بەپاو هەواڵێوە تۆڕەو مافەکا مرۆڤوو کوردسانی زینڎانی سیاسی کورد کامەران قاسمی جە گێرتەخانەو ناوەنڎیی ورمێنە بە مەڵامەتوو ڕاگێرتەی جە دیڎاری چنی بنەیانەکەیش و پاشێلکەردەی مافوو ئیجازەی وەختی و ئازاڎبیەی مەرجداری مانیش جە واردەی گرتێنە.

ئەرەیاۋییا کە قاسمی ١٠ ڕووێن دەسش بە مانگرتەی کەردەن و جە ژوورۍ تاکەکەسینە گۆشەگیر کریان.

تۆڕەو مافەکا مرۆڤوو کوردسانی ئانەیچش وستەن ڕووە کە کامەران قاسمی جە ساڵەو ٢٠١٩ینە گیریان و سەرەتا سزاو ١٠ ساڵا زینڎانیش سەرەرە سەپیان.

دماتەر دادگا سزاو ئا زینڎانیە سیاسیەیشە پۍ ٧ ساڵا و شش مانگا زینڎانی کەمکەردۆ.

بە قسۍ بنەیانەو زینڎانیا سیاسی جە زینڎانوو ورمێنە، کاربەدەسا ئا زینڎانەیە فشارەکێشا سەروو زینڎانیا چڕکەردەنۆ و گرڎ جۆرە دیڎارۍ چنی بنەیانەی و ئازاڎیی وەختی زینڎانیا بە هۊرگێرتەی رەزامەندی لایەنە ئەمنییەکا مەرجدار کەردەن.

جە دژوو ئا فشارا ڕۊو ٢٦و شوباتی شاهین گەلەدار زینڎانی سیاسی دمایش بە ژیۋای ۋێش ئاردەبۍ.

حەرپاسە ڕۊو ٢٨و شوباتیچ دمابەدماو هجووم و یەکەی پاسەوانی زینڎانی پۍ سەروو زینڎانیا، حەسەن عومەر پور زینڎانی سیاسی کوردی جە دژوو ئا هجووم و فشارا ئێرش جە جەسڎەو ۋێش وەردابۍ، پا مەڵامەتۆ قاچش سۆتەبۍ، زینڎانیێوەتەری سیاسی بە نامۍ ئەشکان عوسمان نەژادیچ جە وەختوو حۊڵداینە پۍ کوشنایۊیش تووشوو سۊتەی بی.