پەی ژەنە سیاسەتمەدارا کوردی ساکینە جانسزۍ و فیدان دۆغانۍ و لەیلا شایلەمەزۍ کە ٩ و کانوونو دووەمو ٢٠١٣ ینە جە پاریس گەشمەرڎۍ کریۍ، وە سێڤێ دەمیرە و پاکیزە نایەرە و فاتمە ئویارە کە جە سلۆپی شەرناخینە گەشمەرڎۍ کریۍ، جە ناوچەو نسێبینو مێردینینە چالاکیی یاڎکەردەیۆیشا پەی کریا.

جە پارکو ئاشتینە کە چنەشەنە چالاکی ئێشکگیری دژو هرووژمەکا دۆڵەوتو تورکی و چەتەکاش پەی سەرو سەرنیشت و ۋەرنیشتی دەسش پنە کەردەن، یاڎەکە لوواڕاوە. هامسەرۆکۊو گرڎینەو دەم پارتی تولای حاتەم ئۆغۆللاریە و فرەو ژەنا چنەشەنە بەشدارۍ بێنۍ، درووشمۊو "ژەنی ژیۋای ئازادی" و وێنەو ژەنە گەشمەرڎەکا بەرزکریاوە.

هامسەرۆکۊو مەبیا_دەری غوربەت تەکینە ئەرەیاۋناش درێژە بە ئەوەکۊشای ژەنە گەشمەرڎەکریایەکا مڎا.

پەرلەمانتارەو دەم پارتی ساڵیحە ئایدەنیزە ئەرەیاۋناش جە سەردەمو کۆمکوژیی یووەمو پاریسیوە تا ئیساتۍ زیهنیەتو دەسەڵاتی نەفاڕیان، واتش: "مەڵامەتو ئی کابۆسیە چارەسەرنەکەردەی پرسو کوردین. بە کۆمکوژی پاریسی هەوڵدریا ویستو ئاشتی و ئازادی دلێنەبریۆ. بەڵام هیچکات داواو ئازادیی بێدەنگ نمەبۆ. بە ئەوەکۊشایما پاشەکشە پی زیهنیەتەیە مکەرمۍ و درێژە بە ڕاو هەڤاڵەکاما مڎەیمۍ. تا بەدیئاردەی ئازادی، درێژە بە ئەوەکۊشای مڎەیمۍ".

هامسەرۆکۊو گرڎینەو دەم پارتی تولای حاتەم ئۆغۆللاریە، واتش: "پەی بەدەسئاوردەی مافو هاموڵاتیبیەی و مافو پارتە سیاسییەکا کە جە دەستوورەنە دیاریکریان، ئەوەکۊشمۍ، بەڵام داخەم نمەشۆ ئارۆ دیسان ئی ڕژێمە شکسش ئاردەن و کۊسپ پەی ژەنا وەشمکەرۆ".

حاتەم ئۆغۆللاریە سەرنجش وست سەرو کۆمکوژی پاریسی جە ٩ و کانوونو دووەمینە و ئەرەیاۋناش دماو ئا گرڎ ساڵا هەڵای حەقەتینەکۍ پەی ڕای گرڎی ئاشکرا نەکریان و بەتایبەت فەرەنسا هیچ ڕۆشنکەردەیۆیێش چی بارۆ نەڎان، واتش: "بێجگە چی یەرە ژەنەیچە، چڼین ژەنە سیاسەتمەدارۍ کوردی جە شۊنە جیاوازەکانە کریێنۍ ئامانج. چونکی ئی زیهنیەت و سیستەمە پیاسالارا، جەڕاو دۆڵەتیوە دەس پەی کوشتەو ژەنا بەرۆ".

جە دما دماینە تولای حاتەم ئۆغۆللاریە واتش: "پەی بەدیئارڎەو ئاشتی جە سوریانە هەرچیما دەسەنە بۍ مکەرمێش. چێیچۆ بانگەواز جە گرڎو هێزە سیاسییەکا مکەرمۍ، داوا جە گلێرگەی مېیاننەتەوەیی مکەرمۍ، پەنەوازا گرڎ کەسۍ دەوری ئەرێنی چی پرۆسەنە گێڵنا، حەجگیز دەسبەردارۍ ویستو ئاشتی نمەبیمۍ".

دماتەر چالاکی ئەرەنیشتەی ئەنجامدریا. دماتەر ژەنەکۍ تا بیناو دەم پارتی ناوچەکەی ڕاپیمایشا کەرڎ. پۆلیس هەوڵشدا ڕا جە ڕاپیماو ژەنا بگێرۆ و وەربەسشا نیارە، ژەنا وەربەسەکێشا ۋېیەرنۍ و بە بەرزکەردەیۆ درووشما بەردەوامۍ بێنۍ جە ڕاپیمای.