یەرۍ ژەنە شۆڕشگێڵنۍ کوردی سارا (سەکینە جانسز)ە، رۆژبین (فیدان دۆغان)ە و رۆناهی (لەیلا شایلەمەز)ە کە ٩و کانونو دووەمو ٢٠١٣ی جە پاریسو پایتەختو فەرەنساینە تیرۆرۍ کریۍ. فەرماندەیی بڕیارگەو مېیانو یەژاستاری بۆنەو ١٢هەمین ساڵیاڎو کۆمکوژییەکەو پاریسیۆ ئەرەیاۋنێوەش وەڵا کەرڎۆ.

فەرماندەیییەکە جە کەسایەتی گەشمەرڎە سارۍ، رۆژبینۍ و رۆناهیێنە گرڎو گەشمەرڎا شۆڕشیش یاڎۍ ئاوردۍ و ئەرەیاۋناش: "جە ١٢هەمین ساڵیاڎو کۆمکوژی پاریسینە کە جە لایەنو دەسە چەپەڵەکاوە ئەنجامدریا، سەرەتا جە کەسایەتی شۆڕشگێڵنۍ سەردەمینە سەکینە جانسزۍ و هەر دوو ژەنی کۊششکارۍ لەیلا شایلەمەزۍ و فیدان دۆغانێنە گرڎو گەشمەرڎا شۆڕشی بە رێزو پنەزانایۆ یاڎۍ مکەرمێوە، نەفرەت چا پیلانگێڵنا مکەرمۍ کە جە کۆمکوژییەکەنە بەشدارۍ بێڼۍ و پەی حەقکەردەیۆ یەکجاری و سەرکۊتەی گۆرەی قەول واوەی مکەرمێوە.

جە ساڵۊو ٢٠١٣ینە جە پاریسو پایتەختو فەرەنساینە، بە دەسو میتو تورکی کۆمکوژی یەرۍ ژەنە شۆڕشگێڵنا پېسە بەشێوە جە پیلانگێڵنیی مېیاننەتەوەیی ئەنجامدریا. دۆڵەتو فەرەنسای جە ماوەو ١٢ ساڵانە جە گرڎ ڕوێوە بێدەنگ بی و ئەوەکۊڵیایشا چا کۆمکوژیە نەکەرد و هامکاری ئا کۆمکوژییەیشا کەردەن، بەڵام ئینە جە لایەنو گەلا و ژەنا جەهانیوە ئاشکرا و ڕۊشنا. هەرپۊکەی ئا چەم قوجنای و هامکارییەو فەرەنسای ڕاش ۋەردەمو دووەم کۆمکوژیی پاریسینە کەردۆ.

دۆڵەتو فەرەنسای پەی ئانەی ۋەردەموتاریخینە نەگنۆ پێگەو تاوانبارییوە، ناچارا کە ئا کۆمکوژیا جە گرڎ ڕووێوە ڕۊشن بکەرۆوە و ۋنەپەرسایۆ جە ئەنجامدەراش بکەرۆ.

بە مەرام گێرتەی ئا یەرە قارەمانا و شۆڕشگێڵنا جە دلێڕاسەو پاریسینە کردەوێوە هەڕەمەکی نییا و ئەنجامو پیلانگێڵنیۍ درێژخایەنین. سەکینە جانسزە (سارا) یووە جە هەڤاڵە سەرەتاییەکا رابەر ئاپۆی بۍ کە تا ساتو گەشمەرڎەبیەیچش جە گرڎ ساتێوە ژیۋایشەنە پەی فەلسەفەو رابەر ئاپۆی جەنگش کەرد، ئەوەکۊشایۍ ئەنجامگرش ڕاوەبەر کەرد. سارا، گرڎ ڕوێش کە ۋېیەرنابۍ جە لاو ژەنا جەهانیچۆ ئشناسیا و پېسە سەرمەشقۆو شۆڕشو ژەنا قەبوڵە کریا.

