ئێشکگیری ئازاڎیی بە سەرمەشقایەتی دەسوەڵېوستەی ئازاڎیی پەی ڕابەر ئاپۆی ٢٥ و حوزەیرانو ٢٠١٢ جە شارو ستراسبۆرگینە دەسش پنە کەرد، جە حەفتەو ٦٥٧ ینە بە پاگیریوە بەردەواما.

ئی چالاکییە پەی ئازاڎیی بەڎەنی ڕابەر ئاپۆی و ناستەی سیستەمو قڕکەردەی ئیمراڵی بە بەشداری گەلوو کوردی و دۆسەکاش جە ئۊروپانە بەردەواما. چی حەفتەنە ٢ وڵاتپارێزنۍ بە نامەکا کەمال دۆغانی و موحسین چۆبانی جە شارو نانسو فەرەنسایۆ ئامۍ و چالاکییەکەشا گێرت دەس.

کەمال دۆغان دەربارەو چالاکییەکەی قسێش کەردۍ و ئەرەیاۋناش مەرامی سەرەکیشا ئازاڎیی ڕابەر ئاپۆیا، دەربارەو چالاکیەکەی واتش: "ماوەو ٣١ ساڵان گەلوو کوردی و دۆسەکێشا ۋەردەمو ئەرەمەرزیاکا ئۊروپاینە بانگەواز مکەرا. چەمەڕا مکەرا کۆنسەو ئۊروپای و سی پی تی ئەرکەکاشا جابەجێ بکەرا."

کەمال دۆغان واتش "ئەر دۊڵەتو تورکی ئاشتیێوە حەقەتینەش چنی گەلوو کوردی گەرەکا، ئانە ئیرادەو ئێمە ئینا ئیمراڵی. پەنەوازا هرووژمەکۍ دۊڵەتو تورکی پەی سەرو ۋەرنیشتی مردانە".