چالاکیی مانگێرتەی جە وارڎەی کە بە داواکاریی ئازادیی جەستەیی ڕابەروو گەلوو کوردی عەبدوڵا ئۊجالانی لاو زینڎانییاوە دەسش پەنە کریان، پاش نییان ڕۊو ٢٢ەمینەوە.

زینڎانیۍ جە زینڎانی وزیارەو ژەناو تارسوسیینە بەشدارییشا جە هەڵمەتەو 'ئازادیی پەی عەبدوڵڵا ئۊجالانی و چارەسەری سیاسی پەی پرسەو کوردی" کەرڎێنە و  ٢٧ تشرینوو دووەم/ نۊڤەمبریوە مانیشا جە وارڎەی گێرتێنە. زینڎانیۍ پەیامەکەشانە وستەنشا ڕووە، کە قۊناغێوە چینەنە دەسپەنەکەرڎەی هەڵمەتەکۍ گرنگا.

پەیامەکەنە ئامان، " ئەوەڵ بە گەرمی سڵام جە گردوو وێگێرا کەشی، زینڎانی و گەلە وەڵاتپارێزنەکەیما کەرمۍ. ٤ەمین ساڵیادوو ئەرەمەرزنای پارتیما وەنەو سەرۊکایەتی، گەشمەرڎاو شۊڕشی، گردوو هامڕایاما و گەلەکەیما مەبارەک کەرمۍ. ئێمە ئینایمۍ چا بڕوێنە، کە ساڵەو ٤٦ەمین بۊ بە ساڵەو ئازادیی سەرۊکایەتی و گردوو گەلە بندەسا.  

ئا هەڵمەتۍ بە دروشموو "ئازادیی پەی عەبدوڵڵا ئۊجالانی و چارەسەری سیاسی پەی پرسەو کورد"ی دەسش پەنە کریان، پەی ئی قۊناغەیە مانا و گرنگیێوە  فرەش هەن. پەوکای ئێمە مزانمۍ ئا گۊشەگیرییە  ئیمراڵیینە هەن، ئارۊ کاریگەرییش گرد یاگێنە نیانرە، کە کورد دلێشەنە مژیوۊ. گەرەکشانە ئێمە چەنی ژیواێوە کی بە بۍ ڕابەرایەتی بارارە. پەی ئانەیچە نزیکەو ٣ ساڵان سەرباروو ئانەیە حیچ زانیاریێوە بارەو سەرۊکایەتییوە وەرڎەس نییا، دەوڵەت ئانەیە سەپنۊ کە ئێمە ئانەیە قبووڵ کەرمۍ. با گرد کەس خاس بزانۊ، کە ئێمە ئا دۊخەیە بە حیچ جۊرێوە قبووڵ مەکەرمۍ و ئێمە بەرڎەوام دژوو ئا سەپنایە وێگێری کەرمۍ.

ئارۊنە گۊشەگیریی ڕەها کە ئیمراڵینە هەن، بە سیاسەتێوە نەرمەبڕانە  گردوو زینڎانەکانە و بەرۊ وەڵا بییەنۊ. موازییۊ کە هەناسە وەنەو کوردی چنۊ، وەلۍ ئانۍ ئا دۊخەیە وزاوە با خاس بزانا، کە پێسە چەنی گەرەکشانە گرد یاگێوە پێسە ئیمراڵی پەنە کەرا، دژوو ئانەیچە ئێمە گرد یاگێوە کەرمۍ مەیڎانوو مدرامانی، وەروو ئانەیە ئێمە پەی ئامدرامانەیە ئیلهام جە ئیمراڵی ورگێرمۍ.

وەروو ئانەیە ئێمە پێسە زینڎانییاو پەکەکەی و پاژکی زینڎانوو تارسوسینە پا قەرارڎارییوە بەشداری  هەڵمەتەکێنە کەرمۍ. ٢٧ تشرینوو دووەمیوە دەسما بە چالاکیی مانگێرتەی جە وارڎەی بە نۊرە کەرڎەن.  وەراوەروو گۊشەگیریی دژوار و گیریای سەرۊکایەتیینە، وەراوەروو ئازادنەکەرڎەی زینڎانییە نەوەشانە، وەراوەروو ورشانایوە وادەو ئازادکەرڎەی زینڎانییا و دژوو زینڎانە تاکەکەسییەکاو جۊروو وای و ئێسینە ئێمە بە هەڵوێستوو وێما، داوا وەنەو گردوو بنەیانەکا و گەلەکەیما کەرمۍ، کە وەراوەروو ئا کرڎەوانە دەنگوو مدرامانی بەرز کەراوە و ورزاوە سەروو پایا".