چا چوارچووەنە سڵام جە مدرامانوو هامڕایاما کەروو، کە ئینۍ چێروو فاشیزموو تاریکینە.

کارەساتوو بوومەلەرزەکەی، کە ئێساڵ  کورڎساننە ڕووەش دا، کاریگەرییش کەرد سەروو گرڎوو گەلەکەیما و ژەنایچ. پەوکای چالاکییەکێما پەی ٨وو ئاداری سەروو بنەماو پەشتیوانی پەی گەلەکەیما و ژەنا جە یاگە بوومەلەرزەوەنەکەتەکانە، هامبەشیکەرڎەی ئازارەکان سەروو بناغەو یۊگێرتەی گەلی، کریا. ئێمە جارێوە تەر ئەرەیاونمێش کە چەنی گەلەکەیمانمۍ، کە بۊنەو بوومەلەرزەیۊ زەرەرش کەوتەن. سەرەوەشی جە بنەیانەو ئا کەسا کەرمۍ، کە  بوومەلەرزەکەنە ژیوایشا جەدەس دان و هومێڎوو زووخاسبییەیۊ پەی بریندارەکا وازمۍ.

جمیەرو ژەناو کورڎی بە هەڵمەتەو 'ئێمە بە ژەنی، ژیوای و ئازاڎی بەرەو شۊڕش هەنگامە منیەیمێ' وەختۍ جە مەیڎانەکانە خەبات کەرا مشۊم دەور و پەیامی ستراتیژیک و هەرمانەکاشا بە فرەلایەنی و بەقووەتی وێنا کەرا. ئا ڕۊڵە  سەروو بنەماو بەشکەرڎەی هەرمانۍ، بە ڕێکوستەی جیددی، ئەرەمەرزنایرەی و گەشەپەنەدای بە سیستموو ژەنا، تەمامکاریی هامبەش و یەکپارچەیی دەسەبەر بۊ.

جیائاستەی قۊرتە کۊمەڵایەتییەکاو ژەنا و ئەرەمەرزنای گلێرگەی تازەی، تەنیا بە شۊڕشەکاو ژەنا بە دوورنمای ژەنۊلۊژی مسۊگەر بۊ. مشۊم شۊڕشوو ژەنا داراو سیستمی و ڕێکوستەی بۊ. کۊنفیدڕاڵیزمی دیموکراتیکوو ژەنا، پەی خولقنای و درێژەدای بە شۊڕشوو ژەنۍ، شێوازی ڕێکوستەی بنچینەیین. ئێمە جمیەروو ژەناو کورڎی ئانە کە سەدەو ٢١ چەنی بۊ بە سەدەو ژەنا؟ ڕێکوستەی و خەباتوو ئاڎیشا چەنی بەرەووەڵی ملۊ؟ ژیوای تازە چەنی مەرزیۊرە؟ کۊنفیدڕاڵیزمی دیموکراتیکوو ژەنا چەنی ئەرەمەرزیۊ؟ مشۊم وێپارێزنای ژەنۍ و گلێرگەی چەنین بۊ؟ سەروو بنەماو پاڕادایموو ئازاڎیی "ڕابەر ئاپۊ"ی، جوابی بەقووەتما پەی ئا پەرسا هەن. چی بوارەنە ئێمەی ژەنی داراو پراتیکی و ئەزموونی جیددینمۍ. بەڵام کەموکوڵیما جە ئەرەمەرزنای ڕێکوستەی و شکڵدای یەکسان پا ئەزموونا هەن. چێنە قۊرتەکێما جە ڕووەو ئەقڵیەتی و سیستمی، دەور، پەیام و ئەرکەکاو ژەنان، وەروو ئانەی مەتاومۍ هەرمانەکاما بیاونمۍ یاگۍ، گنا چێروو پرسیارێوە. جە ڕووەو لوای سەروو ڕاو ئامانجەکاما لاوازیما هەن.

