جە بێرواس دمای ٤۱ ساڵان نەورۆز پیرۆز کریا
جە بێرواس پەی یەکەم جاری دمای ٤۱ ساڵان نەورۆز پیرۆز کریا.
جە دەگاو بێرواس-ی سەر بە شارچەو نۆسوڎ-و هەرێمو هەورامانی دەگانیشنەکێ پەی یەکەم جاری دمای ٤۱ ساڵان جەژنەو نەورۆیشان پیرۆزە کەردە.
بێرواسیەکێ ئایرو نەورۆزیشان کەردەوە و بە گۆرانیێ و هۆرپڕای و شادمانی دەورشەنە مەراسێمو جەژنەکێشان بەردەڕاوە و وەشحاڵ وێشان نیشانەدا کە دمای ٤۱ ساڵان پەی یەکەم جاری تاوانشان جارێوی تەر مەڕاسیمەکەی گێڵنا.
یاگێ باسیەن، ٤۱ ساڵێ جەی وەڵتەر دەگاو بێرواس-ی کە ناوچێوی دڵگیر و گەشتوگێڵیش هەن، بە هۆکارو جەنگە یانە وێرانەکەرەکەو ئێران ئێراق-یەنە وێرانە بییە و خەڵکەکەش ئاوارێ شار و شارچەکانو تەرو هەورامانی ئێرانی بیێ. درەنجام ساڵێ ویەردێ دەگاکێ ئاوەڎانە کریاوە و ژمارێو جەئەرەنیشتەکانش پەی گێڵێوە.
