سیامەند موعینى، هامسەرۆکو پەژاکی، سەبارەت بە نەخشەڕاکێشا پەی چارەسەری کێشەکا ئێرانی و دۆزەو کوردی بە دەنگو ئەمەریکایش واتەن: "چەنی هێزە دیموکرات و ئازادیۋازەکا ئامادێ هەمکاری و هەماهەنگی-یەنمێ".
سیامەند موعینى، هامسەرۆکو پارتو ژیۋای ئازادی-پەژاک، جە دیمانێۋەنە چەنی ڕادۋینو دەنگو ئەمەریکای ڕۆشنایش ۋستەن سەرو نەخشەڕا هامبەشەکێشا چەنی کۆداری کە جە ۱۲ تەمووزو ئیساڵی پەی چارەسەری کێشەکا ئێرانی و دۆزەو کوردی دابێشا و هامکات دمایین ئاژە و ڤییەرەکێ کوردستانی و ناوچەکێش هورسەنگێنێ.
موعینی واتەنش: "پەژاک و گلێرگەو دیموکراتی و ئازادو ۋەرکوتو کوردستانی(کۆدار)، پلان و پرۆژەشا پەی چارەسەرکەردەی کێشەکا وەرکەوتو کوردستانی و ئێرانی ۋستەن ڕووە، بەڵام دەرۋازەشا ڕووەو هێز و لایەنە کوردی و ئێرانیەکارە ئەۋەکریان و نەژنیان، بە تایبەتی پەی ئانیشا کە کار پەی دیموکراسی و ئازادی مەکەرانە".
موعینی ئاشکراش کەردەن: " ئێران و ناوچەکە مەحکومێ فاڕیایەنێ، پۆکەی گرنگەن جە ئیسەۋە ئامادەکاریش پەی بکریۆنە، چونکە ئەگەر پاسە نەکریۆنە، گەلەکەما زیانمەند بۆنە".
بە پەیلۋای سیامەند موعینی، جە ئیسەنە ئەمەریکای پەی وڕنای یان فاڕای سیستمی جە ئێران-نە هیچ نیازێۋش نییا، بەڵکو تەنیا سیاسەتو فشاری بەکاربەرۆنە.
موعینی ئاماژەش بە پەیوەندی وێشا چەنی پەکەکەی و پەیەدەی دان و واتەنش: "چەنی پەکەکەی و پەیەدە چوون یۆنێ و ڕاۋێژ و هامکاری میانشانە هەن، بەڵام پەژاک سەربەۋێ و بڕیار بەدەسەن و هیچ کەس و لایەنێ دەسش جە کاروبار و بڕیارەکاشانە نییەن. پەژاک ئامادەن کە هەر هێزیۋی دیموکراتیۋاز و شۆڕشگێڵ بۆنە، چەنیش بنیشمێرە و پێۋەرە هامکارێ بێمێ".
سیامەند موعینی بەباوەڕەن کە چارەسەری بە ڕێبازی سەربازی زیانی فرە بە گلێرگەی یاونۆنە، پۆکەی پەژاک و کۆدار کۆشش پەی چارەسەری بە ڕێبازە دیپلۆماسی، سیاسی و دیموکراسییەکا مەکەرانە و هێزی سەربازیشا تەنیا پەی پارێزنای ڕەۋای و پارێزنای گلێرگەی بەکابەرانە.
سیامەند موعینى، هامسەرۆکو پەژاکی، جە دمایی دیمانەکەیەنە، ئاماژەش بە مەغزا وئامانجو نەخشەڕاکێشا دان و ۋاتەنش: "نەخشەڕاکەشا پەی چارەسەری کێشەکا ئێرانی و دۆزەو کوردی بە پا خەت و کارنامەو نەتەوەی دیموکراتی و وێسەری دیموکراتی بریۆڕاۋە و کەردەیی کریۆنە، تا جە چوارچێۋەشەنە گەل دەسەڵاتدار بۆنە و سەرجەم ئەتنیک و باۋەری و چینە جیاجیاکێ گلێرگەی داکۆکی جە وێشا بکەرانە و ئازادانە وێشا ڕاۋەبەرانە. چا سۆنگەوە پەی کێشەکا ئێرانی و کوردستانی فەدراسیۆن و فەدرالیزمی دیموکراتی چارەسەرەن و دەوڵەت-نەتەوە کە سەڎ ساڵێش سەرەنە شیەن، جە کێشەکا گلێرگەی نەک بێچارەسەرەن، بەڵکو قوڵەریچشا مەکەرۆۋە".
