ئێشکگێریی دادپەروەری پە ئازادیی جەستەیی ڕابەروو گەلوو کوردی عەبدوڵا ئۆجالانی و چارەسەری سیاسیی پەرسەو کوردی شارەکاو ئەزمیری و وانی و ئامەدی و ئێلحی و مێرسینینە بەردەواما.

چالاکییەکانە درووشمێ و پانکارتەکێ پەی سڵامکەردەی وەنەو مدرامانوو زیندانییا و شەرمەزارکەردەی گۆشەگیری و ئازادیی جەستەیی ڕابەروو گەلوو کوردی عەبدوڵا ئۆجالانی بەرزێ کریێوە.

چالاکییەکەو ئەزمیرینە یوە جە ئەداو زیندانییا، فەهیمە پۆیراز، کە سولەیمان پۆیرازی کوڕش بەتەلەفۆنە پ واتێنە: "ئێمە ئینایمێ زینداننە، تەنیا شمە متاودێ کۆشیای ئێمە دلێ چوار دیوارانە بیاوندێ لاو گرد کەسی. پێویسا تەماموو گەلەکەیما دەس بدا دەسوو یۆی و دژوو ناهەقییەکا دەنگ بەرز کەراوە.  ئەگەر یۆی گێرا، متاومێ سەرێ گنمێ".

هەرپاسە چالاکییەکەو وانینە کاندیدوو هامسەرۆکوو شارەوانیی دەم پارتی، عەبدوڵا زەیدان پەشتیوانییش پەی قەوماو زیندانییا و زیندانییە مانگێرتا جە واردەی بەروست و واتش: "داواو زیندانییەکا ڕەوان. پێویسا دەمودەس  بیاویا یاگێ. زیاتەر جە ٣ ساڵان بەڕێز عەبدوڵا ئۆجالان ئینا گۆشەگیریێوە سەختنە. داواو زیندانییا و ئەدایا دماییئامای ئی گۆشەگیرییە و بەدیئامای ئازادیی جەستەیی بەڕێز عەبدوڵا ئۆجالانین".

ئەدێ چالاکییەکەو ئامەدینە بە بۆنەو مانگەو ڕەمەزانیوە ڕۆچێ بێنێ، ئەوەخوایشا کەردۆ، تا ئەنجامێوە بەدەس نارا، دەس جە چالاکییەکەیشا ورمەگێرا.

بەشێوە فرەو پارت و لایەنەکا سەرێ چالاکییەکەو ئێلحیشا دا و درووشمەکاو "ژەنی، ژیوای، ئازادی" و "بژیوۆ مدرامانوو زیندان"ی و "بێ سەرۆکی ژیوای مەبۆ" بەرزێ کریێوە.

چالاکییەکەو مێرسینینە، ئەندامەو مەجلیسوو ئەدایاو ئاشتی، ئەمینە ئەرەنە چالاکییەکەنە بانگەوازش وەنەو کوردە ئەرەنیشتاو ئەورووپای کەرد: "ئانە بەڕێز ئۆجالانش دا دەسوو تورکیایۆ ئەوروپان، پەوکای مشۆم گەنجێ ئەرەنیشتێ ئەورووپای وەردەموو سی پی تی-ینە، ڕەوشوو بەڕێز ئۆجالانی پورساوە و کۆشیای ئەورووپای گەورەتەر کەرا".