ئیدارەو وێڕاوەبەریی دیموکراتیکوو سەرنیشت  و وەرکەوتوو سوریای بە بۆنەو ٦ەمین ساڵیادوو ئەرەگیرکەردەی عەفرینیوە ئەرەیاوناێوە نویسیاش وەڵا کەردۆ.  

دلێشنە ئامان: "٦ ساڵێ ملوو ئەرەگیرکەردەی عەفرینیرە ویەردەن، دماو کۆشیای و مدرامانێوە ئەفسانەیی گەلەکەما هامشانوو یەکینەکاو پاریزنای گەل (یەپەگە) و یەکینەکاو پارێزنای ژەنێ (یەپەژە)ی پەی ماوەو ٥٨ ڕوا، عەفریننە ئەنجاموو پیلانگێڵنی و بازرگانیی بەینوو هێز و لایەنەکانە ئەرەگیر کریا، ئەنجاموو ئا ئەرەگیرکارییەینە ئەوەمەنەو داعشی و نوسرەی و گرووپە تندڕەوەکای تەری عەفریننە ئەرەنیشتێ بیێ".

هەرپاسە ئەرەیاونۆش بۆنەو چەتەکاو دەوڵەتی ئەرەگیرکەروو تورکیوە، دۆخێوە تراژیدی عەفریننە هەن. فاڕیای دیموگرافی و کوشتەی و ڕفانای و پاشێلکەردەی مافوو ژەنا و دەسدرێژی و ئەشکەنجە بەردەواما، شۆنەوارە تارێخی و سرووشتییەکێ وڕنیا.

ئەرەیاونایەکەنە سڵام مکریۆ جە مدرامانوو گەلوو عەفرینی کەمپەکاو شەهباینە.

هەرپاسە جەخت چی خاڵا کریانۆ:  

"1- ئازادکەردەی عەفرینی و خاکە ئەرەگیرکریایەکا ورچنی ستراتیژیی ئێمەن. پەی ڕزگارکەردەی عەفرینی و گێڵایۆ شکۆمەندانەی خەڵکی کۆچبەریما پەی سەروو خاکەکەیشا، هەموو ئیمکانەکاما سەفەربەرێ کەرمێ.

2- بەبێ ڕزگارکەردەی عەفرینی و هەرێمە ئەرەگیرکریایەکا چارەسەر و ئاسایش سوریانە نییا. داوا وەنەو هێزە نیشتمانییەکا مکەرمێ پەی ئازادکەردەی عەفرینی و بەرکەردەی تورکیای پەشتیوانی وەنەو کۆشیای هێزەکاما بکەرا.

3- ئانە کە عەفریننە گوزەریۆ پاشێلکەردەی تەمامەتی بەهاکان. داوا وەنەو کۆمیتە میاننەتەوەییەکا مکەرمێ بلا شۆنەو ڕاسییەکاو عەفرینیرە و پاشێلکارییەکا تۆمارێ بکەرا و وەرپەرساو تورکی و تاوانبارا بدریانێ دادگا. چونکوم ئا تاوانێ جاگە مکریا بە فەرمانەو دەوڵەتوو تورکی مکریا. ڕێکوزیا میاننەتەوەیی و یاسایی و مرۆییەکێ مشۆم هەرمانە ئەخلاقییەکاشا بیاونا یاگێ.

4- بە ڕای گردینوو سوریایش ئەرەیاونمێ، کە بییەی ئەرەگیرکاریی تورکی و ڕەفتار و کاریگەرییەکاش، سنوورەکاو عەفرینی بەزنا.  

5- داوا گردوو هێزە نیشتمانییەکاو سوریای مکەرمێ کە یۆبییەی وێشا بنیات بنیا، گردوو تواناکاشا سەفەربەر بکەرا پەی ڕزگارکەردەی عەفرینی، پەشتیوانیی مدرامانوو گەلەکەیما بکەرا. ڕزگارکەردەی عەفرینی و هەرێمە ئەرەگیریایەکا، ڕزگارکەردەی گردوو سوریاین جە سیاسەتوو پارچەکەردەی و فیتنەی و ناکۆکیینە".