بە بڕیارو کەجەکە-ی، نەپەگە ۲٤ سەعاتێ چالاکی سەربازیش مت کەرد

فەڕمانداری بڕیارگەو ناوەندی پارێزنای گەلی- نەپەگە، ئاشکراش کەرد:" سەرو داۋاو کۆنسەو ڕاۋەبەری کەجەکە-ی، سەرجەم چالاکییە سەربازیەکاشا پەی ماۋەو ۲٤ سەعاتا مت مەکەرۆنە ".


جەی بارەۋە فەرمانداری بڕیارگەو ناوەندی پارێزنای گەلی- نەپەگە، بەیاننامێۋش ۋەڵاکەردەنەۋە و دلێشەنە ئامان: " بە نزیکبییەی جە هۆرۋچنا پارلەمانی و سەرۆک کۆماریەکەو (۲٤و حورەیرانی) جە تورکیا، بە بڕیار و داۋاو کۆنسەو ڕاوەبەری'کۆما جڤاکێن کوردستان-کەجەکە-ی' جە سەعات ۱۹:۰۰و ئارۆ وێرەگای ( ۲۳حوزەیرانی)، سەرجەم چالاکییە سەربازیەکا پەی ماۋەو ۲٤ سەعاتا مدرنمێ و متێ مەکەرمێنە".

نەپەگە باسش جە چارەسەری دۆزو کوردی جە تورکیا و هەرێمەکەنە کەردەن و ئاشکراش مەکەرۆنە: " فرە جارێ سەلەمیان کە بە جەنگ و تنڎوتیژی سەربازی کێشەکێ چارەسەرێ نمەبانە. ڕێبەر ئاپۆ ساڵانێۋەن هەوڵ مڎۆنە بە ڕا ئاشتی و دیموکراتی کێشەکا چارەسەر بکەرۆنە، بەڵام ئەردۆغان ئانەش بە تەرسی پەی سەرو دەسەڵاتە دکتاتۆریەکێش دیەن و سەرجەم هەوڵەکێش جەبار بەردێ و جە ڕێککەوتو (۲٤و تەمووز/٤ی گەلاوێژ)و ساڵەو ٢٠١٥ی دژ بە تەڤگەری ئازادی جەنگش هۆرگیرسناۋە".

نەپەگە دەسنیشانش کەردەن: " ئاکەپە-مەهەپە و ئەردۆغان ۳ ساڵێ ۋیەردەنە جە کێشا و قەیرانا زیاتەر  هیچ دەسکەوتێشا نەبیەن. هاموەخت خەبات پەی ئازادی بەردەۋام بییەن و بە مدرامانی مەزن زەمینە پتەو پەی ناڕەزایەتی دروس کریا. ڕژێمەکەو ئاکەپەی جە مەدیا و دەزگا یاۋنەریەکاشەۋە چەواشەکاری مەکەرۆنە و ڕاسیەکا مەشارۆۋە. بەڵام بەی جۆرە ئیتر پێش نمەلۆنە سەر و جە بوارە سەربازی، سیاسی و ئابوریەکاۋە وڵاتش پەی نمەبریۆنە ڕاۋە و شکستش ئاردەن. هەر ئا هۆکارێ بێنێ کە ئەردۆغان بڕیارو هۆرۋچنای ۋەروەختیش دا، تا جە ڕاشەۋە دەسەڵاتە شکستۋاردەکێش پارێزۆنە و سیستەمە فاشیست و دکتاتۆریەکێش مەرزنۆرە".

نەپەگە جەختش کەردەن: " ئاشکران جە هۆرۋچنیاکانە گەلە زەحمەکێشەکێ کوردستانی و تورکیای وەڵامی تنڎ و شایشتە بە ئەردۆغانی بڎاۋە. جە ۋەراۋەرەنە ئەردۆغان پەی تۆڵەکەردەی و فاڕای ئەنجامەکا دەس بڎۆنە بەهانە گێرتەی و فرتوفێڵ و چەۋاشەکەردەی و ساختکاری. ئێمە پێسەو نەپەگە-ی پەی ڕاگێرتەی چانەیە و ڕەخسنای زەمینەی دروس و دیموکراتی پەی پڕۆسەو هورۋچنایەکا ۲٤و حوزەیرانی، هەڵبەتە سەرو داۋا و بڕیارو کەجەکە-ی،  جە سەعات ۱۹:۰۰و ئارۆ وێرەگای( ۲۳حوزەیرانی) سەرجەم چالاکییە سەربازیەکا پەی ماۋەو ۲٤ سەعاتا مدرنمێ و متێ مەکەرمێنە. جەی ماۋەنە هێزەکێما وێشا جە ناوچە مەدەنیەکا دوور مەۋزاۋە و هیچ چالاکیێ ئەنجام نمەڎانە، مەگەر هێرش و پەلامارە دریا و پارێزنای ڕەۋا بەکار باۋەرانە ".