بە بۆنەو ٨  ئاداری ڕۆو جیهانیی ژەناوە، تەڤگەروو ژەنێ ئازادێ (تەژەئا) و مەجلیسوو ژەناو پارتوو یەکسانی و دیموکراسیی گەلا (دەم پارتی) شەرناخنە و ئیستەنبوڵنە و چەولیگنە چالاکییشا کەرد.  

شەرناخ

شەرناخنە ژەنی بە جلوبەرگی کوردییوە بەشدارییشا کەرد و درووشموو "پێویسا کوردی بۆ بە زوانی ڕسمی" و "من بە کوردی مژیوو" و "ژەنی، ژیوای، ئازادی"ی و "هومێد جە سەرکەوتەی بەنرختەرا"ی بەرزێ کریێوە.

دمایی کۆنفرانسوو چاپەمەنی بەسیا و هامسەرۆکەو دەم پارتی شەرناخنە نورجان ئاڵتورکە نەخشەڕاو تەژەئایش پەی ٨ ئاداری واناوە. دمایی چالاکییەکە بە درووشموو "بژیوۆ کۆشیای ژەنێ " دماییش ئاما.

ئیستەنبوڵ

پەی هەمان مەبەسی ئیستەنبوڵنە بە بەشداریێوە وەرەچەموو ژەناوە چالاکیێوە کریا.

چالاکییەکەنە لافیتەو "ژەنی ئی ڕوە سیاوا ڕۆشنێ کەراوە" و"ئیتر وەسێن، وەختوو ئازادیین" و "گۆشەگیری دلێنە مشۆ، ئازادیی سەرگنۆ" بەرزێ کریێوە. ئەندامەو مەجلیسوو ژەناو دەم پارتی مەلتەم ئۆزەلە نەخشەڕاو ٨ ئاداریش بەکوردی واناوە.

دمایی کاندیدەو دەم پارتی پەی هامسەرۆکایەتیی شارەوانیی ئیستەنبوڵی مەراڵ دەنیش بەشتاشە قسێش کەردێ، واتش جە ژینا ئەمینیێوە تا دەنیز بۆیرازێ سەرەو ڕێزی پەی ژەنە گیانبەختکەرداو ئی ڕێ کۆمنمێرە و تیشکەش وستە سەروو چالاکییەکاو ئێشکگێریی دادپەروەری و مانگێرتەی جە واردەی زیندانییەکا و واتش: " جە کەسێتییشانە، درێژە بە کۆشیای مدەیمێ و دژوو گۆشەگیری و ئەشکەنجەی و نادادپەروەری". ئەوەخوایش کەردۆ تا ڕاپیمایەکەو ٨ ئاداری، ژەناو  ئیستەنبوڵی مەیدانەکانە مەناوە.

دمایی چالاکییەکە بە گۆرانیێ و ورپڕای و بەرزکەردەیۆ درووشموو "ژەنی، ژیوا، ئازادی"ی دماییش ئاما.

چەولیگ

 چالاکییەکەو  چەولیگینە ژەنی قردێلەی مۆرشا کەرد مل و چیرۆکەو ژەنێ کۆشەرەو ڕاو ئازادیی ژەنێشا گێڵناوە.

دمایی پەرلەمانتارە ساڵیحە ئایدەنیزە ئاماژەش پانەیە کەرد حەرچەن ئی ژەنێ یاگێ جیاوازێوە بیێنێ قوربانی بەڵام خاڵێوە هامبەشە کۆش  کەرۆوە، ئانەنە کە بۆنەو سیاسەتوو سیستموو پیا-دەوڵەتیوە کوشیێنێ. جەختش کەردۆ، کە  ژەنی  کۆشیایشا گەورەتەر کەراوە، پێسە ژەناو کوردی چوار پارچەو کوردستانینە و جیهاننە درێژە بە کۆشیای مدا و سەرە وەردەموو سیستەموو پیا-دەوڵەتینە نمەکۆمنارە.  

ئایدەنیز ئاماژەش کەرد، کە ماوەو ٢٤ سەعاتانە ٨ ژەنێ کوشیێنێ ئینەیچ بەرئەنجاموو ئی سیاسەتەینە.