سەروو ئی بنەمێوە، جە هەنگامەو 'چەنی ژەنی، ژیوای، ئازاڎی بەرەو شۊڕشوو ژەنا هەنگامە منیەیمێ'، ئێمە پێسە جمیەرەکاو ژەنا، دەوری سەرەکیما پەروەرڎەکەرڎەی ژەنان، ڕێکوستەی و چالاککەرڎەیشانە. تا ئەکادیمیاێوە ژەنا نەکریۊوە، مەتاومۍ پەرە بە ڕێکوستەیشا دەیمۍ. جە ئیساتێنە ملوێنان لایەنگیرۍ تەڤگەروو ژەناما هەنۍ. وەلێم ئاستوو ڕێکوستەیشا لاوازا. پێویسا بەزوویی ئینەی چارەسەر کەرمۍ. مشۊم جە ڕاو سەفەربەریوە ڕێکوستەی ژەنا ئەنداماو سیستەموو ژەناما بنیات بنیەیمۍ. جەڕاسینە ئێمە مشۊم ملوێنان ژەنی کە چەنیمانۍ و هامسۊزۍ ئێمەنۍ ڕێکێشا وزمۍ و پەروەردێشا کەرمۍ. پێویسا گەورێشا کەرمۍ. پێویسا سەروو بنەماو کۊمۊنی، ئەنجوومەنی و ئەکادیمیای، کۊپەراتیفەکا پەرە بە رێکوستەیما جە بوارە جیاوازەکانە دەیمۍ. رێکوستەیەکاو کۊنفیدراڵییە دیموکراتییەکا، جیاوازێنۍ جە سۊسیالیزمی تاقیکریاوەی. جە سیستموو کۊنفیدراڵیزمی دیموکراسینە، پەیوەنڎییە ڕێکوستەیە زینڎەکۍ، بەرهەمڎارۍ، فرەلایەنۍ، نەرمۍ فراوانێنۍ. سەروو بنەماو وێڕاوەبەرینۍ. بە پیمانەی جیاواز دلۍ ئەنجوومەنەکانە ڕێکۍ وزیا. ڕێسا، بەرنامە، ڕێساو هەرمانەو ڕێکوستەی بە پاو پێویسی چەنی بنەماو ئایدیۊلۊژی وەشۍ کریا. حیچ چێوێوە بیرۊکراتی، بێزارکەر و دووبارەوەبییە نییا. ئێمەی جمیەروو ژەنا مشۊم گرنگیێوە جیددی بە ڕێکوستەی دەیمۍ. یۊ جە سەرەکیتەرین ڕایەکاو خەباتی جە جمیەری ئاپۊیی ئێمەنە، یۊ بەیۊ ئانەن کە پەیوەنڎی بە کەسەکاوە کەرمۍ و ڕێکێشا وزمۍ. پێویسا جە گرڎوو یاگەکانە ئینەی پەرە پەنە دەیمۍ. پێکئاورڎەی کۊمیتەی، کۊمۊنی و ئەنجوومەنەکا سەروو بناغەو پارێزنامەو ڕابەرتیما، پەروەرڎەکەرڎەی و یاونای فرەتەرین ژەنۍ بە ئەنداماو گەلەکەیما، گرنگتەرین لایەنوو هەنگامەکەما بۊ. پێسە تاویۊ ژیوای بنیات نریۊوە. وەڵۍ گرڎ چێوێنە پێویسا ویروو ژەنۍ گەش کریۊوە، ڕەفاقەت، وەشەویسی و یۊگێرتەی ژەنا پارێزیۊ، باسوو ژەنا بە بەقووەتی خولقیۊ، یۊبییەی گیانوو ژەنا، باوەڕشا، مۊڕاڵشا، زینڎەبییەی، خوڵقنای ژەنۍ بە شێوێوە بەقووەت وەش کریۊ و ئی ڕۊحوو ئازاڎییە جە ڕێکوستەینە زیاڎ کریۊ.

