موراد قەرەیلان، ئەندام جە کۆنسەو ڕاۋەبەری پەکەکە-ی، هەڕەشەکێ ئەردۆغانی پەی سەرو قەندیلی بە پڕوپاڵانتێ( پڕوپاگەندێ) هۆرۋچنای مزانۆنە و واتش: "ئانە ئەزر و ئانە گەز، ئەگەر شەرەفش هەن با بەیۆن".
موراد قەرەیلان، ئەندامو کۆنسەو ڕاۋەبەری پارتو کارکەرا کوردستانی پەکەکە-ی، جە ستێرک تیڤی بەشدارو بەرنامەی تایبەتی بییەن و ڕاڤە و هۆرسەنگنایش پەی ڤییەر و بابەتەکا ڕۆی بەتایبەتی هەڕەشەکا سەرو قەندیلی کەردەن.
قەرەیلان واتەنش: " قەندیل کریان بە یەکەم ئامانج، گەرەکشانە پەکەکە-ی جە پانیشت( باشور ) بەرۋزانە، پەی شێۋە فشار بۋزان سەرو پانیشتو کوردستانی و جە چوارچێۋەو پیلانێ تازێ ئاکەپە-مەهەپە-ی وابەستەو ۋێشان بکەرانێش".
قەرەیلان ماچۆنە: " ئیسە هۆرۋچناکێ ٢٤ى حوزەیران / ٣ى پووشپەڕی ئینێ ڕۆژەڤەنە، ئەردۆغان پەی ئانەیە سەکەوتە دلێشانە بێنە بەر، کەوتەن پڕوپاڵانەتە کەردەی و پاسە نیشانەش مڎۆنە، کە جە چارەسەری دۆزەو کوردیەنە سەرکەوتە بیەن و بکوژ و ببڕو کوردی وێشەن و مەتاۋنە تورکیای مەزن بکەرۆنە. پەی جۆرێچە ئامانجشەن فرەتەرین دەنگێ بەدەس باۋەرۆنە".
قەرەیلان، جە بارەو هەڕەشە داگیرکاریەکا تورکیای پەی سەرو پانیشتی بە تایبەتی 'قەندیل، شەنگال و مەخمور'ی دەستنیشانش کەردەن: " ئاڎێ ئەجۆشان هەر کۆ گەرەکشا بۆنە مەتاۋانە پێش بلانە و داگیرش بکەرانە، بەڵام ئانە ڕاس نییەن، کەس پێسەو ئێمە دەوڵەتو تورکیای نمەشناسو، خاسیچ مزانمێ جە گرد بوارێۋەنە هێزشا ئینا جە چ ئاستێۋەنە، هشوهوش مەرانە و ماچان: ملمێ قەندیل! دەی باشە ئەگەر بێدێ قەندیل مزاندێ چێش ڕووە مدۆنەو ڕووبەڕوو چێشێ بێدێۋە؟ ئامایتا پەی قەندیلی ئاسان نییا".
قەریلان، درێژەش مڎۆنە پنە و ئاشکراش مەکەرۆنە:" دەوڵەتو تورکیای بەتەنیا دەرەقەتما نمەیۆنە، ئازمونی ۳٥ ساڵە ئانەشە سەلەمنان. پۆکەی گەرەکشەن چەنڎ هێز و کەسایەتیێ کوردێ جە وێش کۆبکەرۆۋە. هەمان ئازموونو عەفرینی دووبارە بکەرۆۋە. جە عەفرین هێزگەلێۋی عەرەبێش کۆکەردێ، جە پانیشتیش هەوڵ مڎانە بڕێۋ کوردێ کۆبکەرۆۋە. چونکە سپاو تورکیای هێزێۋی تەرش نەبۆنە چەنی، جەنگش پنە نمەکریۆنە. بە کورتی ئەگەر هێزەکێ پانیشت( باشور )ی هامکاریش نەکەرانە هیچش پنە نمەکریۆنە. ئێمە هومێڎوارێنمێ ئانە ڕووە نەڎۆنە، هەڵبەتە وەڵتەر هامکاری تورکیاشا کەردەبێ، بەڵام دیسان بێ ئەنجام بییە بێ. بێگومان هێرش پەی قەندیلی جەنگی گەورەش شۆنیرە مەیۆنە، جەنگێۋ کە هەرگیز ئاسان نییەن".
موراد قەرەیلان، ئەندامو کۆنسەو ڕاۋەبەری پەکەکە-ی، هەڕەشەکێ ئەردۆغانی پەی سەرو قەندیلی بە پڕوپاڵانتێ( پڕوپاگەندێ) هۆرۋچنای مەزانۆنە و واتش: " ئەردۆغان پاسە نیشانە مڎۆنە کە گۋایا فرە بەهێزەن، بانگەشەو ئەنجامدای ئۆپەڕاسیۆنی و دمایی ئاردەی بە پەکەکە-ی مەکەرۆنە. دەی با بفەرماۆنە و بێنە پەی قەندیلی، چەنڎ بارەش مەکەرووە، ئانە ئەزر و ئانە گەز، ئەگەر شەرەفش هەن با بەیۆن، بێ شەرەفەن ئەگەر نەیۆنە".
قەرەیلان، جەخت مەکەرۆۋە، کە قەندیل یاگێۋە دێرینە و ستراتیژیەو پانیشتو کوردستان-یەنە و ۲۰ ساڵێن گەلە هژیارەکەش وێگێرانە دژ بە داگیرکەری تورکیای مدران و وار و یانەو وێش چۆڵ نەکەردەن، ئیسێچ بە هاشوهوش و هەڕەشێ چۆڵش نمەکەرۆنە. دەوڵەتو تورکیایچ چانەیە خاس حاڵی بییەن. ۋەرۆ ئانەیە ئێمە هەمیشە ڕێز و وەشەۋیسیما پەی قەندیلیەکا بیەن و هەن".
قەرەیلان، جە دماییەنە سڵام پەی گەنجە بەشداربیەکا قەڵغانی مرۆیی و زینڎەی و ئا کەس و لایەنا کیاست، لۋێنێ قەندیل و دژو داگیرکاری تورکیای مدرێنێۋە.
