زەڵم، سەیرانگان یان شەخەڶگا

سەرچەمەو زەڵم-ی جە سایەو ناڕۆشنۋیری گەشتیارا و بێپلانی دەسەڵاتی جە سەیرانگاوەو بییەن بە شەخەڶگا.

جە ڕوانو جەژنەو قوربانیەنە، نزیک بە هەزار گەشتیارۍٚ سەردای هامنەهەوارۍٚ و سەیرانگایەکانو (هەورامانی و پارێزگاو هەڵەبجە)یشان کەردەن. بێگومان پەشکو شێری جە گەشتیارەکان وەرو سەیرانگا و سەرچەمەو زەڵم (ئەحمەدئاوا)ی کەوتەن.
سەردای ئا ژمارە فرەو گەشتیاران، یاگۍٚ دڵوەشییەن و گەشە بە جمیەری بازرگانی و ئابوری و دەرئامەدو مەردومی مڎۆنە. بەڵام جە لایۍٚ تەرەوە یاگۍٚ نێگەرانین چونکە گەشتیارەکۍٚ ژیوگە و سروشتو هەورامانی پیس و وێران مکەرانۍٚ. بەجۆرۍٚ بە ئەۋامەنەکانشان بەتایبەتی دەبۍٚ و بتڵۍٚ ئاۋۍٚ و نایلۆنۍٚ ئاۋی و باغۍٚ و دارستانەکان ژەهراویۍٚ مکەرانۍٚ.
خەڵکو زەڵمی و ئەحمەدئاوای وناوچەکۍٚ تەرۍٚ هەورامانی سەرچەمەو ئانەی پەی ناڕۆشنۋیری گەشتیارا و بێپلانی دەسەڵاتی مگێڵنانێوە و مەواچانۍٚ: سەیرانگاو و سەرچەمەو زەڵم-ی، سەیرانگان یان شەخەڶگا و کەی هامووڵاتی و گەشتیار و دەسەڵات پەی بە گرنگی ژیوگەی و پارێزنایش مبەرۆنە و کەی ئۆرگانەکۍٚ حکومەتی هەنگامەی کەردەییە پەی پارێزنای ژیوگەی و بەرزکەردەی هۆشیاری گلێرگەی منیۆنە؟