سەروو ئی بناغەیە هەرمانەی سەرەکییەو تەڤگەروو ژەناما پێویسا ئانۍ بۊ، کە ژەنی و گەلەکەما جە "یۊینە" یەکینە وچکلەکاوە دەس پەنە کەرا، پەروەردێشا کەرا، ڕێکێشا وزا، پەیوەندیی ڕێکوستەی زیاڎ کەرا، کەراشا بە یۊ و گەورۍ کریا و گرڎ یاگێوەنە وەڵۍ کریاوە. وەروو ئانەیچ تەڤگەرەکەما مەبۊ کە خەباتوو وێش لای سەریوە، بە شێوەو برۊکراتی، ناوەندپارێزنای، تاکپەرسی، دەسەڵاتوازی و دوور جە قۊرتەکاو ژەناوە دەس پەنە کەرۊ. ئەر پێسنە بۊ، جیاتی گەشەکەرڎەی کۊشیای ئازاڎیی ژەنا، گنا دلۍ دەور و پۊزسیۊنیکی کە کۊشیای لاواز کەرۊ و دماییش پەنە مارۊ، هەرمانەی دووەمەو تەڤگەروو ژەناما ئانێنە، کە پێویسا ئەزموونەکاشا بیاونا ژەناو وەرکەوتوو دلێڕاسەی و دنیۍ و ئا تەجرووبا وەڵا کەراوە. ژەناو گەلا جە کورڎسان و وەرکەوتوو دلیڕاسەینە ئەوەڵای ئەوەڵ، پێویسا تەجرووبەکاما بیاونمۍ گرڎوو ژەناو دنیۍ. وەروو ئانەی ئێمە ژەنەی ڕێکوزیۍ وێما سەروو ڕێبازوو ئازاڎی وەشە کەرمێوە، پێویسا هامکارێچشا بیمۍ.

وەڵاکەرڎەیۊ تەجروبەکا چەنی ئا ژەنا کە گەرەکشانە ئازاڎۍ با؛ سەروو بنەماو ڕێکوستەی، پەروەرڎە، چالاکییەکا، پەرەپەنەدای هامبەشیی چالاکییەکاو بنیاتنیای نەتەوەی دیموکراتیکی بۊ. چەنی ژەناو گەلی، ویروباوەڕ و ئایدۊلۊژیای جیاواز، کە مەنتێقەکەنە ژیوا، ڕێکوستەی هامبەش وەش کەرمۍ، کۊشیایما پەی ئازاڎیی ژەنا فراوانتەر کەرمۍ. وەڵیوەبییەی ژەناو کورڎی تەنیا جە ڕاو هامبەشیکەرڎەی، هامکاری، فێربییەی و سەروو بنەماو ڕێسا و پرەنسیپی بەکۊمەڵی و دیموکراسی کریۊ. کریۊ بە هۊشیاری، هەوڵی و باوڕی، مۊڕاڵی و جۊشوخرۊشی فرەیۊ ئی چێوۍ بەیا دی، ئینەیچ بە ماناو وەشکەرڎەی شۊڕشەکاو ژەنا و سیستەموو ژەنا سەروو ئاستوو و دلۍ و هەم دنیێچ بۊ.

یەرەم: شێوازوو بەشڎاریکەرڎەیما، جە چالاکییە گرڎینییەکاو جمیەرە ڕزگاریوازەکاو ژەنانە فرە گرنگا. ئێمەی ژەناو کورڎی پێوەرە هەرمانە سەروو هەوڵی جێنڎەری وئازاڎیی گەلەکەیما کەرمۍ. پەوکای ئێمە بەتنڎی و کاریگەرانە بەشڎاریی خەباتوو ڕزگاریی گەلەکەیما کەرمۍ. ئێمە دەور و وەرپەرسبییەی گرنگ جە هەرمانە گرڎینییەکانە گێڵنمی، چا چوارچووەنە، ڕێکوزیا و ئەنجوومەنەکاو ژەناما چەنی ڕێکوستەی و ئەنجوومەنە گرڎینییەکا هەرمانە کەرا، حەرپاسە بەشڎاریی فرێوە جە کۊڵیایۊ، ئەرەئارڎەی، ڕێکوستەی و چالاکییەکانە کەرا.

