ستیڤان دیمیستورا نمایندەو تایبەتو نەتەوە یۆگێرتەکان پەی سوریای و سەرپەرشتیارو دایوئەسایە شکستواردەکانو جنێڤ-ی، جە دیمانێنە چەنی (RTS-TV) سویسریی ۋاتەنش: "بەدی-ئاۋردەی ئاشتی جە سوریانە قورسەن، بەڵام پەی یاۋای بە ئاشتی هەوڵ و تەقەلای جدی و بەشداری-کەردەی گرد لایێش گەرەکەن".

دیمیستورا سەبارەت بە ئەۋەکێشیای ئەمەریکای جە سوریا و کوردی ۋاتەنش: "ئەۋەکێشیاکە پەی کوردی قورسەن، بەڵام ئەمەریکا جە بواری دبلۆماسییەنە درێژە بە پڕۆسەکەیش جە سوریانە مڎۆنە و کورد جە سوریانە ڕێکۋزیای بەهێزش هەن. بەبێ کوردی، هیچ سوریانە نمەکریۆنە و نمەبۆنە حسابش پەی نەکریۆنە".

دیمیستورا ئاشکراش کەردەن: "تاوەکو چارەسەری هەمەلایەنە و گردگیر جە سوریانە بەدی نێنە، دیسان مەتەرسی سەرجەنۆ ئەۋەگێڵای داعشی و تاقمە جیهادییەکان هەن".

دیمیستورا دەستنیشانش کەردەن: "ئێران و ڕووسیا دووێ هێزێ سەرەکیێنێ جە سوریانە و ناستشان ڕژێمو ئەسەدی بوڕۆنە. ڕەنگا کە ئەسەد جە بورای جوگرافییەنە جە جەنگەنە سەکەوتە بییەبۆنە، بەڵام گرنگ ئانە کە ئاشتی جە سوریانە سەربگنۆنە".