پەنج زینانیۍ سیاسیۍ جە گێرتەخانەو قزلحەسارو کەرەجی جە دژو پەسینای سزاو جە قەنارەدای پەخشان عەزیزیۍ، داواشا جە گرڎو ڕێکوزیا مېیاننەتەوەییەکا مافو مرۆڤی کەرد دەمودەس هەرمانە بکەرا پەی ئازاڎکەردەی پەخشان عەزیزیۍ.
پەنج زینانیۍ سیاسیۍ جە گێرتەخانەو قزلحەسارو کەرەجی بە نامەکا؛ سەعید مەسوری، سپێهر ئیمام جومعە، محەمەد شافعی، میسام دێهبانزادە و لوقمان ئەمین پووری جە بارەو پەسینای و جابەجێکەردەی سزاو جە قەنارەدای پەخشان عەزیزیێوە جە زینانو ئێڤینی ئەرەیاۋنێوەشا وەڵا کەرڎۆ.
جە ئەرەیاۋناکەنە ئامان: "ڕژێمو ئێرانی ئینا لێوارو وڕاینە و پەنا بەرۊنە ۋەرو جە قەنارەدای و کوشتەی چالاکا و ئازادیوازا پەی زیاتەر وەڵاکەردەیۆ تەرسنای و تۊقنای دلۍ هاموڵاتییانە، رژێم ئەجۊشەنە بە کوشتەی و جە قەنارەدای، متاوۆ خەڵکی تەرسنۆ و ناچارێشا بکەرۆ بێدەنگۍ با."
جە درێژەو ئەرەیاۋناکەینە ئاماژە پانەیچ کریان، جگە جە پەسینای و جابەجێکەردەی سزاو جە قەنارەدای پەخشان عەزیزیۍ ٥٠ زینانیۍ سیاسیۍ تەرۍ تەرسەو سزاو جە قەنارەدایشا سەرا.
ئا پەنج زینانییە سیاسییۍ جە ئەرەیاۋناکەینە ماچا: "داوا جە هاموڵاتیا مکەرمۍ هەرچی جە تواناشانە بۆ بکەراش و داوا جە گرڎو ڕێکوزیا مېیاننەتەوەییەکا بوارو مافەکا مرۆڤی بەتایبەتی ئەنجوومەنو مافەکا مرۆڤی و ریپۆرتەرو تایبەتی نەتەوە یۆگێرتەکا جە ئێرانەنە مکەرمۍ دەمودەس هەنگام بنیا پەی ڕزگارکەردەی گیانو پەخشان عەزیزیۍ و زینانیا تەری سیاسیی."