جە ئۆپراسیۆنی شۆڕشگێڵنی ٢٠١٨ ینە سەرو نامۍ سەکینە جانسزۍ بکوژ و ئامانجەکۍ پیلانگێڵنی بە بەڵگەوە ئاشکرۍ کریۍ.

ئا کۆمکوژییە پېسە لقێوە و درێژکراوەو پیلانگێڵنیی مېیاننەتەوەیی بە دەسو میتی و بە هامکاری هێزە مېیاننەتەوەییەکا ئەنجامدریا. جە ڕاو کۆمکوژی پاریسیوە گەرەکشا بۍ گورزەی گۆرۍ جە جمېیەرو ئازادیی کوردەسانی و جمېیەرو ئازادیی ژەنا شۆڕشگێڵنی بڎا. گەرەکشا بۍ گۆشەگیری سەرو رابەر ئاپۆی زیاتەر بکەرا پەی ئانەیچ سەرمەشقەکۍ جمېیەرەکەیشا کەردۍ ئامانج. بەڵام ئا کردەوە کە جە ١٤هەمین ساڵیاڎو پیلانگێڵنی مېیاننەتەوەیینە ئەنجامدریا، ئامانجەکێش نەپێکۍ و پوچکریاوە. سارا، رۆناهی و رۆژبینە؛ پېسە ٣ ژەنا کوردی بە ئەوەکۊشای شۆڕشگێڵنی ۋێشا سەرمەشقیشا پەی ژەنا جەهانی کەرد و یاوۍ بە سەرکۊتەی ئا ئەوەکۊشایشا مسۆگەر کەرد. سارا، رۆناهی و رۆژبینە ئانڼەی جە ئەوەکۊشای ئازادیی کوردانە گرڎ کاتۍ یاڎشا مکریۆوە، جە لایەنو شۆڕشو جەهانی ژەنایچۆ خاوەن پێگێوە گۆرێنۍ و حەجگیز هەڵوێست، ئەوەکۊشای و رەنجو ئاڎیشا جە یاڎ نمەکریۆ. گەشمەرڎە سارا بە ژیۋای ، ئەوەکۊشای و گەشمەرڎەبیەو ۋێش بیە بە هێما و ئامیانو ئەوەکۊشای گرڎو ژەنا جەهانین.

ئەوەکۊشای ئازادیی ژەنا کوردی دلۍ جمېیەرو ئاپۆیینە بە بەشداربیەی سەکینە جانسزۍ یاخود سارۍ یووەم هەنگامەو ۋێش هۆرگێرت. سەکینە جانسزە جە یووەم کادرەکاو جمېیەرو ئازادیمانە. جە هەنگامە سەرەتاییەکانە بیە بە هامڕێ رابەر ئاپۆی، یووەمجار ئاڎە بڕواش بە ئەندێشەکاو ئاپۆیی ئارڎ و بێ سڵەمایۆ ۋێش وست دلۍ پەڕ ئێرتەرین شۆڕشی. هەڤاڵ سارا ئا ژەنێنە کە سینەو ۋێش کەرڎ بە قەڵغان ۋەرەن ڕوو  تەمامو دژوارییەکا مرداوە. دلۍ فرەو ئێرانە ۋېیەردێنە و جە گرڎ زریانێوەنە بە سەربەرزی ئاما جبەر. جە ئەرەمەرزنای پەکەکەینە بەشدارە بیە، جە ئەرەمەرزناو یووەم پارتو ژەنانە یەژەوەکەینە بەشدارەبۍ، دلۍ هەنگامە سەرەتاییەکاو سوپاو ستارینە بۍ. ئاڎە دلۍ ستەمو زینانو ئامەدینە کە کۊتە تاریخو تاریکینە تفش جە رووەو جەلاد و ئەشکەنجەگەرا کەردەبۍ. ژیۋای سەکینە جانسزۍ پوختە و جەنگی شکۆمەندین. جە یووەم ڕۊوە شێوە و رەنگەو ژەناش ئامێتەو جمېیەرو ئاپۆیی کەرد و پەی ئەوەکۊڵیایەکا رابەر ئاپۆی جە بارەو ئازادیی ژەناوە بیە بە سەرچەمەو ئیلهامی.

