سازی میاندەوڵەتیی (بەشداری پەی پارێزنای کەش و کۆ و کۋیسانەکان) ١١ دیسەمبەرو گرد ساڵێوەش چوون (ڕۆو جیهانی کۋیسان)ی دەستنیشان کەردەن، کە ئامانج چنەش پارێزنای کەش و کۆ و کۋیسانەکان.
بە ئا بۆنەوە جە هەورامان، کوردستان و سەرتاسەرو جیهانیەنە، ژیوگەپارێزێ و ژیوگەدۆستێ، چالاکیێ جۆر بەجۆرێ ئەنجامێ مڎانێ.
جە ئی چوارچێوەنە جە دەگایێ و شارچێ و شارەکێ هەورامانی و کوردستانو دیمو وەرکەوتو کوردستانیەنە ژیوگەپارێزێ چەنڎین هەڵمەتێ و چالاکیێشان ئەنجامێ دێ کە وێشان جە هۆشیارکەردەی گلێرگەی، نیای بەلوا و نەماما و پاکەوکەردەی ژیوگەی مەوینانێوە. هەڵمەتێ و چالاکییەکێ جە میانەو هەڵمەتو "زاگرۆسانە"یەنە و بە درۆشمێ چوون "پارێزناو شکۆ زاگرۆسی"، "با گردێمان پێوەرە دەسێ سەوزێ ڕاو پارێزنای شکۆو نیشتمانی بیمێ" ئەنجامێ مڎریانێ و دەیان سازیێ و ڕێکوزیێ ژیوگەیی و هەزاران وێبەخشێ ژیوگەدۆستێ بەشدارێشەنێ.

"زاگرۆسانە" هەڵمەتێوە ژیوگەییەنە کە چەنڎین ساڵێن دەسشپەنەکەردەن و ئامانجش پارێزناو سروشتیەن و بەتیزەتی نیای نەماما و بەلووی بییەن، کە بەلو هێمان پەی ئەوەژیونای دارستانەکان. هامکات هەڵمەتەکێ گەشە بە فەرهەنگو پارێزنای ژیوگەی و هەر پاسە رێزگرتەی جە شەهیدەکانو ڕاڤیری سەوزی و ژیوگەی مڎۆنە و پەیوەست بە گرنگی ژیوگەی گلێرگەی هۆشیار مەکەرۆنەوە.

جە ئی چوارچێوەنە ئەنجومەنو ژیواو پاوەی کە سازیێوی ژیوگەپارێزی هەورامانیەن و ساڵانێوەن چالاکیێ گرنگێش ئەنجامێ دێن و چەنڎین شەهیدێش بە پارێزنای ژیوگەی بەخشێنێ پەیامش دان و جە میانشەنە هانو هاموڵاتیانیش دان زیاتەر ژیوگەی بپارێزنانێ.
پەیامەکەنە دەستنیشان کریان: پەیامەو زاگرۆسانەی پەی سەرجەم خەڵکو هەورامانی و کوردستانیەن کە بە گڕوتین، پارێزەرو خاک و نیشتمانیشان بانێ و بە بەشداریشان جە ئ هەڵمەتێنە، پەی ئەوەژیوناوی زاگرۆسی دەسێ سەوزێ بانێ.

ئەنجومەنو ژیوای بە ئی بۆنەوە دواکارەن جە سەرجەم کەسایەتی، چالاک و ڕێکوزیا ژینگەییەکێ، مەدەنییەکێ، موسیقایێ، فەرهەنگیێ و وەرزشییەکانو هەورامانی، پێسەو ئەرکی نیشتمانیێ و کۆمەڵایەتیشان، جە هەڵمەتەو زاگرۆسانەیەنە بەشدارێ ببانێو یاردی ڕێکوزیا و سازییە ژیوگەپارێزەکان بڎانێ.