ڕۆنامەو وۆڵ ستریت ژورناڵی گوزارشتېوەش سەروو زۋانوو ۋەرپەرسا ئەمریکایۆ وەڵاکەرڎەنۆ کە جە ئۆپراسیۆنە سەروازییەکا ئیسرائیلیۆ ئاگاڎار کریېنێوە کە سوپاو ئیسرائیلی ئاوەو بەحریش ۋەردېنە دلۍ مەڕەکاو حەماسی جە غەززە.

بەپاو هەواڵەکەی، ئۆپەراسیۆنەکە مانگەی ۋیەرڎۍ دەسشپنەکەرڎەن و چانەینە پۍ چن حەفتېوە بەردەوام بۆ. حەرپاسە کەناڵوو ABC جە هەواڵېوەنە ئی زانیارییەشە پەشتڕاس کەرڎۊو ئەرەیاۋناش، ئیسرائیل پۍ ماوېوە سنوورداری ئا هەرمانۍ کەرۆ، بزانۆ ئی ستراتیجە کاریگەریش هەن.

حەرپاسە شارەزایاو بواروو ژیۋگەی ئاگاڎیشا دان کە قەرارۍ چا جۊریە تەرسی پۍ سەروو سەرچەمەکا ئاوەو وارڎەیۆ خەڵکوو کەرتوو غەززەی وەش کەرۆ.

ناڕەزایی جۆ بایدنی ۋەران ۋەر بە ئیسرائیلی

جە لێوە تەرۆ، جۆبایدن سەرۆکوو ئەمریکای، بە شێوېوە نائاسایی ڕەخنەش جە حکومەتوو ئیسرائیلی گېرت کە ۋەران ۋەر بە 'چارەسەروو دووۍ دەوڵەتا' مردانۆ و ئاگاڎیشدا چانەی بەمەڵامەتوو بۆردومانە بەردەوامەکاش پۍ سەروو غەززەی، پەشتیوانی میان نەتەوەیی شکس مارۆ.

سەرۆکوو ئەمەریکای واتش؛ "بیگومان مشۊم حەماس دلېنەبریۆ، سەبارەڎ بە بنیامین ناتانیاهۆیچ واتش:"دۆسێوە عالا، بەڵام مشۊم ۋېش فاڕۆ."