جیهاد هۆرامی ـ هەڵەبجە

ئارۆ جە پارێزگاو هەڵەبجەی، یانەو سیاوچەمانەی بەبۆنەو ٨ مارسی ڕۆو جیهانی ژەنێ، ئەرمانگەی هونەریش پەی هەرمانە دەسیەکا ژەنە هونەرمەندو هەورامانی، حوسنا هەورامیێ ڕێکۋست.

جە ئەرمانگە هونەریەکەنە، ژمارێۋی فرێ جە ژەنا و پیێ و ۋەرپەرسە ئیداری و حزبیەکا شارەکەی ئامادە بییێ و تەماشەو بەرهەمە دەسەکیەکاش کەرد و ڕێزشا جە ڕۆو جەهانی ژەنێ گێرت.
 
سوبحان فەیرۆز، ڕاۋەبەرو یانەو سیاوچەمانەی، بە ئاژانسو فوڕات نیوزیش وات: چالاکیەکە بەبۆنەو ڕۆو جیهانی ژەناۋە ڕێکماۋست و  بەخاسما زانا پێسە ڕێزگێرتێۋیجە ژەنا و بەتایبەت ژەنە بەهرەمەندو هەورامانی، حوسنا هەورامیێ، ئەی ئەرمانگە هونەرییەشە پەی کەرمێوۋە.

هەر پاسە حوسنا هەورامیێ، ژەنە دەس ڕەنگینو دەگاو بەڵخەو هەورامانی، بە فڕات نیوزی هەورامیش وات: ماوەو چند ساڵان سەرقاڵو دروسکەردەو چند بەرهەمێ هونەرییەنا و ئارۆ بەبۆنەو ڕۆ جیهانی ژەناوە بەخاسم زانا پەی یۆهەمین جاری برمانوشا و تا خەڵک هەورامان و هەڵەبجەی ویناشا.

هەورامیێ، وەشحاڵەنە، کە خەڵکێۋی فرە جە ژەنا و پیایا سەردای کارە هونەریەکاشا کەردەن و دەس وەشیشا چنە کەردێنە.