چنی هەڤاڵ سارۍ کەردەی ئامانجو هەردووە ژەنا قارەمان و شۆڕشگێڵنۍ، نیشانەش مڎۆ کە ئا سیستمەی بە مەخزو پیا دەوڵەتی هەرمانە مکەرۆ جە ۋەرا ۋەرو هێڵۊو ژەنۍ ئازادێنە پشووش سوارا و نمەتاوۆ دڎان گێرۆ ۋێشەرە. هەڤاڵا رۆناهیە و رۆژبینە دووۍ ژەنۍ شۆڕشگێڵنۍ بێنۍ کە سەرو هێڵۊو سارۍ بەشدارییشا جە ئەوەکۊشای شۆڕشگێڵنینە کەردەبۍ و تا ساتو گەشمەرڎەبیەیشا سەرو ئا هێڵۍ بەردەوامۍ بێنۍ. جە یەرەم ساڵیاڎو کۆمکوژی پاریسینە هەمان بکوژۍ جە سلۆپینە سێڤێ، پاکیزە و فاتمەشا تیرۆرۍ کەردۍ. ۋەرو ئانەی هەڵوێسو ژەنا ئازادیوازی، سەربەخۆی و بڕوا بە ۋۍ بیەی گۊرەتەرین گورزە جە دڵو فاشیزمی مڎریۆ. هەرپاسە جە سەروبەنو ٩هەمین کۆمکوژی پاریسینە، داستانو پیلانگێڵنا، بە تیرۆرکەردەی هەڤاڵ ئەڤین گۆیی و ٢ هەڤاڵا تەری گەرەکشا بۍ جارێوەتەر پەیامو 'هەڵای پیلانگێڵنی بەردەواما'ی بڎا. بەڵام ئێمە پېسە سوپاو ستاری جارێوەتەر ماچمێشۆ کە پیلانگێڵنی سەرنەکەوت و حەجگیز مەرامەکاش بەدەسنمارۆ. پېسە ساڵەی ۋېیەردۍ، سەرو کەشەکا کوردەسانیوە مڎرامانی ئەفسانەیی جە کەسایەتی ژەنا پېسە بێریتانۍ نورحەق چیا، بەروار دێرسیمۍ، ئاخین گابارۍ، سارا تۆڵهەڵدانۍ جە ساڵۊو ٢٠٢٥یچەنە سارابیەی بە سارابیەی سەرکۊتەی بەردەوام بۆنە. نەک هەر سەرو کەشەکا کوردەسانی و دلۍ جەنگەوانا یەژاستارینە، هەڵوێسو سارۍ جە لاو گرڎو ژەنا جەنگکەری، کۊششکاری، گرڎو ژەنا کورد، عەرەبی و گەلا ۋەرکۊتوو مېیامینی و جەهانی ۋێش بە زینەیی ڕاگێرۆ. بە تایبەتی جە شۆڕشو ۋەرنیشتوو کوردەسانینە جە گەشمەرڎا ١٣ ساڵی ۋېیەردەینە تا گەشمەرڎا ئی دماییە، جە کەسایەتی ژەنا پېسە؛ جیهان بیلگینۍ، بێریتان شۆڕشی، رۆناهی یەکتای، ژیندا بۆتانەکانە هەڵوێسو سارۍ زیڼە و بەردەواما. ئێمە پېسە سوپاو ستاری گرڎو وەفاڎاریم بە هێڵۊو ژەنە کۊششکارۍ سارۍ واوەی مکەرمێوە، کە تا سەرکۊتەی حەقە جە سیستەمی قڕکەری بکەرمێوە و ئەوەکۊشای ئازادیی ژەنا بیاونمۍ بە سەرکۊتەی".