چی چوارچووەنە، پی هەنگامۍ ژەنا، پێویسا مافوو وێما گە گرڎوو وەڵێئامایەکا پەی ئازاڎیی گەلەکەیما بەخاسی بەکار بارمۍ. پەیلوایەکاما بەخاسی بەرۍ وزمۍ، ئیراڎە و ڕەنگوو ژەناما بەر وزمۍ. ئەنجوومەنوو ژەنا مەبۊ یاگەگێرەوەو ئەنجوومەنە گرڎینییەکا با و بە هامتەریب چالاکییەکاشا بەرا ڕاوە. مەبۊ ڕێکوستەیە سەربەوێكێما تەنیا وەرپەرسۍ با جە قۊرتەکاو ژەنا، بەڵکوم مشۊم جە گرڎوو بوارەکاو ژیوایچنە وەرپەرسۍ با. پێویسا بە ئشناسنامەو ژەنا بەڕێکوزیایی جە گرڎوو بوارەکاو ژیواینە بەشڎاری کەرا. سیستموو کۊنفیدراڵیزمی دیموکراتی سەروو بنەماو هامبەشیی سەرمەشقبییەی و نوێنەرایەتیی یەکسانی مەرزیانرە. سیستموو هامسەرۊکایەتی یۊن جە دەسکەوتە گەورەکاو جمیەروو ژەناما، ئی سیستمە پێویسا فرە خاس بەکار بۍ.

پێسە هەرمانۍ چوارەمۍ، جمیەرەکاو ژەناما بەبەقووەتی جە پلاتفۊڕمەکاو دیموکراسی، ئازاڎی، ئیکۊلۊژی و ڕەنجداینە، چا وەڵاتنە کە چەنەشنۍ، بنەڎارۍ کریا. ئینەیچ پاسە کەرۊ کە جمیەرەکاو ژەنا نوێنەرایەتیێوە بەقووەتی دەور و هەرمانەکاشا کەرا چا بوارانە. چی چوارچووەنە کۊشەرەی ئازاڎەی ژەنی، وێش بە وەرپەرس زانۊ جە گرڎوو ئا قەیرانا ئینسانیەتی کە ملشرە ئامێنۍ، متاوۊ سەرتۊپە بۊ و سەرکردایەتیی خەباتی چینایەتی و نەتەوەیی و ئیکۊلۊژی کەرۊ. متاوۊ چەنی ڕێکوستەیە سەربەوێکا یان بە پەیوەسبییەی پا ڕێکوزیایاوە هەرمانە سەروو دەوروو سەرکردایەتی کەرۊ. ئینجا پێسە ژەنێوە قووەو تەماشەکەرڎەی قەیرانەکاو ئینسانی بە دیاێوە گرڎگیر بەقووەت کەرۊ، وەختۍ هەنگامەو 'چەنی ژەنی، ژیوای، ئازاڎی، ئێمە بەرەو شۊڕشوو ژەنا ملمێ'، جە بواروو ڕزگاریی ئینسانینە، جە کۊشیایەکاو دیموکراسی، ئازاڎی و ئیکۊلۊژی، بە نزیکایەتی یەکپارچەیی، دۊڵەمەنڎی، تەمامکەری، نەرمی، بە عەقڵ و پرەنسیپی ژەنانەوە فرە گرنگۍ با. دنیایچنە ژەنی یاگێوە بەقووەتەو و کاریگەرەشا چا جمیەرانە گێرا.

پێسە هەرمانۍ پەنجەمۍ، دەوروو هەرمانەی گرنگەو جمیەرەکاو ژەنا، فاڕای و هەرمانکەرڎەین سەروو فاڕای جە کارەکتەروو پیا دەسەڵاتدارەکانە. گرنگا ژەنە ڕێکوزیێکۍ، بتاوا پیای پەروەرڎە کەرا و فاڕاش. جە سەڎەو ٢١ینە، چەنی گەشەکەرڎەی جمیەرەکاو ئازاڎی، بەشێوە گرنگوو پیایا هەنۍ، کە باوەڕشا بە ئازاڎیی ژەنۍ هەن و گەرەکشانە  سەروو ئا بنەمۍ وێشا فاڕا. عەقڵیەتوو پیای باڵادەسی و پراکتیزەکاش ئیتر تەنیا هینوو ژەنا نییا. لاو پیایاوە و گلێرگەیچۊ قبووڵ مەکریۊ. گرنگا ڕۊشنایی وزیۊ سەروو پلانەو پەروەرڎەی و گفتوگۊ بە مەراموو فاڕای و فاڕیای، جە عەقڵیەتوو پیای باڵادەسی و کۊیلایەتیی ژەنێنە جە ژیوای ڕوانەینە. جمیەرە ژەنانەکۍ دەورێوە هامشێوە گێڵنا. بناغەکاو ژیوایێوە تازەی و ئازاڎی جە کەسایەتیی ژەنۍ و پیای ئازاڎنە دروست بۊ.

س.ز